Skanda Purana · Chapter 6.214

// sūta uvāca // //
tathānyopi ca tatrāsti viśvāmitrapratiṣṭhitaḥ //
gaṇanātho dvijaśreṣṭhāḥ sarvasiddhiprado nṛṇām

māghamāse caturthyāṃ ca śuklāyāṃ pūjayettu yaḥ //
sa ca saṃvatsaraṃ yāvatsarvai vighnairvimucyate o/ २ //
// ṛṣaya ūcuḥ // //
gaṇanāthasya cotpattiṃ sāṃprataṃ sūta no vada //
kathameṣa samutpannaḥ kiṃ māhātmyaḥ prakīrtitaḥ

//
//sūta uvāca // //
eṣa cotpādito gauryā nijāṃgamalataḥ svayam //
krīḍārthaṃ mānuṣairaṃgairmātaṃgānanaśobhitaḥ

caturhastasamopeta ākhuvāhanagastathā //
kuṭhārahastaśca tathā modakāśanatoṣakṛt

sarvasiddhiprado loke bhaktānāṃ ca viśeṣataḥ //
eṣa pūrvaṃ prabhoḥ kārye saṃgrāme tārakāmaye

/
saṃgrāmamakarodraudraṃ na kṛtaṃ yacca kenacit //
nihatā dānavāḥ sarve saṃkhyayā parivarjitāḥ

tataḥ śakreṇa tuṣṭena proktaḥ saṃgrāmabhūmipaḥ //
kṣata vikṣatasarvāṃgo rudhireṇa pariplutaḥ

asmadarthe tvayā yuddhaṃ yatkṛtaṃ sugajānana //
nihatā dānavāḥ sarve saṃkhyayā parivarjitāḥ

tasmāttvaṃ sarvadevānāmapi pūjyo bhaviṣyasi //
kiṃpunarmānuṣāṇāṃ ca ye nityaṃ vighnasaṃplutāḥ

ye tvāṃ saṃpūjayiṣyaṃti kāryāraṃbheṣu sarvataḥ //
kāryasiddhirna saṃdehasteṣāṃ bhūyādgirā mama

evamuktvā sahasrākṣo visasarjātha taṃ tadā //
saṃmānya bahumānena gaurīśaṃkarapārśvataḥ

ayamarthaḥ purā pṛṣṭo rohitāśvena dhīmatā //
sarvavipravināśārthaṃ mārkaṃḍeyaṃ mahāmunim

tamevārthaṃ mahābhāgāḥ kathayiṣye yathārthataḥ //
tacchṛṇudhvaṃ purāvṛttaṃ sarvaṃ sarve samāhitāḥ

// rohitāśva uvāca // //
bhagavannatra ye martyāḥ sarve vighnasamanvitāḥ //
śubhakṛtyeṣu sarveṣu jāyaṃte śucayo'pi ca //

prārabdheṣu ca kāryeṣu dharmajeṣu viśeṣataḥ //
tāni vighnāni jāyante yaistatkāryaṃ na sidhyati

tasmādvighnavināśāya kiṃcinme vratamā diśa //
vrataṃ vā niyamo vā'tha tapo vā dānameva ca

sakṛccīrṇena yenātra yāvajjīvati mānavaḥ //
tāvanna jāyate vighnamājanmamaraṇāṃtikam //

// mārkaṇḍeya uvāca // //
atra te kīrtayiṣyāmi sarvavighnavināśanam //
vrataṃ sarvaguṇopetaṃ sarvapāpapraṇāśanam //
viśvāmitreṇa sañcīrṇaṃ yatpurā bhāvitātmanā

viśvāmitra iti khyāto gādhiputraḥ pratāpavān //
vasiṣṭhena samaṃ tasya vairamāsīnmahātmanaḥ

brāhmaṇyārthe na samproktaḥ kathaṃcitsa mahātapāḥ //
brāhmaṇastvaṃ vasiṣṭhena tato vairamajāyata

// rohitāśva uvāca // //
kasmānna proktavānvipro vasiṣṭhastu kathaṃcana //
brāhmaṇaḥ sa paraṃ proktobrahmādibhirapi svayam

// mārkaṇḍeya uvāca // //
kṣatriyaśca sthitaḥ pūrvaṃ viśvāmitro mahīpatiḥ //
mṛgayāsu paribhrāṃto vasiṣṭhasya tadā''śramam//
praviṣṭaḥ kṣutpipāsārttaḥ sa tenātha prapūjitaḥ

tasyāsīnnandinīnāma dhenuḥ kāmadughā sadā //
sā sūte vāñchitaṃ sadyo yadvasiṣṭho'bhivāñchati

tatprabhāvātsa bhūpālaḥ sabhṛtyabalavāhanaḥ //
tena tṛptiparā nīto miṣṭānnairvividhaistataḥ //

pārthivo'yamiti jñātvā hyarghyādyairbhojanaiḥ sa ca //
so'pi dṛṣṭvā prabhāvaṃ taṃ sarvaṃ dhenośca saṃbhavam //
prārthayāmāsa tāṃ mūlyairgajavājisamu dbhavaiḥ

na dadau sa tadā vipraḥ sāmnā dānena vā punaḥ //
bhedena ca tato daṇḍaṃ yojayāmāsa vai nṛpaḥ

kālayāmāsa tāṃ dhenuṃ tataḥ kopātsa pārthivaḥ

sā'bravīnnīyamānā'tha vasiṣṭhaṃ kiṃ tvayā vibho //
dattāhamasya nṛpateryanmāṃ nayati yatnataḥ

// vasiṣṭha uvāca // //
na mayā tvaṃ mahābhāge dattā cāsya mahīpateḥ //
balānnayati yadyeṣa tasmādyuktaṃ samācara

tacchrutvā kopasaṃyuktā nandinī dhenuruttamā //
jṛṃbhāṃ cakāra tatsainyaṃ samuddiśya nṛpodbhavam

dhūmāvartistato jātā tasyā vaktrāttataḥ param //
tato jvālā mahāraudrāstato yodhāḥ sahasraśaḥ

nānāśastradharā raudrā yamadūtā yathā ca te //
pulindā barbarābhīrāḥ kirātā yavanāḥ śakāḥ //

te procustāṃ vadāsmākaṃ kasmātsṛṣṭā vayaṃ śubhe

// nandinyuvāca // //
ete māṃ ye balātpāpā nayaṃti nṛpasevakāḥ //
tānnighnantu samādeśānnānyadvāṃchāmi kiṃcana

tatastaistasya tatsainyaṃ viśvāmitrasya sūditam //
yudhyamānaṃ mahārāja daśarātreṇa saṃyuge

viśvāmitro'pi taddṛṣṭvā brāhmyaṃ balamanuttamam //
pratijñāmakarottatra tāreṇa susvareṇa ca

athāhaṃ saṃbhaviṣyāmi brāhmaṇo nātra saṃśayaḥ //
mamāpi jāyate yena prabhāvaścedṛśo'dbhutaḥ

tasmāttapaḥ kariṣyāmi yadasādhyaṃ surairapi //
svaputraṃ sve pade dhṛtvā tataścakre tapo mahat

brāhmaṇyārthaṃ mahāraudraṃ sumahadduṣkaraṃ tapaḥ //
brāhmaṇyaṃ tena naivāptaṃ vailakṣyaṃ paramaṃ gataḥ

tataḥ kailāsamāsādya devadevaṃ maheśvaram //
samyagārādhayāmāsa gaurīyuktaṃ maheśvaram

ahaṃ tapaḥ kariṣyāmi brāhmaṇyasya kṛte prabho //
tvadīye parvataśreṣṭhe kailāse śaraṇaṃ gataḥ

tasmādvighnasya me rakṣāṃ devadevaḥ prayacchatu //
yathā no nāśamāyāti tapaḥ sarvaṃ kṛtaṃ mahat

// śrībhagavānuvāca // //
śuddhyarthaṃ caiva yatkāryaṃ kāryesminnṛpasattama //
vināyakasamudbhūtāṃ tattvaṃ pūjāṃ samācara

yena te jāyate siddhiḥ samyagbrāhmaṇyasaṃbhavā

//
// viśvāmitra uvāca // //
tadvadasva suraśreṣṭha tathā tasya karomyaham //
pūrvaṃ pūjāṃ gaṇeśasya sarvavighnapraśāntaye

// śrībhagavānuvāca // //
eṣa gauryā purā kṛtvā nijāṃgodvartanaṃ kṛtaḥ //
nirmalena kṛtaḥ paścānnarākāraścaturbhujaḥ

krīḍārthaṃ mama putro'yaṃ bālabhāvaḥ prakalpitaḥ //
gajavaktro mahākāyo laṃbodaralaghūrukaḥ // ४- //
tato'hamanayā proktaḥ sajīvaḥ kriyatāmayam //
putrako me yathā bhāvī loke pūjya tamo vibho

tato mayāpi saṃspṛṣṭaḥ sṛṣṭisūktena pārthiva //
jīvasūktena samyaksa prāṇavānsamajāyata

tato mayā prahṛṣṭena proktā devī himādrijā //
caturthīdivase prāpte mayā'dyāyaṃ vinirmitaḥ

putrastava mahābhāge jīvasūktaprabhāvataḥ //
eṣa sarvāgaṇānāṃ ca madīyānāṃ sureśvari //
bhaviṣyati sadā'dhyakṣa stasmācca gaṇanāyakaḥ

paṭhyamānena yaścainaṃ jīvasūktena sundari //
pūjayiṣyati sadbhaktyā caturthīdivase śubhe

tasya sarveṣu kṛtyeṣu sarvavighrāni kṛtsnaśaḥ //
prayāsyaṃti kṣayaṃ devi tamaḥ sūryodaye yathā

namo laṃbodarāyeti namo gaṇavibho tathā //
kuṭhāradhāriṇe nityaṃ tathā vāksaṃgatāya ca

namo modakabhakṣāya namo dantaikadhāriṇe

ebhirmantraiḥ samabhyarcya paścānmoda kajaṃśubham //
naivedyaṃ ca pradātavyaṃ tataścārghyaṃ nivedayet // ५७ [/
ahaṃ karma kariṣyāmi yatkicicchaṃbhusaṃbhavam //
avighnaṃ tatra kartavyaṃ sarvadaiva tvayā vibho

tatastu brāhmaṇānāṃ ca bhojanaṃ modakodbhavam //
yathāśaktyā pradātavyaṃ vittaśāṭhyaṃ vivarjayet

evamuktaṃ mayā pūrvaṃ svayameva nṛpottama //
gaṇanāthaṃ samuddiśya gauryāḥ purata eva ca

tataḥ prahṛṣṭā sā devī vākyametaduvāca ha //
adyaprabhṛti yaḥ putraṃ madīyaṃ gaṇanāya kam

anena vidhinā samyakcaturthyāṃ pūjayiṣyati //
tasya vighnāni sarvāṇi nāśaṃ yāsyaṃtyasaṃśayam

smṛtvā vā pūjayitvā vā yaḥ kāryāṇi kariṣyati //
bhaviṣyaṃti na saṃdehastatosyāvicalāni ca

na sandehastato'sya śrīracalaiva bhaviṣyati

// śrībhagavānuvāca // //
tasmāttvaṃ hi mahābhāga caturthyāṃ samyagācara //
vināyakodbhavāṃ pūjāṃ yenābhīṣṭena yujyase

// mārkaṇḍeya uvāca // //
tasya tadvacanaṃ śrutvā viśvāmitro mahīpatiḥ //
gaṇanāthasamudbhūtāṃ pūjāṃ kṛtvā yathocitām

tapaścacāra vipulaṃ sarvavighnavivarjitam //
brāhmaṇyaṃ ca tataḥ prāptaṃ sarveṣāmapi durlabham o/ ६७ //
tasmāttvaṃ hi mahābhāga vināyakasamudbhavām //
pūjāṃ kuru caturthyāṃ ca saṃprāptāyāṃ viśeṣataḥ //
saṃprāpnoṣi mahābhogānhṛdisthānnātra saṃśayaḥ

yo yaṃ kāmamabhidhyāya gaṇanāthaṃ prapūjayet //
sa taṃ sarvamavāpnoti maheśvaravaco yathā

aputro labhate putraṃ dhanahīno mahaddhanam //
śatrūñjayati saṃgrāme smṛtvā taṃ gaṇanāyakam

yā nārī patinā tyaktā durbhagā ca virūpitā //
sā saubhāgyamavāpnoti gaṇanāthasya pūjayā

ya idaṃ paṭhate nityaṃ śṛṇuyādvā samāhitaḥ //
na vighnaṃ jāyate tasya sarvakṛtyeṣu sarvadā

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viśvāmitropākhyānaprasaṃgena gaṇapatipūjāvidhimāhātmyavarṇanaṃnāma caturdaśottaradviśatatamo'dhyāyaḥ