Skanda Purana · Chapter 6.193

// ṛṣaya ūcuḥ // //
evaṃ gatāyāṃ sāvitryāṃ sakopāyāṃ ca sūtaja //
kiṃ kṛtaṃ tatra gāyatryā brahmādyaiścāpi kiṃ suraiḥ

etatsarvaṃ samācakṣva paraṃ kautūhalaṃ hi naḥ //
kathaṃ śāpānvitā devāḥ saṃsthitāstatra maṇḍape

// sūta uvāca // //
gatāyāmatha sāvitryāṃ śāpaṃ dattvā dvijottamāḥ //
gāyatrī sahasotthāya vākyametadudairayat

sāvitryā yadvacaḥ proktaṃ tanna śakyaṃ kathaṃcana //
anyathā kartumevātha sarvairapi surāsuraiḥ

mahāsatī mahābhāgā sāvitrī sā pativratā //
pūjyā ca sarvadevānāṃ jyeṣṭhā śreṣṭhā ca sadgaṇaiḥ

paraṃ strīṇāṃ svabhāvo'yaṃ sarvāsāṃ surasattamāḥ//
api sahyo vajrapātaḥ sapatnyā na punaḥ kathā

matkṛte ye'tra śapitā sāvitryā brāhmaṇāḥ surāḥ //
teṣāmahaṃ kariṣyāmi śaktyā sādhāraṇāṃ svayam

apūjyo'yaṃ vidhiḥ proktastayā maṃtrapuraḥsaraḥ //
sarveṣāmeva varṇānāṃ viprādīnāṃ suro ttamāḥ

brahmasthāneṣu sarveṣu samaye dharaṇītale //
na brahmaṇā vinā kiṃcitkṛtyaṃ siddhimupaiṣyati

kṛṣṇārcane ca yatpuṇyaṃ yatpuṇyaṃ liṃga pūjane //
tatphalaṃ koṭiguṇitaṃ sadā vai brahmadarśanāt //
bhaviṣyati na sandeho viśeṣātsarvaparvasu

tvaṃ ca viṣṇo tayā prokto martyajanma yadā'psyasi //
tatrāpi parabhṛtyatvaṃ pareṣāṃ te bhaviṣyati

tatkṛtvā rūpadvitayaṃ tatra janma tvamāpsyasi //
yattayā kathito vaṃśo mamāyaṃ gopasaṃjñitaḥ //
tatra tvaṃ pāvanārthāya ciraṃ vṛddhimavāpsyasi

ekaḥ kṛṣṇābhidhānastu dvitīyo'rjunasaṃjñitaḥ //
tasyātmano'rjunākhyasya sārathyaṃ tvaṃ kariṣyasi

tenākṛtye'pi raktāste gopā yāsyaṃti ślāghyatām //
sarveṣāmeva lokānāṃ devānāṃ ca viśeṣataḥ

yatrayatra ca vatsyaṃti madvaṃ śaprabhavānarāḥ //
tatratatra śriyo vāso vane'pi prabhaviṣyati

bhobhoḥ śakra bhavānukto yattayā kopayuktayā //
parājayaṃ ripoḥ prāpya kārā gāre patiṣyati

tanmuktiṃ te svayaṃ brahmā madvākyena kariṣyati

tataḥ praviṣṭaḥ saṃgrāme na parājayamāpsyasi //
tvaṃ vahne sarvabhakṣaśca yatprokto ruṣṭayā tayā

tadamedhyamapi prāyaḥ spṛṣṭaṃ te'rccirbhiragrataḥ //
medhyatāṃ yāsyati kṣipraṃ tataḥ pūjāmavāptyasi

svāhā nāma ca bhāryā yā devānsantarpayiṣyati //
svadhā cā'pi pitṝnsarvānmama vākyādasaṃśayam

/
yadrudra priyayā sārdhaṃ viyogaḥ kathitastayā //
tasyāḥ śreṣṭha tarā cānyā tava bhāryā bhaviṣyati //
gaurīnāmeti vikhyātā himācalasutā śubhā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhenāgarakhaṇḍe hāṭakeśvarakṣetramāhātmye gāyatrīvarapradānonāma trinavatyuttaraśatatamo'dhyāyaḥ