Skanda Purana · Chapter 6.171

// sūta uvāca // //
etasminneva kāle tu viśvāmitro mahāmuniḥ //
tāṃ śaktiṃ vyarthatāṃ prāptāṃ jñātvā kopasamanvitaḥ

mumoca tadvadhārthāya brahmāstraṃ so'bhimaṃtritam //
tasya saṃhitamātrasya prasvanaḥ samajāyata

tataścolkāḥ prabhūtāśca prayāṃti ca nabhastalāt //
tataḥ kuntāḥ śaktayaśca tomarāḥ parighāstathā

bhiṃḍipālā gadāścaiva khaḍgāścaiva paraśvadhāḥ //
bāṇāḥ prāsāḥ śataghnyaśca śataśo'tha sahasraśaḥ

vasiṣṭho'pi parijñāya preṣitaṃ gādhisūnunā //
brahmāstraṃ mṛtyave tena śucirbhūtvā tataḥ param

iṣīkāṃ ca samādāya brahmāstraṃ tatra yojayan //
abravīdgādhiputrāya svastyastu tava pārśvataḥ

hanyatāmastrametaddhimama vākyādasaṃśayam//
tatastena hataṃ tacca brahmāstraṃ tatsamudbhavam

vajrāstraṃ ca tato muktaṃ vajrāstreṇa vināśitam //
yadyadastraṃ kṣipatyeṣa viśvāmitraḥ prakopitaḥ

tattaddhaṃti vasiṣṭhastu maṃtrasya ca prabhāvataḥ //
etasminneva kāle tu kṣubhito makarālayaḥ

śīryaṃte giriśṛṃgāṇi raktavṛṣṭiḥ parā sthitā //
pralayasyeva cihnāni saṃjātāni dharātale //
kimakāle mahāneṣa pralayaḥ saṃbhaviṣyati

tataḥ pitāmahaṃ jagmuḥ sarve devāḥ savāsavāḥ //
procuḥ pralayacihnāni yāni saṃti dharātale

tato brahmā ciraṃ dhyātvā tānuvāca divaukasaḥ //
viśvāmitra vasiṣṭhābhyāṃ yuddhametadvyavasthitam

divyāstrasaṃbhavaṃ devāstenaitadvyākulaṃ jagat

tasmādgacchāmahe tatra yāvanno jāyate kṣayaḥ //
sarveṣāmeva bhūtānāṃ divyāstrāṇāṃ prabhāvataḥ

tato'bhigamya te deśaṃ yatra tau munisattamau //
vicāmitravasiṣṭhau tau yudhyamānau parasparam

tataḥ provāca tau brahmā sāmnā paramavalgunā //
nivartyatāmidaṃ yuddhametaddivyāstrasaṃbhavam //
yāvanna pralayo bhāvi samaste dharaṇītale

//
// vasiṣṭha uvāca // //
nāhamastraṃ prayuṃjāmi viśvāmitravadhecchayā //
ātmarakṣākṛte deva astramastreṇa śāmayan

ayaṃ mama vināśāya kevalaṃ cāstramokṣaṇam//
kurute nirdayo brahmaṃstaṃ nivāraya sāṃpratam

// brahmovāca // //
viśvāmitra muniśreṣṭha vasiṣṭhaṃ brāhmaṇottamam //
tvaṃ rakṣa mama vākyena tathā sarvamidaṃ jagat

astramokṣavirāmaṃ tvaṃ brahmarṣe kuru satvaram

// viśvāmitra uvāca // //
na māmeṣa dvijaṃ brūte kathaṃcitprapitāmaha //
tasmādeṣa prakopo me saṃjāto'sya vadhopari

tasmādvadatu deveśa māmeṣa brāhmaṇaṃ drutam //
nivārayāmi yenāstraṃ yadasyopari saṃdhitam

// brahmovāca // //
tvaṃ vasiṣṭhādhunā brūhi viśvāmitraṃ mamājñayā //
brāhmaṇo jāyate tena tava jīvasya rakṣaṇam

//
// vasiṣṭha uvāca // //
nāhaṃ kṣatriyasaṃjātaṃ brāhmaṇaṃ vacmi padmaja //
na vadhe mama śakto'yaṃ kathaṃcitkṣatriyodbhavaḥ

brāhmyaṃ tejo na kṣā ttreṇa tejasā saṃpraṇaśyati /
evaṃ jñātvā caturvaktra yadyuktaṃ tatsamācara

// brahmovāca // //
viśvāmitra dvijaśreṣṭha tyaktvā divyāstrasaṃbhavam //
kuru yuddhaṃ vasiṣṭhena no cecchapsyāmahaṃ ca te

// viśvāmitra uvāca // //
divyāstrāṇi ca saṃtyajya mayā vadhyaḥ sudurmatiḥ //
kiṃcicchidraṃ samāsādya tvaṃ gaccha nijasaṃśrayam // // २७ /
// sūta uvāca // //
bāḍhamityevamuktā ca brahmalokaṃ gato vidhiḥ //
viśvāmitravasiṣṭhau ca sarasvatyāstaṭe sthitau

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vasiṣṭhaviśvāmitra yuddhe divyāstranivartanavarṇanaṃnāmaikasaptatyuttaraśatatamo'dhyāyaḥ