Skanda Purana · Chapter 6.233

// ṛṣaya ūcuḥ // //
sūta sūta mahābhāga śrotumicchāmahe vayam //
cāturmāsyavratānāṃ hi tvatto māhātmyavistaram

tadasmākaṃ mahābhāga kṛpāṃ kṛtvā'dhunā vada //
tvadvaco'mṛtapānena bhūyaḥ śraddhābhivardhate

// sūta uvāca // //
śṛṇudhvaṃ munayaḥ sarve cāturmāsyavratodbhavam //
māhātmyaṃ vistareṇaiva kathayiṣyāmi vo'grataḥ

purā brahmamukhācchrutvā nānāvratavidhānakam//
nāradaḥ paripapraccha bhūyo brahmāṇamādarāt

//nārada uvāca // //
devadeva mahābhāga vratāni subahūnyapi //
śrutāni tvanmukhādbrahmanna tṛptimadhigacchati

adhunā śrotumicchāmi cāturmāsyavrataṃ śubham// ६ / //
// brahmovāca // //
śṛṇu devamune mattaścāturmāsyavrataṃ śubham //
yacchrutvā bhārate khaṃḍe nṛṇāṃ muktirna durlabhā

muktiprado'yaṃ bhagavānsaṃsārottārakāraṇam //
yasya smaraṇamātreṇa sarvapāpaiḥ pramucyate

mānuṣye durlabhaṃ loke tatrā'pi ca kulīnatā //
tatrāpi sadayatvaṃ ca tatra satsaṃgamaḥ śubhaḥ

satsaṃgamo na yatrāsti viṣṇubhaktirvratāni ca //
cāturmāsye viśeṣeṇa viṣṇuvratakaraḥ śubhaḥ

cāturmāsye'vratī yastu tasya puṇyaṃ nirarthakam //
sarvatīrthāni dānāni puṇyānyāyatanāni ca

viṣṇumāśritya tiṣṭhaṃti cāturmāsye samāgate //
supuṣṭenāpi dehena jīvitaṃ tasya śobhanam

cāturmāsye samāyāte hariṃ yaḥ praṇamedbudhaḥ //
kṛtārthāstasya vibudhā yāvajjīvaṃ varapradāḥ

saṃprāpya mānuṣaṃ janma cāturmāsyaparāṅmukhaḥ //
tasya pāpaśatānyāhurdehasthāni na saṃśayaḥ

mānuṣyaṃ durlabhaṃ loke haribhaktiśca durlabhā //
cāturmāsye viśeṣeṇa supte deve janārdane

cāturmāsye naraḥ snānaṃ prātareva samācaret //
sarvakratuphalaṃ prāpya devavaddivi modate

cāturmāsye tu yaḥ snānaṃ kuryātsiddhimavāpnuyāt //
tathā nirjharaṇe snāti taḍāge kūpikāsu ca

tasya pāpasahasrāṇi vilayaṃ yāṃti tatkṣaṇāt //
puṣkare ca prayāge vā yatra kvāpi mahājale //
cāturmāsyeṣu yaḥ snāti puṇyasaṃkhyā na vidyate

revāyāṃ bhāskarakṣetre prācyāṃ sāgarasaṃgame //
ekāhamapi yaḥ snātaścāturmāsye na doṣabhāk

dinatrayaṃ ca yaḥ snāti narmadāyāṃ samāhitaḥ //
supte deve jagannāthe pāpaṃ yāti sahasradhā

pakṣamekaṃ tu yaḥ snāti godāvaryāṃ dinodaye //
sa bhittvā karmajaṃ dehaṃ yāti viṣṇoḥ salokatām

tilodakena yaḥ snāti tathā caivāmalodakaiḥ //
bilvapatrodakaiścaiva cāturmāsye na doṣabhāk

gaṃgāṃ smarati yo nityamudapātrasamīpataḥ //
tadgāṃgeyaṃ jalaṃ jātaṃ tena snānaṃ samācaret

gaṃgā'pi devadevasya caraṇāṃguṣṭhavāhinī //
pāpaghnī sā sadā proktā cāturmāsye viśeṣataḥ

yataḥ pāpasahasrāṇi viṣṇurdahati saṃsmṛtaḥ //
tasmātpādodakaṃ śīrṣe cāturmāsye dhṛtaṃ śivam

cāturmāsye jalagato devo nārāyaṇo bhavet //
sarvatīrthādhikaṃ snānaṃ viṣṇutejoṃśasaṃgatam

snānaṃ daśavidhaṃ kāryaṃ viṣṇunāma mahāphalam //
supte deve viśeṣeṇa naro devatvamāpnuyāt

vinā snānaṃ tu yatkarma puṇyakāryamayaṃ śubham //
kriyate niṣphalaṃ brahmaṃstatpragṛhṇaṃti rākṣasāḥ

snānena satyamāpnoti snānaṃ dharmaḥ sanātanaḥ //
dharmānmokṣaphalaṃ prāpya punarnaivāvasīdati

ye cādhyātmavidaḥ puṇyā ye ca vedāṃgapāragāḥ //
sarvadānapradā ye ca teṣāṃ snānena śuddhatā

/
kṛtasnānasya ca harirdehamāśritya tiṣṭhati //
sarvakriyākalāpeṣu saṃpūrṇa phalado bhavet

sarvapāpavināśāya devatā toṣaṇāya ca //
cāturmāsye jalasnānaṃ sarvapāpakṣayāvaham

niśāyāṃ caiva na snāyātsaṃdhyāyāṃ grahaṇaṃ vinā //
uṣṇodakena na snānaṃ rātrau śuddhirna jāyate

bhānusaṃdarśanācchuddhirvihitā sarvakarmasu //
cāturmāsye viśeṣeṇa jalaśuddhistu bhāvinī

aśaktyā tu śarīrasya bhasmasnānena śudhyati //
maṃtrasnānena vipreṃdra viṣṇupādodakena vā

nārāyaṇāgrataḥ snānaṃ kṣetra tīrthanadīṣu ca //
yaḥ karoti viśuddhātmā cāturmāsye viśeṣataḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śeṣaśāyyupākhyāne cāturmāsyamāhātmye brahmanāradasaṃvāde gaṃgodakasnānaphalamāhātmyavarṇanaṃnāma trayastriṃśaduttaradviśatatamo'dhyāyaḥ