Skanda Purana · Chapter 6.19

// sūta uvāca // //
etasminnaṃtare prāptāstasya bhūpasya sevakāḥ //
kecicca daivayo gena śvāpadairardhabhakṣitāḥ

kṣutpipāsāturā dīnā duḥkhena mahatā'nvitāḥ //
padapaddhatimārgeṇa yena yātaḥ sa bhūpatiḥ

te dṛṣṭvā pārthivaṃ tatra diṣṭyādiṣṭyeti sādaram //
bruvaṃtaḥ pādayostasya patitā harṣasaṃyutāḥ

tatastasya narendrasya vyasanaṃ sainyasaṃbhavam //
procuścaiva yathādṛṣṭama nubhūtaṃ yathāśrutam

atha te tāpasāḥ sarve sa ca rājā sasevakaḥ //
prasuptāḥ pādapasyādhaḥ parṇānyāstīryabhūtale

tatasteṣāṃ prasuptānāṃ sarveṣāṃ tatra kānane //
atikrāṃtā sukhenaiva rajanī sā mahātmanām

tataḥ sa prātarutthāya kṛtapūrvāhṇikakriyaḥ //
taṃ muniṃ praṇipatyoccairanujñāpya muhu rmuhuḥ

nijaistaiḥ sevakaiḥ sārdhaṃ prasthitaḥ svapurīṃ prati //
māhiṣmatīṃ samuddiśya dṛṣṭvā mārge śanaiḥśanaiḥ

tato nijagṛhaṃ prāpya kañci tkālaṃ mahīpatiḥ //
viśramya prayayau paścāttūrṇaṃ puṇyaṃ gayāśiraḥ

tacca kālena saṃprāpya snātvā dhautāṃbaraḥ śuciḥ //
māṃsādāya dadau śrāddhaṃ śraddhāpūtena cetasā

athā'sau pṛthivīpālaḥ svapnāṃte ca dadarśa tam //
divyamālyāṃbaradharaṃ divyagaṃdhānulepanam //
vimānavaramārūḍhaṃ stūyamānaṃ ca kiṃnaraiḥ

// māṃsāda uvāca // //
prasādāttava bhūpāla mukto'haṃ pretayonitaḥ //
svasti te'stu gamiṣyāmi sāṃprataṃ tridivā layam

tataḥ sa prātarutthāya harṣāviṣṭo mahīpatiḥ //
vidaivataṃ samuddiśya cakre śrāddhaṃ yathocitam // १३
so'pi tenaiva rūpeṇa tasya saṃdarśanaṃ gataḥ //
svapnāṃ'te bhūmipālasya tadvaccoktvā divaṃ gataḥ

tataḥ prātastṛtīye'hni kṛtaghnasya mahīpatiḥ //
cakre śrāddhaṃ yathāpūrvaṃ śraddhāpūtena cetasā

tataḥ so'pi samāyātastasya svapne mahīpateḥ //
tenaiva pretarūpeṇa duḥkhena mahatā vṛtaḥ

// kṛtaghna uvāca //
na me gatirmahārāja saṃjātā pāpakarmiṇaḥ //
taḍāgavittacaurasya kṛtaghnasya tathaiva ca

tasmātsaṃjāyate muktiryathā me pārthivottama //
tathaiva tvaṃ kuruṣyā'dya satyavākyaparo bhava

satyameva paraṃ brahma satyameva paraṃ tapaḥ //
satyameva paraṃ jñānaṃ satyameva paraṃ śrutam

satyena vāyu rvahati satyena tapate raviḥ //
sāgaraḥ satyavākyena maryādāṃ na vilaṃghayet

tīrthasevā tapo dānaṃ svādhyāyo gurusevanam //
sarvaṃ satyavihīnasya vyarthaṃ saṃjāyate yataḥ

sarve dharmā dhṛtāḥ pūrvamekatrā'nyatra cāpyṛtam //
tulāyāṃ kautukāddevairjātaṃ tatra ṛtaṃ guru

tasmātsatyaṃ puraskṛtya māṃ tāraya mahāmate //
etatte paramaṃ śreyastapaso'pi bhaviṣyati

// vidūratha uvāca // //
kathaṃ te jāyate muktirvada me preta satvaram //
karomi yena tatkarma yadyapi syātsuduṣkaram ḥ/ २४ //
// preta uvāca // //
camatkārapure bhūpa śrīkṣetre hāṭakeśvare //
āste pāṃsubhirācchannaṃ kalerbhītaṃ gayāśiraḥ

adhastātplakṣavṛkṣasya darbhasthānaiḥ samaṃtataḥ //
kālaśākaistathānekaistilaiścāraṇyasaṃbhavaiḥ //

tatra gatvā tilaistaistvaṃ taiḥ śākaistaiḥ kuśaistathā //
śrāddhaṃ dehi drutaṃ yena muktiḥ saṃjāyate mama

tasya tadvacanaṃ śrutvā sa dīnasya dayānvitaḥ//
jagāma tatra yatrā''ste sa vṛkṣaḥ plakṣasaṃjñakaḥ

dṛṣṭvā śākāṃstilāṃstāṃstu darbhāṃstena yathoditān//
akhanattatra deśe ca jalārthe laghu kūpikām

tataḥ kṛtaghnamuddiśya śrāddhaṃ cakre yathoditam //
ānīya brāhmaṇāñchreṣṭhānvedavedāṃgapāragān // ६.१९.३. //
kṛtamātre tataḥ śrāddhe divya rūpadharaḥ pumān//
vimānavaramārūḍho vidūrathamathā'bravīt

mukto'haṃ tvatprasādācca pretatvāddāruṇādvibho //
svasti te'stu gamiṣyāmi sāṃprataṃ tridaśālayam

// sūta uvāca // //
tataḥ prabhṛti sā tatra kūpikā khyātimāgatā //
pitṝṇāṃ puṣṭidā nityaṃ gayāśīrṣasamudbhavā

pretapakṣasya darśāyāṃ yastasyāṃ śrāddhamācaret //
kālaśākena vipreṃdrāstathāraṇyodbhavaistilaiḥ

kṛṃtitaiśca tathā darbhaiḥ samyakchraddhāsamanvitaḥ /
sa prāpnoti phalaṃ kṛtsnaṃ kṛtaghnapretatīrthataḥ

agniṣvāttāḥ pitṛgaṇāstathā barhiṣadaśca ye //
tatra saṃnihitā nityamājyapāḥ somapāstathā

tasmātsarvaprayatnena śrāddhaṃ tatra samācaret //
kāle vā
yadi vā'kāle pitṝṇāṃ tuṣṭaye sadā

iti śrīskāṃde mahāpurāṇa ekāśītisāhasryāṃ sahitāyāṃ ṣaṣṭhe nāgarakhaṇḍe hāṭakeśvarakṣetramāhātmye māṃsādādipretatrayasya vidūrathakṛtaśrāddhadvārā muktidāne pitṛkūpikātīrthamā hātmyavarṇanaṃnāmaikonaviṃśo'dhyāyaḥ