Skanda Purana · Chapter 6.201

// viśvāmitra uvāca // //
atha te brāhmaṇāḥ sarve bhartṛyajñaṃ mahāmatim //
kṛtāṃjalipuṭā bhūtvā stutiṃ kṛtvā vaco'bruvan

yadetadbhavatā proktaṃ śodhito yo bhaveddvijaḥ //
śrāddhasya kanyakāyāśca somapānasya so'rhati

kathaṃ śuddhiḥ prakartavyā tasya sarvaṃ bravīhi naḥ //
nāgarasya samastasya deśāṃtaragatasya ca

deśāṃtaraprajātasya tatra jātasya vā punaḥ //
ajñātapitṛvargasya sāmā nyaṃ padamicchataḥ

etannaḥ sarvamācakṣva vistareṇa mahāmate

// viśvāmitra uvāca // //
teṣāṃ tadvacanaṃ śrutvā brāhmaṇānāṃ nṛpottama //
abravīdbhartṛyajñastu svābhiprāyaṃ susaṃmatam

// bhartṛyajña uvāca // //
praśnabhāro mahāneṣa bhavadbhiḥ samudāhṛtaḥ //
tathāpi kathayiṣyāmi namaskṛtya svayaṃbhuvam

ajñātapitṛvaṃśo yo dūrādapi samāgataḥ //
sāmānyaṃ vāṃchate padyaṃ nāgaro'smīti kīrtayan

tasya śuddhiḥ pradā tavyā mukhyaiḥ śāṃtaiḥ śubhairdvijaiḥ //
gartātīrthodbhavaṃ vipraṃ kṛtvā caiva puraḥsaram

viśuddhiṃ yācamānasya yadi yacchaṃti no dvijāḥ //
kāmādvā yadi vā krodhātpradveṣādvā cyuterbhayāt

brahmahatyodbhavaṃ pāpaṃ sarveṣāṃ tatra jāyate //
tasmādabhyāgato yastu dūrādapi viśeṣataḥ

tasya śuddhiḥ pradātavyā prayatnena dvijottamaiḥ //
śuddhiṃ tu trividhāṃ prāpto mama vākyasamudbhavām

sa śuddho nāgaro jñeyo jāto deśāṃtareṣvapi //
pūrvaṃ viśodhayedvaṃśaṃ tato mātṛkulaṃ smṛtam

tataḥ śīlaṃ tribhiḥ śuddhaḥ sāmānyaṃ padamarhati

sarveṣāmapi viprāṇāṃ varṣāṃte samupasthite //
śuddhiḥ kāryā prayatnena svasthānasya viśuddhaye

tadarthaṃ śaradaścāṃte śubharttau brāhmaṇottamāḥ //
cātuścaraṇasaṃpannāḥ saṃsthāpyāḥ ṣoḍaśaiva tu

brāhmaṇāḥ purataḥ sarve śāṃtā dāṃtā jiteṃdriyāḥ //
garttātīrthodbhavaṃ vipraṃ teṣāṃ madhye niveśayet

tadagre pīṭhikā deyāścatasro lakṣaṇānvitāḥ //
yāvatkārttikaparyaṃtaṃ cātuścaraṇakalpitāḥ

prathamā bahvṛcasyārthe yājuṣasya tathā'parā //
sāmagasya tathaivānyā tathā''dyasya caturthikā //

mudrikārthaṃ tathaivānyā paṃcamī parikīrtitā //
śrīsūktaṃ pāvamānaṃ ca śākunaṃ viṣṇudaivatam

pārāvataṃ tathā sūktaṃ jīvasūktena saṃyutam//
bahvṛcaḥ kīrtayettatra śāṃtikaṃ ca tathāparam

śāṃtikaṃ śivasaṃkalpamṛṣikalpaṃ caturvidham //
maṃḍalaṃbrāhmaṇaṃ caiva gāyatrībrāhmaṇaṃ tathā

tathā puruṣasūktaṃ ca madhubrāhmaṇameva ca //
adhvaryuḥ kīrtayettatra rudrānpaṃcāṃgasaṃyutān

devavrataṃ ca gāyatraṃ somasūryavrate tathā //
ekaviṃśatiparyaṃtaṃ tathānyacca rathaṃtaram

sauvrataṃ saṃhitā viṣṇorjyeṣṭhasāma tathaiva ca //
sāmavedoktarudrāṃśca bhāruṃḍaiḥ sāmabhiryutān

chaṃdogaḥ kīrtayettatra yaccānyacchāṃtikaṃ bhavet //
garbhopaniṣadaṃ caiva skaṃdasūktaṃ tathāparam

nīlarudraiḥ samopetānprāṇarudrāṃstathāparān //
navarudrāṃśca kṣurikānādyastatra prakīrtayet

tataḥ puṇyāhaghoṣeṇa gītavāditranisvanaiḥ //
śuklamālyāṃbaradharaḥ śuklacaṃdanacarcitaḥ २८ //
śuddhikāmo vrajettatra yatra te brāhmaṇāḥ sthitāḥ //
praṇamya śirasā teṣāṃ tatovācyastu madhyagaḥ

madarthaṃ prārthaya tvaṃ hi sarvānetāndvijottamān //
yataḥ śuddhiṃ prayacchaṃti prasādaṃ kartumarhasi

tatastu prārthayedviprāṃstadarthaṃ ca viśuddhaye //
gartātīrthodbhavo vipro vinayāvanataḥ sthitaḥ

gocarmaṇi samālagnaḥ śuddhikāmasya tasya ca //
praṣṭavyāstu tatastena sarva eva dvijottamāḥ

eṣa śuddhikṛte prāptaḥ sudūrānnāgaro dvijaḥ //
asya śuddhiḥ pradātavyā yuṣmākaṃ rocate yadi

atha tairvedasūktena niṣedho vā pravartanam //
vaktavyaṃ vacasā naiva mama vākyamidaṃ sthitam

tataśca bahulāndṛṣṭvā ṛgadhvaryūṃstataḥ param //
chādogyāṃśca tathādyāṃśca krameṇa tu dvijottamāḥ

yadi teṣāṃ manastuṣṭirjāyate dvijasattamāḥ //
tataḥ sūktāni vākyāni saumyāni suśubhāni ca //
vāruṇāni tathaiṃdrāṇi māṃgalyaprabhavāṇi ca

śreṣṭhāni maṃtraliṃgāni vṛddhituṣṭikarāṇi ca //
yadi no mānasī tuṣṭi steṣāṃ caiva prajāyate

tadā raudrāṇi yāmyāni nairṛtyāni viśeṣataḥ //
āgneyāni tvaniṣṭāni tathā nāśakarāṇi ca

atha ye tatra mūrkhāḥ syurna vedapaṭhane ratāḥ //
puṣpadānaṃ tu vaktavyaṃ taiḥ saṃtuṣṭairdvijottamaiḥ

sītkāraḥ kupitaiḥ kāryaḥ saṃtoṣeṇa vivarjitaiḥ //
evaṃ sarveṣu kṛtyeṣu na ca kāryo vinirṇayaḥ

prākṛtairvacanaiścaiva yathā kurvaṃti mānavāḥ //
tathaiva nirṇayasyāṃte madhyagena vipaścitā

deyaṃ tālatrayaṃ samyaksarveṣāṃ nirṇayodbhave

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye nāgara praśnanirṇayavarṇanaṃnāmaikottaradviśatatamo'dhyāyaḥ