Skanda Purana · Chapter 6.225

// ānarta uvāca // //
ekoddiṣṭavidhiṃ brūhi mama tvaṃ vadatāṃ vara //
pārvaṇaṃ tu yathā proktaṃ vistareṇa mahāmate

// bhartṛyajña uvāca // //
trīṇi saṃcayanādarvāktāni tvaṃ śṛṇu sāṃpratam //
yasminsthāne bhavenmṛtyustatra śrāddhaṃ tu kārayet

ekoddiṣṭaṃ tato mārge viśrāmo yatra kāritaḥ //
tataḥ saṃcayanasthāne tṛtīyaṃ śrāddhamiṣyate

prathame'hni dvitīyehni pañcame saptame tathā //
navame daśame caiva nava śrāddhāni tāni ca

vaitariṇyāśca saṃprāptau pretastṛptimavāpnuyāt //
ekoddiṣṭaṃ daivahīnamekārghaikapavitrakam

āvāhanaparityaktaṃ kāryaṃ pārthivasattama //
tṛptipraśnastathā kāryaḥ svaditaṃ ca sakṛttataḥ

abhiramyatāmiti mantreṇa brāhmaṇasya visarjanam //
acchinnāgramabhinnāgraṃ kuryāddarbhatṛṇadvayam //
pavitraṃ tadvijānīyādekoddiṣṭe vidhīyate

sarvatraiva pitaḥ proktaṃ pitā tarpaṇakarmaṇi //
pitrye saṃkalpakāle ca piturakṣayyadāpane

gotraṃ svarāṃtaṃ sarvatra gotre tarpaṇakarmaṇi //
gotrāya kalpanavidhau gotrasyākṣayyadāpane

śarmannarghyādikartavye śarmā tarpaṇakarmaṇi //
śarmaṇe sasyadāne ca śarmaṇo'kṣayyake vidhau

mātarmātre tathā māturāsane kalpane'kṣaye //
gotre gotrāyai gotrāyāḥ prathamādyā vibhaktayaḥ

devi devyai tathā devyā evaṃ mātuśca kīrtayet //
prathamā ca caturthī ca ṣaṣṭhī syācchrāddhasiddhaye

vibhaktirahitaṃ śrāddhaṃ kriyate vā viparyayāt //
akṛtaṃ tadvijānīyātpitṛṇāṃ nopatiṣṭhati //

tasmātsarvaprayatnena brāhmaṇena vijānatā //
vibhaktibhiryathoktābhiḥ śrāddhe kāryo vidhiḥ sadā

tataḥ sapiṃḍīkaraṇaṃ vatsarā dūrdhvataḥ sthitam //
vṛddhirvā''gāminī cetsyāttadārvāgapi kārayet

pārvaṇoktavidhānena tridaivatyamadaivikam //
pretamuddiśya kartavyameko ddiṣṭaṃ ca pārthiva

ekenaiva tu pākena mama caitanmataṃ smṛtam //
arghapātraṃ samādāya yatpretārthaṃ prakalpitam

pitṛpātreṣu triṣveva tridhā tacca parikṣipet //
evaṃ piṃḍaṃ tridhā kṛtvā pitṛpiṃḍeṣu ca triṣu

ye samāneti mantrābhyāṃ na syātpretastataḥ param //
avanejanaṃ tataḥ kṛtvā pitṛpūrvaṃ yathākramam

gandhadhūpādikaṃ sarvaṃ punareva pradāpayet //
pitṛpūrvaṃ samuccārya varjayecca caturthakam

keciccaturthaṃ kurvaṃti pretaṃ ca svapitustataḥ //
pituḥ pūrvaṃ bhavecchrāddhaṃ paraṃ naitanmataṃ mama

sapiṇḍīkaraṇādūrdhvamekoddiṣṭaṃ na kārayet //
kṣayāhaṃ ca parityajya śastrāhata caturdaśīm

yaḥ sapiṇḍīkṛtaṃ pretaṃ pṛthakpiṇḍe niyojayet //
akṛtaṃ tadvijānīyātpitṛhā copajāyate ///२३ //
pitā yasya tu nirvṛtto jīvate ca pitāmahaḥ //
pituḥ sa nāma saṃkīrtya kīrtayetprapitāmaham

pitāmahastu pratyakṣaṃ bhuktvā gṛhṇāti piṇḍakam //
pitāmahakṣayāhe ca pārvaṇaṃ śrāddhamiṣyate

janakaṃ svaṃ parityajya kathaṃcinnāsya dīyate //
tasyākṛtena śrāddhena na svalpaṃ pitṛto bhayam

amāvāsyāsu sarvāsu mṛte pitari pārvaṇam //
nabhasyāparapakṣasya madhye caitadudāhṛtam

yāvatsapiṃḍatā naiva na tāvacchrāddhamācaret

janake mṛtyumāpanne śrāddhapakṣe samāgate //
pitāmahādeḥ kartavyaṃ śrāddhaṃ yannaikapiṃḍatā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye sapiṃḍīkaraṇavidhivarṇanaṃnāma pañcaviṃśatyuttaradviśatatamo'dhyāyaḥ