Skanda Purana · Chapter 6.186

ṛṣaya ūcuḥ // //
bhūya eva mahābhāga vada māhātmyamuttamam //
atitheḥ kṛtyamasmākaṃ vistareṇa ca sūtaja

// sūta uvāca // //
śṛṇvantu munayaḥ sarve māhātmyamidamuttamam //
yena saṃśrutamātreṇa naśyetpāpaṃ dinodbhavam

yanmayā ca śrutaṃ pūrvaṃ sakāśātsvapituḥ śubham

gṛhasthānāṃ paro dharmo nānyo'styatithipūjanāt //
atitherna ca doṣosti tasyātikramaṇena ca

atithiryasya bhagnāśo gṛhātpratinivartate //
sa dattvā duṣkṛtaṃ tasmai puṇyamādāya gacchati

satyaṃ śaucaṃ tapo'dhītaṃ dattamiṣṭaṃ śataṃ samāḥ //
tasya sarvamidaṃ naṣṭamatithiṃ yo na pūjayet

dūrādatithayo yasya gṛhamāyāṃti nirvṛtāḥ //
sa gṛhastha iti proktaḥ śeṣāśca gṛharakṣiṇaḥ

na purākṛtapuṇyānāṃ narāṇāmiha bhūtale //
trīnetānpratihanyaṃte śrāddhaṃ dānaṃ śubhā giraḥ

tuṣṭe'tithau gṛhasthasya tuṣṭāḥ syuḥ sarvadevatāḥ //
vimukhe vimukhāḥ sarvā bhavaṃti ca na saṃśayaḥ ९ //
tasmāttoṣayitavyaśca gṛhasthena sadā'tithiḥ //
apyātmanaḥ pradānena yadīcchetpuṇyamātmanaḥ //

trividhastvatithiḥ prokto gṛhasthānāṃ dvijottamāḥ //
tasyāhaṃ vacmi vaḥ kālaṃ śṛṇudhvaṃ susamāhitāḥ

śrāddhīyo vaiśvadevīyaḥ sūryoḍhaśca tṛtīyakaḥ //
ye cānye bhojanārthīyāste sāmānyāḥ prakīrtitā

sāṃkalpe vihite śrāddhe pitṝṇāṃ bhojanodbhave //
samāgacchati yaḥ kāle tasmiñchrāddhīya eva saḥ

dūrādhvānaṃ pathi śrāṃtaṃ vaiśvadevāṃta āgatam //
atithiṃ taṃ vijānīyānnātithiḥ pūrvamāgataḥ

priyo vā yadi vā dveṣyo mūrkhaḥ paṃḍita eva vā //
vaiśvadeve tu saṃprāptaḥ so'tithiḥ svargasaṃkramaḥ

na pṛcchedgotracaraṇaṃ na sthānaṃ vedameva ca //
dṛṣṭvā yajñopavītaṃ ca bhojayettaṃ prabhaktitaḥ

śrāddhe vā vaiśvadeve vā yadyāgacchati nātithiḥ //
ghṛtāhutiṃ tato dadyāttannāmnā ca havirbhuji

aśaktyā bhojyadānasya deyaṃ bhaktyā tataḥ param //
tasyānnamapi tu stokaṃ yena tuṣṭiṃ pragacchati

tathānyaśca tṛtīyastu sūryoḍho'tithirucyate //
kṛte tu bhojane yastu rātrau vā cādhigacchati//
tasya śaktyā pradātavyaṃ sasyaṃ ca gṛhamedhinā

sūryoḍho yasya saṃprāpto gṛhātpūjāṃ vinā vrajet//
nirāśaḥ pātakaṃ tasya nijaṃ dattvā prayāti saḥ

/
tṛṇāni bhūmirudakaṃ vākcaturthī ca sūnṛtā//
etānyapi satāṃ gehe nocchidyaṃte kadācana

svāgatenāgnayastṛptiṃ gṛhasthasya prayāṃti ca //
āsanena vrajettuṣṭiṃ svayaṃbhūḥ prapitāmahaḥ

argheṇa śaṃbhuḥ pādyena sarve devāḥ savāsavāḥ //
bhojyadānena viṣṇuḥ syātsarvadevamayo'tithiḥ

tasmātpūjyaḥ sadā viprā bhojanīyo viśeṣataḥ //
nāmāpyuccārya bhojyo'nyo brāhmaṇo gṛhamedhinā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭa keśvarakṣetramāhātmye'tithimāhātmyavarṇanaṃnāma ṣaḍaśītyuttaraśatatamo'dhyāyaḥ