Skanda Purana · Chapter 6.227

// yudhiṣṭhira uvāca // //
narakāṇāṃ svarūpaṃ ca śrutvā me bhayamāgatam //
kathaṃ muktirbhavetteṣāṃ pāpānāmapi pārthiva //
vratairvā niyamairvāpi homairvā tīrthasaṃśrayaiḥ

// bhīṣma uvāca // //
gaṃgāyāmasthipāto'tra yeṣāṃ saṃjāyate nṛṇām //
na teṣāṃ nārako vahniḥ prabhavenmadhyavartinām

gaṃgāyāṃ kriyate śrāddhaṃ yeṣāṃ nāmnā svakaiḥ sutaiḥ //
te vimānaṃ samāśritya prayāṃti narakopari //

pāpaṃ kṛtvā prakurvaṃti prāyaścittaṃ yathoditam //
hema yacchaṃti vā bhūpa na teṣāṃ narako bhavet

śeṣāḥ svakarmaṇaḥ prāptyā sevaṃte ca yathocitam //
svarga vā narakaṃ vāpi sevante te narādhipa

dhārātīrthe mriyaṃte ye svāminaḥ purataḥ sthitāḥ //
te gacchaṃti paraṃ sthānaṃ narakāṇāṃ sudūrataḥ

vārāṇasyāṃ kurukṣetre naimiṣe nāgare pure //
prayāge vā prabhāse vā yastyajettanumā tmanaḥ //
mahāpātakayukto'pi narakaṃ na sa paśyati

nīlo vā vṛṣabho yasya vivāhe saṃniyujyate //
svaputreṇa na saṃpaśyennarakaṃ brahmahā'pi saḥ

prāyopaveśanaṃ kṛtvā hṛdayasthe janārdane //
yastyajetpuruṣaḥ prāṇānnarakaṃ na sa paśyati

prāyopaveśanaṃ yo ca citreśvaraniveśane //
kurvanti narakaṃ naiva te gacchaṃti kadācana

dīnāṃdhakṛpaṇānāṃ ca pathiśramamupeyuṣām //
tīrthayātrāparāṇāṃ ca yo yacchati sadā'śanam //
kāle vā yadi vā'kāle narakaṃ na sa paśyati

jaladhenuṃ ca yo dadyāddhṛṣasaṃsthe divākare //
tiladhenuṃ mṛgasthe ca narakaṃ na sa paśyati

some somagrahe caiva somanāthasya darśanāt //
samudre ca sarasvatyāṃ snātvā na narakaṃ vrajet

sannihityāṃ kurukṣetre rāhugraste divākare //
sūryavāreṇa yaḥ yāti narakaṃ na sa paśyati

kārtikyāṃ kṛttikāyoge yaḥ karoti pradakṣiṇām //
tripuṣkarasya maunena narakaṃ na sa paśyati

mṛgasaṃkramaṇe ye tu sūryavāreṇa saṃsthite //
caṇḍīśaṃ vīkṣayaṃti sma na te narakagāminaḥ

gāṃ paṃkādbrāhmaṇīṃ dāsyātsādhūnstenāddvijaṃ vadhāt //
mocayanti ca ye rājanna te narakagāminaḥ

etatte sarvamākhyātaṃ yatpṛṣṭo'smi narādhipa //
yathā na narakaṃ yāti puruṣastu svakarmaṇā //
yathā ca narakaṃ yāti svalpapāpo'pi mānavaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgara khaṇḍe hāṭakeśvarakṣetramāhātmye śrāddhakalpe bhīṣmayudhiṣṭhirasaṃvāde narakayātanānirasanopāyavarṇanaṃnāma saptaviṃśatyuttaradviśatatamo'dhyāyaḥ