Skanda Purana · Chapter 6.175

// sūta uvāca // //
evaṃ saṃśocate yāvadātmānaṃ parigarhayan//
tatastu brahmaṇā proktaḥ svayamabhyetya bho dvijāḥ

tvayā śaṃkā na kartavyā sutasyāsya kṛte dvija//
ajñānādeva te jāto daivayogena bālakaḥ

//yājñavalkya uvāca// //
tathāpi deva me śuddhirhṛdayasya na jāyate //
tasmādvada suraśreṣṭha prāyaścittaṃ viśuddhaye

// brahmovāca// //
yadi te cittaśuddhistu na kathaṃcitpravartate//
tatsthāpaya mahābhāga liṃgaṃ devasya śūlinaḥ

ajñānājjñānatovāpi yatpāpaṃ kurute naraḥ //
brahmahatyādikaṃ cāpi strīvadhādvāpi yadbhavet

paṃceṣṭikāmayaṃ vāpi yaḥ kuryāddharamandiram//
tasya tannāśamāyāti tamaḥ sūryodaye yathā

viśeṣeṇa mahābhāga hāṭakeśvarasaṃbhave //
kṣetre tatra sumedhye tu sarvapātakanāśane

kalikāle ca saṃprāpte yatra pāpaṃ na vidyate //
ahamapyatra vāṃchāmi yajñaṃ kartuṃ dvijottama

ānayiṣyāmi tattīrthaṃ puṣkaraṃ cātmanaḥ priyam //
kalikālabhayāccaitadyāvanno vyarthatāṃ vrajet

kalikāle tu saṃprāpte tīrthāni sakalāni ca //
yāsyaṃti vyarthatāṃ vipra muktvedaṃ kṣetramuttamam

// sūta uvāca // //
evamuktvā caturvaktrastataścādarśanaṃ gataḥ //
yājñavalkyo'pi tacchrutvā pitāmahavaco' khilam

liṃgaṃ saṃsthāpayāmāsa jñātvā kṣetramanuttamam//
abravīcca tato vākyaṃ meghagaṃbhīrayā girā

aṣṭamyāṃ ca caturdaśyāṃ yo liṃgaṃ māmakaṃ tvidam //
snāpayiṣyati sadbhaktyā tasya pāpaṃ prayāsyati

paradārakṛtaṃ yacca mātrāpi ca samaṃ kṛtam//
kṣālayiṣyati tatpāpaṃ snāpitaṃ pūjitaṃ paraiḥ

asminnahani saṃprāpte tasya pakṣasamudbhavam //
prayāsyati kṛtaṃ pāpaṃ yadajñānādvinirmitam

tataḥprabhṛti vikhyāto yājñava lkyeśvaraḥ śubhaḥ //
tasminkṣetre dvijaśreṣṭhā hāṭakeśvarasaṃjñake

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye yājñavalkyeśvarotpattimāhātmyavarṇanaṃnāma paṃcasaptatyuttaraśatatamo'dhyāyaḥ