Skanda Purana · Chapter 6.194

// sūta uvāca // //
evaṃ sā tānvarāndattvā sarveṣāṃ śāpabhāginām //
maunavrataparā bhūtvā niviṣṭā'tha dharātale

tato devagaṇāḥ sarve tāpasāśca maharṣayaḥ //
sādhusādhviti tāṃ procya tataḥ procuridaṃ vacaḥ

etāṃ devīprasādena brāhmaṇānāṃ viśeṣataḥ //
pūjayiṣyaṃti martye'tra sarve lokāḥ samāhitāḥ

brahmāṇaṃ pūjayitvā tu paścādenāṃ sureśvarīm //
pūjayiṣyaṃti ye martyāste tu yāṃti parāṃ gatim

yā kanyā patisaṃyogaṃ saṃprāpyātra samāhitā //
tataḥ pādapraṇāmaṃ ca gāyatryāśca kariṣyati //
patiṃ prajāpatiṃ prāpya sā bhaviṣyatyasaṃśayam

sarvakāmasukhopetā dhanadhānyasamanvitā //
yā nārī durbhagā vaṃdhyā bhaviṣyati ca śobhanā

// ṛṣaya ūcuḥ // //
yadetadbhavatā proktaṃ gate paṃcottare śate //
padmajānāṃ haraḥ prādādetatkathamanutta mam

brāhmaṇebhyaḥ sa saṃtuṣṭaḥ kiṃvā'nyo'sti maheśvaraḥ //
etaṃ naḥ saṃśayaṃ bhūyo yathāvadvaktumarhasi

āyuṣyaṃ śaṃkarasyāpi yatpramāṇaṃ tathā hareḥ //
brahmaṇo'pi samācakṣva paraṃ kautūhalaṃ hi naḥ

// sūta uvāca // //
ahaṃ vaḥ kīrtayiṣyāmi vistareṇa dvijottamāḥ //
trayāṇāmapi cāyuṣyaṃ yatpramāṇaṃ vyavasthitam

nimeṣasya caturbhāgastruṭiḥ syāttaddvayaṃ lavaḥ //
lavadvayaṃ kalā proktā kāṣṭhā tu daśapaṃcabhiḥ

triṃśatkāṣṭhāṃ kalāmāhuḥ kṣaṇastriṃśatkalo mataḥ //
muhūrtamānaṃ mauhūrtā vadaṃti dvādaśakṣaṇam

triṃśanmuhūrtamuddiṣṭamahorātraṃ manīṣibhiḥ //
māsastriṃśadahorātrairdvau māsāvṛtusaṃjñitaḥ

ṛtutrayaṃ cāyanaṃ ca ayane dve tu vatsaram //
daivikaṃ ca bhavettacca hyahorātraṃ dvijottamāḥ

uttaraṃ cāyanaṃ tatra dinaṃ rātristathā'param//
lakṣaiḥ saptadaśākhyaistu manuṣyāṇāṃ ca vatsaraiḥ

aṣṭāviṃśatibhiścaiva sahasraistu tathā paraiḥ //
ādyaṃ kṛtayugaṃ caiva tadbha viṣyati saddvijāḥ

tato dvādaśabhirlakṣaiḥ ṣoḍaśānāṃ sahasrakaiḥ //
tretāyugaṃ samādiṣṭaṃ dvitīyaṃ dvijasattamāḥ

dvāparaṃ cāṣṭabhirlakṣaistṛ tīyaṃ parikīrtitam //
catuḥṣaṣṭisahasraistu yathāvatparisaṃkhyayā

caturlakṣaṃ samādiṣṭaṃ yugaṃ kalisamudbhavam //
dvātriṃśatā sahasraistu caturthaṃ tadvidurbudhāḥ

caturyugasahasreṇa dinaṃ paitāmahaṃ bhavet //
teṣāṃ triṃśaddinairmāso māsairdvādaśabhirvatsaro bhavet

/
brahmā teṣāṃ śataṃ yāvatsa jīvati pitāmahaḥ //
sāṃprataṃ cāṣṭavarṣīyaḥ ṣaṇmāsaścaiva saṃsthitaḥ

pratipaddivasasyāsya prathamasya tathā gatam //
yāmadvayaṃ śukravāre vartamāne mahātmanaḥ //

brahmaṇo varṣamātreṇa dinaṃ vaiṣṇavamucyate

sopi varṣaśataṃyāvadātmamānena jīvati //
paṃcapacāśadādiṣṭāstasya jātasya vatsarāḥ

tithayaḥ paṃca yāmārddhaṃ somavāreṇa saṃgatam //
vaiṣṇavena tu varṣeṇa dinaṃ māheśvaraṃ bhavet

śivo varṣaśataṃ yāvattena rūpeṇa ca sthitaḥ //
yāvaducchvasitaṃ vaktraṃ sadāśivasamudbhavam

paścācchaktiṃ samabhyeti yāvanniśvasitaṃ bhavet //
niśvāsocchvasitānāṃ ca sarveṣāmeva dehinām

brahmaviṣṇuśivānāṃ ca gandharvoragarakṣasām //
ekaviṃśatsahasrāṇi śataiḥ ṣaḍbhiḥ śatāni ca

ahorātreṇa coktāni pramāṇe dvija sattamāḥ //
ṣaḍbhirucchvāsaniśvāsaiḥ palamekaṃ pravartate

nāḍī ṣaṣṭipalā proktā tāsāṃ ṣaṣṭyā dinaṃ niśā //
niśvāsocchvasitānāṃ ca parisaṃkhyā na vidyate //
sadāśivasamutthānāmetasmātso'kṣayaḥ smṛtaḥ

anye'pi ye pragacchaṃti brahmajñānasamanvitāḥ //
akṣayāste'pi jāyaṃte satyametanmayoditam

// ṛṣaya ūcuḥ // //
yadyevaṃ sūtaputrātra brahmaviṣṇumaheśvarāḥ //
ātmavarṣaśate pūrṇe yāṃti nāśamasaṃśayam //

tatkathaṃ mānuṣāṇāṃ ca martyalokelpajīvinām //
kathayaṃti ca ye muktiṃ vidvāṃsaścaiva sūtaja

nūnaṃ teṣāṃ mṛṣā vādo mokṣamārgasamu dbhavaḥ

// sūta uvāca // //
anādinidhanaḥ kālaḥ saṃkhyayā parivarjitaḥ //
asaṃkhyātā gatā mokṣaṃ brahmaviṣṇumaheśvarāḥ

nije varṣaśate pūrṇe vālukāreṇavo yathā //
nijamānena yā śraddhā brahmajñānasamudbhavā //
teṣāṃ cenmānuṣāṇāṃ ca tanmuktiḥ syādasaṃśayam

yathaite daṃśamaśakā mānuṣāṇāṃ ca kīṭakāḥ //
jāyaṃte ca mriyaṃte ca gaṇyaṃte naiva kutracit //
indrādīnāṃ tathā martyāḥ saṃbhāvyā jagatītale

devānāṃ ca yathā martyāḥ kīṭasthāne ca saṃsthitāḥ //
tathā devā api jñeyā brahmaṇo'vyaktajanmanaḥ

brahmaṇastu yathā devāḥ kīṭasthāne vyavasthitāḥ //
tathā brahmāpi viṣṇośca kīṭasthāne vyavasthitaḥ

pitāmaho yathā viṣṇoḥ kīṭasthāne vyavasthitaḥ //
tathā sa śivaśaktibhyāṃ parijñeyo dvijottamāḥ

yathā viṣṇuḥ kṛmirjñeyastābhyāmeva dvijottamāḥ //
sadāśivasya vijñeyau tathā tau kṛmirūpakau

evaṃ ca vividhairyajñaiḥ śraddhā pūtena cetasā //
brahmajñānātparaṃ yāṃti sadāśivasamudbhavam

agniṣṭomādibhiryajñaiḥ kṛtaiḥ saṃpūrṇadakṣiṇaiḥ //
tadarthaṃ te divaṃ yāṃti bhuktvā bhogānpṛthagvidhān

kṣaye ca punarāyāṃti sukṛtasya mahītale //
brahmajñānātparaṃ prāpya punarjanma na vidyate

tasmātsarvaprayatnena tatrābhyāsaṃ samā caret //
janmabhirbahubhiḥ paścācchanairmuktimavāpnuyāt

ekajanmani saṃprāpto leśo jñānasya tasya ca //
dvitīye dviguṇastasya tṛtīye trigu ṇo bhavet

ekottaro bhavedevaṃ sadā janmanijanmani

// ṛṣaya ūcuḥ // //
brahmajñānasya saṃprāptirmartyānāṃ jāyate katham //
etannaḥ sarvamācakṣva yadi tvaṃ vetsi sūtaja

// sūta uvāca // //
kā śaktirmama vaktavye jñāne martyasamudbhave //
svayameva na yo vetti sa parasya vadetkatham

upadeśaḥ paraṃ yo me pitrā datto dvijottamāḥ //
tamahaṃ vaḥ pravakṣyāmi brahmajñānasamudbhavam

hāṭakeśvaraje kṣetre hyasti tīrthadvayaṃ śubham //
kumārikābhyāṃ vihitaṃ brahmajñānapradaṃ nṛṇām

brāhmaṇyā caiva śūdryā ca kumārībhyāṃ vinirmitam //
aṣṭamyāṃ ca caturdaśyāṃ yastābhyāṃ snānamācaret

paścātpūjayate bhakttyā prasiddhe siddhipāduke //
sugupte gartamadhyasthe kumāryā paripūjite

tasya saṃvatsarasyānte brahmajñānaṃ prajāyate //
śaktyā vinihite te ca svadarśanavivṛddhaye

lokānāṃ muktikāmānāṃ brahmajñānasukhāvahe //
mama tāto gatastatra tataśca jñānavānsthitaḥ

tasyādeśādahaṃ tatra gataḥ saṃvatsaraṃ sthitaḥ //
pāduke pūjayāmāsa tato jñānaṃ ca saṃsthitam

yatkiñcidvā śrutaṃ loke purāṇāgryaṃ vyavasthitam //
vartamānaṃ bhaviṣyacca tadahaṃ vedmi bho dvijāḥ

tatprasādādasaṃdigdhaṃ pramāṇaṃ cātra saṃsthitam //
muktvaikaṃ vedapaṭhanaṃ sūtatvaṃ ca yato mayi

tasyāpi vedmi sarvārthaṃ bhartṛyajño yathā muniḥ //
asmādatraiva gacchadhvaṃ yadi mukteḥ prayojanam //

kimetaiḥ svargadaiḥ satraiḥ punarāvṛttikārakaiḥ //
ārādhayadhvaṃ te gatvā pāduke siddhide nṛṇām //
yena saṃvatsarasyānte brahmajñānaṃ prajāyate //

// ṛṣaya ūcuḥ // //
sādhusādhu mahābhāga hyupadeśaḥ kṛto mahān //
tena saṃtāritāḥ sarve vayaṃ saṃsārasāgarāt

yāsyāmo'pi vayaṃ tatra satre dvādaśavārṣike //
samāpte'sminna saṃdehaḥ sarve ca kṛtaniścayāḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye brahmajñānaprāptyarthaṃ kumārikātīrthadvayagartakṣetrasthapādukāmāhātmyavarṇanaṃnāma caturṇavatyuttaraśatatamo'dhyāyaḥ //