Skanda Purana · Chapter 6.219

// bhartṛyajña uvāca // //
kāmyāni te'dhunā vacmi śrāddhāni pṛthivīpate //
yaiḥ kṛtaiḥ samavāpnoti martyo hṛdayasaṃsthitam

yo nārīṃ vāṃchate kṣmāpa rūpāḍhyāṃ śīlamaṇḍanām //
iha loke pare caiva tasyārhaṃ prathamaṃ dinam

śrāddhīyapretapakṣasya mukhyabhūtaṃ ca yannṛpa //
ya icchetkanyakāṃ śreṣṭhāṃ suśīlāṃ rūpasaṃyu tām //
dvitīyādivase tena śrāddhaṃ kāryaṃ mahīpate

yo vāṃchati naro'śvāṃśca vāyuvegasamāñjave //
tṛtīyādivase śrāddhaṃ tena kāryaṃ vipaścitā

yo vāṃchati paśūnmukhyānkupyākupyadhanāni ca //
caturthyāṃ tena kartavyaṃ śrāddhaṃ pitṛpratuṣṭaye

putrānvāṃchati yo'bhīṣṭānsuśīlānvaṃśamaṃḍanān //
pañcamyāṃ tena kartavyaṃ sadā śrāddhaṃ narādhipa

yaḥ śrāddhaṃ vaṃśajairdattaṃ paralokagato nṛpa //
vāṃchate tena kartavyaṃ ṣaṣṭhyāṃ śrāddhaṃ vipaścitā

kṛṣisiddhiṃ ya iccheta graiṣmikīṃ śāradīmapi //
saptamyāṃ yujyate tasya śrāddhaṃ kartuṃ na saṃśayaḥ

ya icchetpaṇyasaṃsiddhiṃ vyavahārasamudbhavām //
aṣṭamyāṃ yujyate śrāddhaṃ tasya kartuṃ narādhipa

navamyāṃ śrāddhakṛnnānā catuṣpadagaṇāllam̐bhet //
saubhāgyaṃ roganāśaṃ ca tathā vallabhasaṃgamam

daśamīdivase śrāddhaṃ yaḥ karoti samāhitaḥ //
tasya syādvāṃchitā siddhiḥ sarvakṛtyeṣu sarvadā

ekādaśyāṃ dhanaṃ dhānyaṃ śrāddhakartā labhennaraḥ //
tathā bhūpaprasādaṃ ca yaccānyanmanasi sthitam

yaḥ karoti ca dvādaśyāṃ śrāddhaṃ śraddhāsamanvitaḥ //
putrāṃstu pravarāṃścaiva sa paśūnvāṃchitāllam̐bhet //

yo vāṃchati naro muktiṃ pitṛbhiḥ saha cātmanaḥ //
asaṃtānaśca yastasya śrāddhe proktā trayodaśī

saṃtānakāmo yaḥ kuryāttasya vaṃśakṣayo bhavet //
na saṃtānavivṛddhayai ca tasya proktā trayodaśī

śrāddhakarmaṇi rājeṃdra śrutireṣā purātanī //
api naḥ sa kule bhūyādyo no dadyāttrayodaśīm

pāyasaṃ madhusarpirbhyāṃ varṣāsu ca maghāsu ca //
maghātrayodaśīyoge pāyasena yajetpitṝn

pitarastasya necchaṃti tadvarṣaṃ śrāddhasatkriyām //
puṇyātiśayabhītena piṃḍadānaṃ nirākṛtam

śakreṇa taddine putramaraṇaṃ darśitaṃ bhayam //
yeṣāṃ ca śastramṛtyuḥ syādapamṛtyurathāpi vā

upasargamṛtānāṃ ca viṣamṛtyumupeyuṣām //
vahninā tu pradagdhānāṃ jalamṛtyu mupeyuṣām

sarpavyālahatānāṃ ca śṛṃgairudbandhanairapi //
ekoddiṣṭaṃ prakartavyaṃ caturdaśyāṃ narādhipa

teṣāṃ tasminkṛte tṛptistatastatpakṣajā bhavet

sarve kāmāḥ puraḥ proktā yuṣmākaṃ ye mayā nṛpa //
amāvāsyādine śrāddhāttānāpnoti na saṃśa yaḥ

etatte sarvamākhyātaṃ kāmyaśrāddhaphalaṃ nṛpa //
yacchrutvā vāṃchitānkāmānsarvānāpnoti mānavaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddhakalpe kāmyaśrāddhavarṇanaṃnāmaikonaviṃśottaradviśatatamo' dhyāyaḥ