સ્કંદ પુરાણ · અધ્યાય 6.205

॥ વિષ્ણુરુવાચ ॥ ॥
એવં જ્ઞાત્વા સહસ્રાક્ષ મમ વાક્યં સમાચર ॥
યદિ તે વલ્લભાસ્તે ચ યે હતા રણમૂર્ધનિ

યુધ્યમાનાસ્તવાગ્રે ચ ગયાશ્રાદ્ધેન તર્પય ॥
તાન્સર્વાન્પ્રેતભાવાચ્ચ યેન મુક્તિં ભજંતિ તે

પલાયનપરા યે ચ પૃષ્ઠદેશે હતા મૃતાઃ

॥ ઇન્દ્ર ઉવાચ ॥ ॥
વર્ષેવર્ષે તદા શ્રાદ્ધં પ્રકરોતિ પિતામહઃ ॥
ગયાં ગત્વા દિને તસ્મિન્પિતૄણાં દિવ્યરૂપિણામ્

તત્કથં દેવ ગચ્છામિ તત્રાહં શ્રાદ્ધસિદ્ધયે ॥
તસ્માત્કથય મે તેષાં કિંચિચ્છ્રાદ્ધાય ભૂતલે ॥
મુક્તિદં યેન ગચ્છામિ તવ વાક્યાજ્જનાર્દન

॥ વિશ્વામિત્ર ઉવાચ ॥ ॥
તતઃ સ સુચિરં ધ્યાત્વા તમુવાચ જનાર્દનઃ ॥
અસ્તિ તીર્થં મહત્પુણ્યં તસ્માદપ્યધિકં ચ યત્

હાટકેશ્વરજે ક્ષેત્રે કૂપિકામધ્યસંસ્થિતમ્ ॥
અમાવાસ્યાદિને તત્ર ચતુર્દશ્યાશ્ચ દેવપ ॥
ગયા સંક્રમતે સમ્યક્સર્વતીર્થસમન્વિતા

કન્યાસંસ્થે રવૌ તત્ર યઃ શ્રાદ્ધં કુરુતે નરઃ ॥
અષ્ટવંશોદ્ભવૈર્વિપ્રૈઃ સ પિતૄંસ્તારયેન્નિજાન્

અપિ પ્રેતત્વમાપન્નાન્કિં પુનઃ સ્વર્ગસંસ્થિતાન્ ॥
તત્ક્ષેત્રપ્રભવા વિપ્રા અષ્ટવંશસમુદ્ભવાઃ

તપ ઉગ્રં સમાસ્થાય વર્તંતે હિમપર્વતે ॥
આનર્તાધિપતેર્દાનાદ્ભીતાસ્તત્ર સમાગતાઃ

તાન્ગૃહીત્વા દ્રુતં ગચ્છ તત્ર સંબોધ્ય ગૌરવાત્ ॥
સામપૂર્વૈરુપાયૈસ્તૈસ્તેષામગ્રે સમાચર

શ્રાદ્ધં ચૈવ યથાન્યાયં તતઃ પ્રાપ્સ્યસિ વાંછિતમ્ ॥
તે ચાઽપિ સુખિનઃ સર્વે ભવિષ્યંતિ સમાગતાઃ

ત્વયા સહ પ્રપૂજ્યાશ્ચ હ્યસ્માભિઃ શ્રાદ્ધકારણાત્ ॥
તચ્છ્રુત્વા સહસા શક્રઃ સન્તોષં પરમં ગતઃ

હિમવંતં સમુદ્દિશ્ય પ્રસ્થિતસ્ત્વરયાઽન્વિતઃ ॥
વાસુદેવોઽપિ રાજેંદ્ર ક્ષીરાબ્ધિમગમત્તદા

હિમવન્તં સમાશ્રિત્ય શક્રોઽપિ દદૃશે દ્વિજાન્ ॥
અષ્ટવંશસમુદ્ભૂતાન્વિષ્ણુના સમુદાહૃતાન્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે શક્રવિષ્ણુસંવાદે ગયાશ્રાદ્ધફલમાહાત્મ્ય વર્ણનંનામ પઞ્ચોત્તરશતતમોઽધ્યાયઃ