Skanda Purana · Chapter 6.234

brahmovāca // //
pitṝṇāṃ tarpaṇaṃ kuryācchraddhāyuktena cetasā //
snānāvasāne nityaṃ ca gupte deve mahāphalam

saṃgame saritostatra pitṝnsaṃtarpya devatāḥ //
japahomādikarmāṇi kṛtvā phalamanaṃtakam

goviṃdasmaraṇaṃ kṛtvā paścātkāryāḥ śubhāḥ kriyāḥ //
eṣa eva pitṛdevamanuṣyādiṣu tṛptidaḥ

śraddhāṃ dharmayutāṃ nāma smṛtipūtāni kārayet //
karmāṇi sakalānīha cāturmāsye guṇottare

satsaṃgo dvijabhaktiśca gurudevāgni tarpaṇam //
gopradānaṃ vedapāṭhaḥ satkriyāsatyabhāṣaṇam

gobhaktirdānabhaktiśca sadā dharmasya sādhanam //
kṛṣṇe supte viśeṣeṇa niyamo'pi mahā phalaḥ

// nārada uvāca // //
niyamaḥ kīdṛśo brahmanphalaṃ ca niyamena kim //
niyamena haristuṣṭo yathā bhavati tadvada

// brahmovāca // //
niyamaścakṣurādīnāṃ kriyāsu vividhāsu ca //
kāryo vidyāvatā puṃsā tatprayogānmahāsukham

etatṣaḍvargaharaṇaṃ ripunigrahaṇaṃ param //
adhyātmamūlametaddhi paramaṃ saukhyakāraṇam

tatra tiṣṭhaṃti niyataṃ kṣamāsatyādayo guṇāḥ //
vivekarūpiṇaḥ sarve tadviṣṇoḥ paramaṃ padam

kṛtvā bhavati yajñānyatkṛtakṛtyatvamatra tat //
syāttasya tatpūrvajānāṃ yena jñātamidaṃ padam

tanmuhūrttamapi dhyātvā pāpaṃ janmaśatodbhavam//
bhasma sādyāti vihitaṃ niraṃjananiṣevaṇāt

pratyahaṃ saṃkucatyasya kṣutpipāsādikaḥ śramaḥ //
sa yogī niyamī nityaṃ harau supte viśiṣyate

cāturmāsye naro bhaktyā yogābhyāsarato na cet //
tasya hastātparibhraṣṭamamṛtaṃ nātra saṃśayaḥ

mano niyamitaṃ yena sarvecchāsu sadāgatam//
tasya jñāne ca mokṣe ca kāraṇaṃ mana eva hi

manoniyamane yatnaḥ kāryaḥ prajñāvatā sadā //
manasā sugṛhītena jñānāptirakhilā dhruvam

tanmanaḥ kṣamayā grāhyaṃ yathā vahniśca vāriṇā //
ekayā kṣamayā sarvo niyamaḥ kathito budhaiḥ

satyamekaṃ paro dharmaḥ satyamekaṃ paraṃ tapaḥ //
satyamekaṃ paraṃ jñānaṃ satye dharmaḥ pratiṣṭhitaḥ

dharmamūlamahiṃsā ca manasā tāṃ ca citayan //
karmaṇā ca tathā vācā tata etāṃ samācaret

parasvaharaṇaṃ cauryaṃ sarvadā sarvamānuṣaiḥ //
cāturmāsye viśeṣeṇa brahmadevasvavarjanam

akṛtyakaraṇaṃ caiva varjanīyaṃ sadā budhaiḥ //
ahīnaḥ sarvakāryeṣu yaḥ sadā vipra vartate

sa ca yogī mahāprājñaḥ prajñācakṣurahaṃ nadhīḥ // ?
ahaṃkāro viṣamidaṃ śarīre varttate nṛṇām

tasmātsa sarvadā tyājyaḥ supte deve viśeṣataḥ //
anīhayā jitakrodho jitalobho bhavennaraḥ

tasya pāpasahasrāṇi dehādyāṃti sahasradhā //
mohaṃ mānaṃ parājitya śamarūpeṇa śatruṇā

vicāreṇa śamo grāhyaḥ santoṣeṇa tathā hi saḥ //
mātsaryamṛjubhāvena niyacchetsa munīśvaraḥ

cāturmāsye dayādharmo na dharmo bhūtavidruhām //
sarvadā sarva dāneṣu bhūtadrohaṃ vivarjayet

etatpāpasahasrāṇāṃ mūlaṃ prāhurmanīṣiṇaḥ //
tasmātsarvaprayatnena kāryā bhūtadayā nṛbhiḥ

sarveṣāmeva bhūtānāṃ harirnityaṃ hṛdi sthitaḥ //
sa eva hi parābhūto yo bhūtadrohakārakaḥ

yasmindharme dayā naiva sa dharmo dūṣito mataḥ //
dayāṃ vinā na vijñānaṃ na dharmo jñānameva ca

tasmātsarvātmabhāvena dayādharmaḥ sanātanaḥ //
sevyaḥ sa puruṣairnityaṃ cāturmāsye viśeṣataḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye cāturmāsyamāhātmye śepaśāyyupākhyāne brahma nāradasaṃvāde cāturmāsyaniyamavidhimāhātmyavarṇanaṃnāma catustriṃśaduttaradviśatatamo'dhyāyaḥ