Skanda Purana · Chapter 6.180

ṛṣaya ūcuḥ//
atyadbhutamidaṃ sūta yattvayā samudāhṛtam//
brahmaṇā yatkṛto yajñastatra kṣetre mahātmanā

agniṣṭomādayo yajñā ye vartante dharātale //
yaṣṭavyasteṣu yajñeṣu sa eva hi sureśvaraḥ

tenaiva yajatā tatra ko hīṣṭaḥ prabravīhi naḥ //
ṛtvijaḥ ke sthitāstatra yaistatkarma makhodbhavam //
tatpratyakṣe kṛtaṃ sarvametannaḥ kautukaṃ param

kā caiva dakṣiṇā dattā tena teṣāṃ dvijanmanām //
ko'dhvaryurvihitastatra yena tadyajanaṃ kṛtam

ko hotā kaśca vā'gnīdhraḥ ko brahmā tatra saṃsthitaḥ //
udgātā kaḥ sthitastatra hyācāryo yajñakarmaṇi

// sūta uvāca // //
ahaṃ vaḥ kīrtayiṣyāmi sarvaṃ yajñasya saṃbhavam //
vṛttāṃtaṃ yacca tatrastha māścaryaṃ dvijapuṃgavāḥ

ye sadasyāḥ sthitāstatra ṛtvijaśca dvijottamāḥ //
dakṣiṇā yāḥ pradattāśca tebhyastena mahātmanā

yajatā devadevena brahmaṇā'mitatejasā //
yajñakāmaṃ caturvaktraṃ jñātvā devaḥ śatakratuḥ

sarvaiḥ suragaṇaiḥ sārdhaṃ sāhāyyārthamupāgataḥ //
tathā ca bhagavāñchaṃbhuḥ sarvadevagaṇaiḥ saha

tāndṛṣṭvā'bhyāgatānbrahmā martyadharmasamāśritān //
provāca vinayopetaḥ kṛtāṃjalipuṭaḥ sthitaḥ

svāgataṃ vaḥ suraśreṣṭhāḥ prasādaḥ kriyatāṃ mama //
niviśyatāṃ yathānyāyaṃ sthāneṣu rucireṣu ca

dhanyo'smyanugṛhīto'smi yadyūyaṃ svayamāgatāḥ //
maṃtrāhūtā yathā kṛcchrātsarvasatreṣu gacchatha

// devā ūcuḥ // //
yena yaccātra kartavyaṃ tacchīghraṃ vada padmaja //
yajñe tava mahābhāga tasya tattvaṃ samādiśa //

// brahmovāca // //
viśvakarmandrutaṃ gaccha yajñamaṇḍapasiddhaye //
patnīśālāṃ tataścaiva yajñavedīstathaiva ca

kuṇḍāni caiva sarvāṇi yathāsthāneṣu kāraya //
yajñapātrāṇi sarvāṇi grahāśca camasāstathā

yūpāśca yatpramāṇena kartavyāḥ sacaṣālakāḥ //
pacanārthaṃ tathā gartāḥ kartavyā yatpramāṇataḥ

iṣṭikānāṃ sahasrāṇi daśa cāṣṭaśatāni ca //
kartavyāni tvayā śīghraṃ cayanānīti satvaram

tathā hiraṇmayaścāpi puruṣaḥ kārya eva hi //
tathetyuktā tatastvaṣṭā śīghrācchīghrataraṃ yayau

tatastu padmajaḥ prāha devācāryaṃ bṛha spatim //
bṛhaspate tvamānīhi yajñārhānṛtvijo'khilān

yāvatṣoḍaśasaṃkhyāśca nānyasyaitaddhi yujyate //
tvayā śakra sadā kāryā śuśrūṣā ca dvijanmanām

hastapādāvamarddaśca śrāṃtānāṃ pṛṣṭhamarddanam //
dhanādhyakṣa tvayā deyā dakṣiṇā kālasaṃbhavā

suvastrāṇi hiraṇyaṃ ca tathānyadvāpi vāṃchitam //
tvayā viṣṇo sadā kāryaṃ kṛtyākṛtyaparīkṣaṇam

yuktaṃ kṛtamatho naiva sāvadhānena sarvadā //
lokapālāśca ye sarve rakṣaṃtu sakalā diśaḥ //
bhūtapretapiśācānāṃ praveśaṃ rākṣasodbhavam

yo yaṃ kāmayate kāmaṃ kiṃcidvastraṃ dhanaṃ ca vā //
vicārya tasya taddeyaṃ sarvayajñādhipena tu

ādityā vasavo rudrā viśvedevā marudgaṇāḥ //
bhavaṃtu pariveṣṭāro bhoktukāmajanasya ca

etasminnaṃtare prāpto viśvakarmā tvarānvitaḥ //
abravītpaṃkajabhavaṃ saṃsiddho yajñamaṇḍapaḥ

sarvamanyatsamādiṣṭaṃ yattvayoktaṃ caturmukha

tato bṛhaspatiḥ prāha samabhyetya pitāmaham//
samānītā mayā deva brāhmaṇā yajñakarmaṇi

viprāḥ ṣoḍaśasaṃkhyāśca ṛtvikkarmaṇi yojaya //
svayaṃ parīkṣya deveśa yajñakarmaprasiddhaye

tato brahmā svayaṃ dṛṣṭvā tānparīkṣya prayatnataḥ //
ṛtviktve ca niyojyātha tataścakre tadarhaṇam

// ṛṣaya ūcuḥ // //
ṛtvijāṃ caiva sarveṣāṃ sūta nāmāni kīrtaya //
yena yo vihitastatra padārthaḥ sūta taṃ vada

// sūta uvāca // //
bhṛgurhautre tatastena vṛto brāhmaṇasattamāḥ //
maitrāvaruṇasaṃjñastu tathaiva cyavano muniḥ

acchāvāko marīciśca grāvastudgālavo muniḥ //
pulastyaśca tathā 'dhvaryuḥ prasthātātriśca saṃsthitaḥ

tatra raibhyo munirneṣṭā tatronnetā sanātanaḥ //
brahmā ca nārado gargo brāhmaṇācchaṃsireva ca

āgnīdhraśca bharadvājo hotā pārāśarastathā //
tathaiva tatra kṣetre ca udgātā gobhilo muniḥ

tathaiva kauthumo jajñe prastautā yajñakarmaṇi //
śāṃḍilyaḥ pratiharttā ca subrahmaṇyastathāṃgirāḥ

tasya yajñasya siddhyarthamityete ṣoḍaśartvijaḥ //
vastrābharaṇaśobhāḍhyā vinayena kṛtāśca te

tataḥ kṛtvā svayaṃ brahmā sarveṣāmarhaṇakriyām //
gṛhyoktena vidhānena tataḥ provāca sādaram

eṣo'ha śaraṇaṃ prāpto yuṣmākaṃ dvijasattamāḥ //
anugṛhṇīta māṃ sarve dīkṣāyai yajñakarmaṇaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe brahmayajñopākhyāne yajñamaṇḍa paprāptabrāhmaṇasatkārapūrvakartvigādisthānayojanāpūrvakādhvarakarmāraṃbhonāmāśītyuttaraśatatamo'dhyāyaḥ