Skanda Purana · Chapter 6.218

// bhartṛyajña uvāca // //
etatsāmānyataḥ proktaṃ mayā śrāddhaṃ yathā naraiḥ //
karttavyaṃ viprapūrvairyadvarṇaiḥ pārthivasattama

ataḥ paraṃ pravakṣyāmi svaśākhāyāḥ smṛtaṃ nṛpa //
svadeśavarṇajātīyaṃ yathā syādatra nirvṛtiḥ

śrāddhe śraddhā yato mūlaṃ tena śrāddhaṃ prakīrtitam //
tattasminkriyamāṇe tu na kiṃcidvyarthatāṃ vrajet

aniṣṭamapi rājendra tasmācchrāddhaṃ samā caret //
viprapādodakaṃ yattu bhūmau patati pārthiva

jātā ye gotrajāḥ kecidaputrā maraṇaṃ gatāḥ //
te yāṃti paramāṃ tṛptimamṛtena yathā surāḥ // //
viprapādodakaklinnā yāvattiṣṭhati medinī//
tāvatpuṣkarapātreṣu pibanti pitaro jalam

śrāddhe'tha kriyamāṇe tu yatkiṃcitpatati kṣitau//
puṣpagandhodakaṃ cānnamapi toyaṃ nareśvara

tena tṛptiṃ parāṃ yāṃti ye kṛmitvamupāgatāḥ//
kīṭatvaṃ vāpi tiryaktvaṃ vyālatvaṃ ca narādhipa

yaducchiṣṭaṃ kṣitau yāti pātraprakṣālanodbhavam//
tena tṛptiṃ parāṃ yāṃti ye pretatvamupāgatāḥ

ye cāpamṛtyunā kecinmṛtyuṃ prāptāḥ svavaṃśajāḥ //
asaṃskṛtapramītānāṃ tyāgināṃ kulayoṣitām

ucchiṣṭabhāgadheyaṃ syāddarbheṣu vikiraśca yaḥ //
vikireṇa pradattena te tṛptiṃ yāṃti cākhilāḥ //

yatkiṃcinmaṃtrahīnaṃ vā kālahīnamathāpi vā //
vidhihīnaṃ ca saṃpūrṇaṃ dakṣiṇāyāṃ tu tadbhavet

tasmānna dakṣiṇāhīnaṃ śrāddhaṃ kāryaṃ vipaścitā //
ya icchecchāśvatīṃ tṛptiṃ pitṝṇāmātmanaśca yaḥ

dakṣiṇārahitaṃ śrāddhaṃ yathaivoṣaravarṣitam //
yathā tamasi nṛtyaṃ ca gītaṃ vā badhirasya ca

śrāddhaṃ dattvā ca yuktvā ca śrāddhe niṣkāmatāṃ vrajet //
na svādhyāyaḥ prakartavyo na grāmāṃtarakaṃ vrajet

śrāddhabhugramaṇītalpaṃ tadaharyo'dhigacchati //
taṃ māsaṃ pitarastasya jāyaṃte vīryabhojinaḥ

śrāddhabhukchrāddhadātā ca yaḥ sevayati maithunam //
tasya saṃvatsaraṃ yāvatpitaraḥ śukrabhojinaḥ //
prabhavaṃti na saṃdeha ityeṣā vaidikī śrutiḥ

śrāddhe bhuktvātha dattvā vā yaḥ śrāddhaṃ kurutelpadhīḥ //
svādhyāyaṃ pitarastasya yāvatsaṃvatsaraṃ nṛpa //
vyarthaśrāddhaphalāḥ saṃtaḥ pīḍyaṃte kṣutpipāsayā

śrāddhe bhuktvā'tha dattvā vā yaḥ śrāddhaṃ mānavādhamaḥ //
grāmātaraṃ prayātyatra tacchrāddhaṃ vyarthatāṃ vrajet

brāhmaṇena na bhoktavyaṃ samāyāte nimaṃtraṇe //
atha bhuṃkte ca yo mohātsa prayāti hyadhogatim

yajamānena ca tathā na kāryaṃ bhojanaṃ param//
kurvaṃti ye narāḥ sarve te yāṃti narakaṃ dhruvam

śrāddhe bhuktvā'tha dattvā vā śrāddhaṃ yo yuddhamācaret//
asaṃdigdhaṃ hi tacchrāddhaṃ sa mando vyarthataṃ nayet

tasmātsarvaprayatnena doṣānetānparityajet //
śrāddhabhugyajamānaśca viśeṣeṇa mahīpate

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śrāddhakalpe śrāddhaniyamavarṇanaṃnāmāṣṭādaśottaradviśatatamo'dhyāyaḥ