Skanda Purana · Chapter 6.205

// viṣṇuruvāca // //
evaṃ jñātvā sahasrākṣa mama vākyaṃ samācara //
yadi te vallabhāste ca ye hatā raṇamūrdhani

yudhyamānāstavāgre ca gayāśrāddhena tarpaya //
tānsarvānpretabhāvācca yena muktiṃ bhajaṃti te

palāyanaparā ye ca pṛṣṭhadeśe hatā mṛtāḥ

// indra uvāca // //
varṣevarṣe tadā śrāddhaṃ prakaroti pitāmahaḥ //
gayāṃ gatvā dine tasminpitṝṇāṃ divyarūpiṇām

tatkathaṃ deva gacchāmi tatrāhaṃ śrāddhasiddhaye //
tasmātkathaya me teṣāṃ kiṃcicchrāddhāya bhūtale //
muktidaṃ yena gacchāmi tava vākyājjanārdana

// viśvāmitra uvāca // //
tataḥ sa suciraṃ dhyātvā tamuvāca janārdanaḥ //
asti tīrthaṃ mahatpuṇyaṃ tasmādapyadhikaṃ ca yat

hāṭakeśvaraje kṣetre kūpikāmadhyasaṃsthitam //
amāvāsyādine tatra caturdaśyāśca devapa //
gayā saṃkramate samyaksarvatīrthasamanvitā

kanyāsaṃsthe ravau tatra yaḥ śrāddhaṃ kurute naraḥ //
aṣṭavaṃśodbhavairvipraiḥ sa pitṝṃstārayennijān

api pretatvamāpannānkiṃ punaḥ svargasaṃsthitān //
tatkṣetraprabhavā viprā aṣṭavaṃśasamudbhavāḥ

tapa ugraṃ samāsthāya vartaṃte himaparvate //
ānartādhipaterdānādbhītāstatra samāgatāḥ

tāngṛhītvā drutaṃ gaccha tatra saṃbodhya gauravāt //
sāmapūrvairupāyaistaisteṣāmagre samācara

śrāddhaṃ caiva yathānyāyaṃ tataḥ prāpsyasi vāṃchitam //
te cā'pi sukhinaḥ sarve bhaviṣyaṃti samāgatāḥ

tvayā saha prapūjyāśca hyasmābhiḥ śrāddhakāraṇāt //
tacchrutvā sahasā śakraḥ santoṣaṃ paramaṃ gataḥ

himavaṃtaṃ samuddiśya prasthitastvarayā'nvitaḥ //
vāsudevo'pi rājeṃdra kṣīrābdhimagamattadā

himavantaṃ samāśritya śakro'pi dadṛśe dvijān //
aṣṭavaṃśasamudbhūtānviṣṇunā samudāhṛtān

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śakraviṣṇusaṃvāde gayāśrāddhaphalamāhātmya varṇanaṃnāma pañcottaraśatatamo'dhyāyaḥ