Skanda Purana · Chapter 6.202

// viśvāmitra uvāca // //
tacchrutvā brāhmaṇāḥ sarve vinayāvanatāḥ sthitāḥ //
taṃ papracchurnaraśreṣṭha kautukāviṣṭacetasaḥ

kasyacinnirṇayo deyo madhyasthasya dvijottamaiḥ //
vedavākyena saṃtyajya vākyaṃ manujasaṃbhavam o/ २ //
kasmāttālatrayaṃ deyaṃ madhyagena mahātmanā //
etannaḥ sarvamācakṣva paraṃ kautūhalaṃ hi naḥ

tacchrutvā bhartṛyajñastu tānuvāca dvijottamān //
śrūyatāmabhidhāsyāmi yadetatkāraṇaṃ sthitam

nāsatyaṃ jāyate vākyaṃ nāgarāṇāṃ kathaṃcana //
brahmaśālāsthitānāṃ ca śubhaṃ vā yadi vā'śubham

vedokteḥ savanaistasmāddarśayaṃti dvijottamāḥ //
iṣṭaṃ vā yadi vāniṣṭaṃ pṛcchamānasya cā rthinaḥ

bhūyobhūyastataḥ kuryānmadhyasthaḥ sa dvijanmanām //
praśnaṃ tasya nimittaṃ ca yāvattasya vinirṇayaḥ

brahmaśālopaviṣṭānāṃ yadi vākyaṃ vṛthā bhavet //
māhātmyaṃ naśyate teṣāṃ tataḥ krodhaḥ prajāyate

krodhātsañjāyate droho drohātpāpasya saṃgamaḥ //
etasmātkāraṇādviprā madhyasthaḥ pṛcchyate muhuḥ

samudāyaḥ samastānāṃ yathā caiva prajāyate //
tadā tālatrayaṃ yacca madhyasthaḥ saṃprayacchati

tāsāṃ tu pūrvayā kāmaṃ haṃti pṛcchāpradāyinām //
dvitīyayā tathā krodhaṃ haṃti lobhaṃ tṛtīyayā

etasmātkāraṇāddeyaṃ tena tālatrayaṃ dvijāḥ

//
// brāhmaṇā ūcuḥ // //
ātharvaṇaścaturthastu brāhmaṇaḥ parikīrtitaḥ //
sa kasmātprathamaḥ praśno nāgarāṇāṃ prakīrtitaḥ

// bhartṛyajña uvāca // //
ātharvaḥ prathamaḥ praśno yasmātprokto mayā dvijāḥ //
tadahaṃ saṃpravakṣyāmi śṛṇudhvaṃ susamāhitāḥ

nerṣyā caivātra kartavyā svasthānasya vināśanī //
nirūpitaṃ mayā samyaksthānasthasya viśuddhaye

ṛgyajuḥsāmasaṃjñākhyā agniṣṭomādikā makhāḥ //
pāratrikāḥ pravartaṃte naihikāścābhicārikāḥ

atharvavede taccoktaṃ sarvaṃ caivābhicārikam //
hitāya sarvalokānāṃ brahmaṇā lokakāriṇā

atharvavedaḥ prathamaṃ draṣṭavyaḥ kāryasiddhaye //
etasmātkāraṇādādyaḥ sa caturtho'pi saṃsthitaḥ

etadvaḥ sarvamākhyātaṃ yatpṛṣṭo'smi dvijottamāḥ //
pṛcchā saṃbaṃdhajaṃ sarvamekaṃ kāryaṃ sadaiva hi

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye bhartṛyajñavākyanirṇayavarṇanaṃnāma dvyuttaradviśatatamo'dhyāyaḥ