Skanda Purana · Chapter 6.228

sūta uvāca // //
tathānyacca biladvāri śayanārthe vyavasthitam //
dṛṣṭvā pramucyate pāpī devaṃ ca jalaśāyinam

snātvā tasminbiladvāre pavitre lokasaṃśraye //
yastaṃ pūjayate bhaktyā śeṣaparyaṃkaśāyinam //
ājanmamaraṇātpāpātsa ca muktimavāpnuyāt

caturo vārṣikānmāsānsuprasuptaṃ sureśvaram//
saṃpūjayati yo bhaktyā na sa bhūyo'tra jāyate

tatra pūrvaṃ mahābhāgā munayaḥ sevya taṃ prabhum //
mṛttikāgrahaṇaṃ kṛtvā tasya cāyatane śubhe

saṃprāptāḥ paramaṃ sthānaṃ tadriṣṇoḥ paramaṃ padam //
yatphalaṃ sarvatīrtheṣu sarvayajñeṣu yatphalam //
tatphalaṃ tasya pūjāyāṃ cāturmāsyāṃ prajāyate

yatphalaṃ gograhe mṛtyuṃ saṃprāptā yāṃti mānavāḥ //
tatphalaṃ caturo māsānpūjayā jalaśāyinaḥ

api pāpasamācāraḥ paradārarato'pica //
brahmaghno'pi surāpo'pi strīhantā'pi vigarhitaḥ //
pūjayā caturo māsāṃstasya devasya mucyate

// ṛṣaya ūcuḥ // //
yadetadbhavatā proktaṃ tatrasthaṃ jalaśāyinam //
biladvāre kathaṃ sūta tatra naḥ saṃśayo mahān

sa kila śrūyate devaḥ kṣīrābdhau madhusūdanaḥ //
sadaiva bhagavāñchete yoganidrāṃ samāśritaḥ / ९ //.
kathaṃ sa bhagavāñchete biladvāre vyavasthitaḥ //
etatkīrtaya kārtsnyena paraṃ kautūhalaṃ hi naḥ

// sūta uvāca // //
satyametanmahābhāgāḥ kṣīrābdhau madhusūdanaḥ //
yoganidrāṃ gataḥ śete śeṣaparyaṃkaśā yakaḥ

sa yathā tatra kṣetre tu saṃśrito bhagavānsvayam //
jalaśāyisvarūpeṇa tacchṛśudhvaṃ samāhitāḥ १२ //
yathā ca caturo māsānpūjitastatra saṃsthitaḥ //
muktiṃ dadāti puṃsāṃ sa tathā saṃkīrtayāmyaham

catvāro'pi yathā māsā garhaṇīyā dharātale //
sarvakarmasu mukhyeṣu yajñodvā hādiṣu dvijāḥ

tadvo'haṃ kīrtayiṣyāmi namaskṛtya dvijotamāḥ //
tasmai devādhidevāya nirguṇāya guṇātmane

avyaktāyā'prameyāya sarvadevamayāya ca //
sarvajñāya kavīśāya sarvabhūtātmane tathā

purāsīddānavo raudro hiraṇyakaśipurmahān //
nārasiṃhaṃ vapuḥ kṛtvā viṣṇunā yo nipātitaḥ

tasya putradvayaṃ jajñe sarvalakṣaṇalakṣitam //
prahlādaścāṃdhakaścaiva vīryeṇāpratimau yudhi

hiraṇyakaśipau prāpte paraṃ lokaṃ mahāsure //
amātyairabhiṣekāya prahlādaḥ sa niyojitaḥ

sa naicchata tadā rājyaṃ pitṛpaitāmahaṃ mahat//
samāgatamapi prājño yasmāttadvo vadāmyaham

dānavānāṃ sadā dveṣo devena saha cakriṇā //
na karoti punardveṣaṃ taṃ samuddiśya sarvadā //

etasmātkāraṇātsarve tena tyaktā diteḥ sutāḥ //
svarājyamapi saṃtyajya viṣṇustena samāśritaḥ

tatastairdānavaiḥ kṣudrairviṣṇudveṣaparāyaṇaiḥ //
andhakaḥ sthāpito rājye pitṛpaitāmahe tadā

andhako'pi samārādhya devadevaṃ caturmukham//
amaratvaṃ tato lebhe yāvaccandrārkatārakam

varapuṣṭastataḥ so'pi cakre śakreṇa vigraham

jitvā śakraṃ mahāsaṃkhye yajñāṃśāñjagṛhe svayam //
gatvā'marāvatīṃ daityo niḥsārya ca śatakratum //
svavargeṇa samopetaḥ svargaṃ samaharattadā

śakro'pi ca samārādhya śaṃkaraṃ lokaśaṃkaram //
sarvadevasamopeto bhṛtyavatparivartate

tataḥ kālena mahatā tasya tuṣṭaḥ pinākadhṛk //
taṃ prāha varado'smīti vada śakra karomi kim

// indra uvāca // //
aṃdhakena hṛtaṃ rājyaṃ mama vīryātsureśvara //
yajñabhāgaiḥ samopetaṃ hatvā''śu tatprayaccha me

tacchrutvā tasya dīnasya bhagavāñchaśiśekharaḥ //
provāca tava dāsyāmi rājyaṃ trailokyasaṃbhavam

tataḥ saṃpreṣayāmāsa dūtaṃ tasya vicakṣaṇam //
gaṇeśaṃ vīrabhadrākhyaṃ gatvā taṃ brūhi cāṃdhakam

mamādeśātparityajya svargaṃ gaccha dharātalam //
pitṛpaitāmahaṃ sthānaṃ rājyaṃ tatra samācara

parityajasva yajñāṃśānno ceddhaṃtāsmi satvaram //
sa gatvā cāṃdhakaṃ prāha yathoktaṃ śaṃbhunā sphuṭam

saviśeṣamahābuddhiḥ svāmikāryaprasiddhaye //
atha taṃ cādhakaḥ prāha pravihasya mahābalaḥ //

avadhyo hi yathā dūtastena tvāṃ na nihanmyaham //
ka syādvai śaṃkaronāma yo māmevaṃ prabhāṣate

na māṃ vetti sa kiṃ mūḍhaḥ kiṃ vā mṛtyu mabhīpsate / ३६ //
athavā satyamevaitānnirviṇṇo jīvitācca saḥ//
daridropahato nityaṃ sarvabhogavivarjitaḥ

smaśāne krīḍanaṃ yasya bhasma gātravilepanam //
bhūṣaṇaṃ cāhayo vastraṃ diśo yasya jaṭālakā

kastasya jīvitenārthastenedaṃ māṃ bravīti saḥ//
tasmādgatvā drutaṃ brūhi madvākyaṃ dūta sasphuṭam

tyaktvā kailāsamenaṃ tvaṃ vārāṇasyāṃ tapaḥ kuru //
mayā sthānamidaṃ dattaṃ kailāsaṃ svasutasya ca

vṛkasyāpi na sandeho vibhavena samanvitam //
no cetprāṇānhariṣyāmi seṃdrasya tava śaṃkara

tacchrutvā vīrabhadrastu nirbhartsya ca muhurmuhuḥ //
krodhena mahatāviṣṭaḥ kailāsaṃ samupāviśat

tataḥ sa kathayāmāsa tadvākyaṃ ca pinākinaḥ //
atikrūraṃ viśeṣeṇa tata kruddhaḥ pinākadhṛk

iti śrīskānde mahā purāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye jalaśāyyupākhyāne brahmadattavarapradānoddhatāndhakāsurakṛtaśaṃkarājñāva mānanavarṇanaṃnāmāṣṭāviṃśatyuttaradviśatatamo'dhyāyaḥ