Skanda Purana · Chapter 6.176

// sūta uvāca // //
dṛṣṭvā pratiṣṭhitaṃ liṃgaṃ yājñavalkyena dhīmatā //
svamātuḥ śuddhihetoḥ sa tannāmnā liṃgamuttamam

sthāpayāmāsa vipreṃdrāḥ śraddhayā parayā yutaḥ //
tataścānīya vipreṃdraṃ madhyagaṃ nāgarodbhavam // //
gartātīrthasamudbhūtamāhitāgniṃ prayājinam //
yathaitannagarasthānaṃ tathā tvamapi dīkṣitaḥ

aṣṭaṣaṣṭiṣu gotrāṇāṃ nāyakatve vyavasthitaḥ //
tava vākyena sarvāṇi gotrāṇi dvijasattama

vartayiṣyaṃti kṛtyeṣu yāvaccandrārkatārakāḥ //
govardhana tvayā ciṃtā kāryā cāsya samudbhavā

liṃgasya pūjanārthāya preraṇīyāśca nāgarāḥ//
pūjayā tasya liṃgasya vṛddhiṃ yāsyati te'nvayaḥ

apūjayā vināśaṃ ca yāsyatyatra na saṃśayaḥ //
tava vaṃśodbhavā ye ca pūjayitvā prabhaktitaḥ

etalliṃgaṃ kariṣyaṃti kṛtyāni vividhānica //
tāni siddhiṃ prayāsyaṃti prasādādasya dīkṣita

// govardhana uvāca // //
ahamarcāṃ kariṣyāmi liṃgasyāsya sadā dvija //
bhaktiṃ ca prakariṣyāmi hetorasya hetorasya kṛte dvija //
pūjārthaṃ caiva ye cānye mama vaṃśasamudravāḥ

// pippalāda uvāca // //
govardhana drutaṃ viprāṃstatra cānaya nāgarān//
teṣāṃ matena devasya nāmamātraṃ karomyaham

tataścānāyayāmāsa viprāṃścaiva vicakṣaṇān //
śrutādhyayanasaṃpannānyajñakarmaparāyaṇān

tānabravītpraṇamyoccaiḥ pippalādo mahāmuniḥ //
mama mātā mṛtā pūrvaṃ kaṃsārīti ca nāmataḥ

tasyā uddeśato liṃgaṃ mayaitatsaṃpratiṣṭhitam //
yuṣmadvākyātprasiddhiṃ ca prayātu dvijasattamāḥ

aṣṭamyāṃ ca caturdaśyāṃ yaścaitatsnāpayiṣyati //
yājñavalkyeśvarotthaṃ ca sa vai śreyo hyavāpsyati

// sūta uvāca // //
atha tairbrāhmaṇaiḥ sarvaistasya nāma pratiṣṭhitam //
kaṃsārīśvara ityevaṃ gauravāttasya sanmu neḥ

etadvaḥ sarvamākhyātaṃ yatpṛṣṭho'smi dvijottamāḥ //
kaṃsārīśvarasaṃjñastu yathā jātastu pāpahā //
sthāpitaḥ pippalādena svayaṃ caiva mahātmanā

yaścaitatpuṇyamākhyānaṃ tasya devasya saṃnidhau //
saṃpaṭhecchṛṇuyādvāpi samyakchaktisamanvitaḥ

manasā ciṃtitaṃ pāpaṃ paradārakṛtaṃ ca yat //
tasya tannāśamāyāti pippalāda vaco yathā

yastasya purato bhaktyā nīlarudrā nsadā japet //
prāṇarudrānviśeṣeṇa bhavarudrasamanvitān

brahmahatyodbhavaṃ caiva api tasya praṇaśyati //
paracakrabhaye jāte hyanā vṛṣṭibhaye tathā

atharvavede sādyaṃte paṭhite tasya cāgrataḥ //
śatrurvilayamabhyeti vṛṣṭiḥ sañjāyate drutam

rājadauḥsthye samutpanne rājā bhavati dhārmikaḥ //
sarvarogavinirmuktaḥ prajāpālanatatparaḥ

upasargabhaye jāte tasya doṣaḥ praśāmyati //
śanaiḥ śanairasaṃdigdhaṃ pippalādavaco yathā

kiṃ vā te bahunoktena yatkiṃcidvyasanaṃ mahat //
tattasya vyasanaṃ kiṃcidatharvaṇaḥ prakī rtanāt

asya devasya purato yāti nāśaṃ ca vai drutam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye kaṃsāreśvarotpattimāhātmyavarṇanaṃnāma ṣaṭsaptatyuttaraśatatamo'dhyāyaḥ