Skanda Purana · Chapter 6.223

// bhartṛyajña uvāca // //
śrāddhārhairbrāhmaṇaiḥ kāryaṃ śrāddhaṃ darśe tu pārvaṇam//
viparītaṃ na kartavyaṃ śrāddhamekaṃ kathaṃcana

jārajātāpaviddhādyairyo naraḥ śrāddhamācaret //
brāhmaṇaistu na saṃdehastacchrāddhaṃ vyarthatāṃ vrajet

// ānarta uvāca // //
bhayaṃ me sumahajjātamatra yatparikīrtitam //
jārajātāpaviddhaistu yacchrāddhaṃ vyarthatāṃ vrajet

manunā dvādaśa proktāḥ kila putrā mahāmate //
aputrāṇāṃ ca putratvaṃ ye kurvaṃti sadaiva hi

aurasaḥ kṣetrajaścaiva krayakrītaśca pālitaḥ //
pratipannaḥ sahoḍhaśca kānīnaścāpi sattama

tathānyau kuṇḍagolau ca putrāvapi prakīrtitau

śiṣyaśca rakṣito mṛtyostathāśvattho vanāṃtigaḥ //
kimete naiva kathitā yattvamevaṃ prajalpasi

// bhartṛyajña uvāca // //
satyametanmahābhāga sarve te dharmataḥ sutāḥ //
paraṃ yugatraye proktā na kalau kaluṣāpahāḥ //

tadarthaṃ teṣu santānaṃ tāvanmātraṃ yugeyuge //
sattvāḍhyānāṃ ca lokānāṃ na kalau cālpamedhasām

kalāveva samākhyāto vyavahāraḥ prapā tadaḥ //
alpasattvā yato lokāstena caiṣa vidhiḥ smṛtaḥ

atra yaḥ saṃkaraṃ kuryādyonestasya phalaṃ śṛṇu //
brāhmaṇyāṃ brāhmaṇātputro brahmaghnaḥ saṃprajāyate

sarvādhamānāmadhamo yo vāraḍa iti smṛtaḥ

kṣatriyācca tathā sūto vaiśyānmāgadha eva ca //
śūdrāttathāṃtyajaḥ proktastenaite varjitāḥ sutāḥ

eteṣāmapi nirdiṣṭāḥ sapta rājansuputrakāḥ //
paṃca vaṃśavināśāya pūrveṣāṃ pātanāya ca

aurasaḥ pratipannaśca krītaḥ pālita eva ca //
śiṣyaśca dattajīvaśca tathāśvatthaśca saptamaḥ

puṃnāmno narakādghorādrakṣaṃti ca sadā hi te //
patantaṃ puruṣaṃ tatra tena te śobhanāḥ smṛtāḥ

kṣetrajaśca sahoḍhaśca kānīnaḥ kuṇḍagolakau //
paṃcaite pātayaṃtisma pitṝnsvargagatānapi

etasmātkāraṇācchrāddhaṃ jārajātasya tadvṛthā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddhakalpe śrāddhārhānarhabrāhmaṇādivarṇanaṃnāma trayoviṃśatyuttaraśatatamo'dhyāyaḥ // २२३ / //