સ્કંદ પુરાણ · અધ્યાય 6.193

॥ ઋષય ઊચુઃ ॥ ॥
એવં ગતાયાં સાવિત્ર્યાં સકોપાયાં ચ સૂતજ ॥
કિં કૃતં તત્ર ગાયત્ર્યા બ્રહ્માદ્યૈશ્ચાપિ કિં સુરૈઃ

એતત્સર્વં સમાચક્ષ્વ પરં કૌતૂહલં હિ નઃ ॥
કથં શાપાન્વિતા દેવાઃ સંસ્થિતાસ્તત્ર મણ્ડપે

॥ સૂત ઉવાચ ॥ ॥
ગતાયામથ સાવિત્ર્યાં શાપં દત્ત્વા દ્વિજોત્તમાઃ ॥
ગાયત્રી સહસોત્થાય વાક્યમેતદુદૈરયત્

સાવિત્ર્યા યદ્વચઃ પ્રોક્તં તન્ન શક્યં કથંચન ॥
અન્યથા કર્તુમેવાથ સર્વૈરપિ સુરાસુરૈઃ

મહાસતી મહાભાગા સાવિત્રી સા પતિવ્રતા ॥
પૂજ્યા ચ સર્વદેવાનાં જ્યેષ્ઠા શ્રેષ્ઠા ચ સદ્ગણૈઃ

પરં સ્ત્રીણાં સ્વભાવોઽયં સર્વાસાં સુરસત્તમાઃ॥
અપિ સહ્યો વજ્રપાતઃ સપત્ન્યા ન પુનઃ કથા

મત્કૃતે યેઽત્ર શપિતા સાવિત્ર્યા બ્રાહ્મણાઃ સુરાઃ ॥
તેષામહં કરિષ્યામિ શક્ત્યા સાધારણાં સ્વયમ્

અપૂજ્યોઽયં વિધિઃ પ્રોક્તસ્તયા મંત્રપુરઃસરઃ ॥
સર્વેષામેવ વર્ણાનાં વિપ્રાદીનાં સુરો ત્તમાઃ

બ્રહ્મસ્થાનેષુ સર્વેષુ સમયે ધરણીતલે ॥
ન બ્રહ્મણા વિના કિંચિત્કૃત્યં સિદ્ધિમુપૈષ્યતિ

કૃષ્ણાર્ચને ચ યત્પુણ્યં યત્પુણ્યં લિંગ પૂજને ॥
તત્ફલં કોટિગુણિતં સદા વૈ બ્રહ્મદર્શનાત્ ॥
ભવિષ્યતિ ન સન્દેહો વિશેષાત્સર્વપર્વસુ

ત્વં ચ વિષ્ણો તયા પ્રોક્તો મર્ત્યજન્મ યદાઽપ્સ્યસિ ॥
તત્રાપિ પરભૃત્યત્વં પરેષાં તે ભવિષ્યતિ

તત્કૃત્વા રૂપદ્વિતયં તત્ર જન્મ ત્વમાપ્સ્યસિ ॥
યત્તયા કથિતો વંશો મમાયં ગોપસંજ્ઞિતઃ ॥
તત્ર ત્વં પાવનાર્થાય ચિરં વૃદ્ધિમવાપ્સ્યસિ

એકઃ કૃષ્ણાભિધાનસ્તુ દ્વિતીયોઽર્જુનસંજ્ઞિતઃ ॥
તસ્યાત્મનોઽર્જુનાખ્યસ્ય સારથ્યં ત્વં કરિષ્યસિ

તેનાકૃત્યેઽપિ રક્તાસ્તે ગોપા યાસ્યંતિ શ્લાઘ્યતામ્ ॥
સર્વેષામેવ લોકાનાં દેવાનાં ચ વિશેષતઃ

યત્રયત્ર ચ વત્સ્યંતિ મદ્વં શપ્રભવાનરાઃ ॥
તત્રતત્ર શ્રિયો વાસો વનેઽપિ પ્રભવિષ્યતિ

ભોભોઃ શક્ર ભવાનુક્તો યત્તયા કોપયુક્તયા ॥
પરાજયં રિપોઃ પ્રાપ્ય કારા ગારે પતિષ્યતિ

તન્મુક્તિં તે સ્વયં બ્રહ્મા મદ્વાક્યેન કરિષ્યતિ

તતઃ પ્રવિષ્ટઃ સંગ્રામે ન પરાજયમાપ્સ્યસિ ॥
ત્વં વહ્ને સર્વભક્ષશ્ચ યત્પ્રોક્તો રુષ્ટયા તયા

તદમેધ્યમપિ પ્રાયઃ સ્પૃષ્ટં તેઽર્ચ્ચિર્ભિરગ્રતઃ ॥
મેધ્યતાં યાસ્યતિ ક્ષિપ્રં તતઃ પૂજામવાપ્ત્યસિ

સ્વાહા નામ ચ ભાર્યા યા દેવાન્સન્તર્પયિષ્યતિ ॥
સ્વધા ચાઽપિ પિતૄન્સર્વાન્મમ વાક્યાદસંશયમ્

।
યદ્રુદ્ર પ્રિયયા સાર્ધં વિયોગઃ કથિતસ્તયા ॥
તસ્યાઃ શ્રેષ્ઠ તરા ચાન્યા તવ ભાર્યા ભવિષ્યતિ ॥
ગૌરીનામેતિ વિખ્યાતા હિમાચલસુતા શુભા

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠેનાગરખણ્ડે હાટકેશ્વરક્ષેત્રમાહાત્મ્યે ગાયત્રીવરપ્રદાનોનામ ત્રિનવત્યુત્તરશતતમોઽધ્યાયઃ