Skanda Purana · Chapter 6.211

// viśvāmitra uvāca // //
rājño dāridryadoṣasya kuṣṭhavyādheśca kāraṇam //
kathayitvā punaḥ prāha nārado munisattamaḥ

// nārada uvāca // //
etatte sarvamākhyātaṃ rājankuṣṭhasya kāraṇam //
dāridryasya ca yatsamyagjñātvā divyena cakṣuṣā

adhunā saṃpravakṣyāmi yathā tava parābhavaḥ //
śatrubhyaḥ saṃprajāto'tra dvijānāmapamānataḥ

ānartādhipatiryo'tra kaścidrājye'bhiṣicyate //
sa pūrvaṃ gacchati grāmaṃ nāgarāṇāṃ prabhaktitaḥ

tvayā tatkalpitaṃ rājannaiva dattaṃ pramādataḥ //
parābhūtā dvijāste ca yācamānā muhurmuhuḥ

tathā kopavaśādyāni śāsanāni dvijanmanām //
lopitāni tvayānyāni pitṛpaitāmahāni ca

tena te'tra parābhūtiḥ saṃjātā śatrusaṃbhavā //
evaṃ jñātvā dvijedrāṇāṃ śāsa nāni prayaccha bhoḥ

gṛhītāni ca yānyeva teṣāṃ mokṣaṃ samācara //
tacchrutvā pārthivaḥ so'tha śaṃkhatīrthe prabhaktitaḥ

snātvā viprānsamā hūya madhyagena samanvitān //
śaṃkhādityasya purataḥ prakṣālya caraṇau nṛpa

dadau ca śāsanaśataṃ prakṣālya caraṇāṃstataḥ //
ṣaḍviṃśatyadhikaṃ rājā nāgarāṇāṃ mahātmanām

etasminnaṃtare tatra śatravo ye ca saṃsthitāḥ //
sarve mṛtyuṃ samāpannā brāhmaṇānāṃ prasādataḥ

viśvāmitra uvāca // //
etatte sarvamākhyātaṃ śaṃkhatīrthasamudbhavam //
prabhāvaṃ pārthivaśreṣṭha kiṃ bhūyaḥ śrotumicchasi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śaṃkhatīrthamāhātmyavarṇanaṃnāmaikādaśottaradviśatatamo'dhyāyaḥ