Skanda Purana · Chapter 6.170

// sūta uvāca // //
tathānyadapi saṃjātamāścaryaṃ yadabhūddvijāḥ //
viśvāmitreṇa sā śaktirvasiṣṭhāya visarjitā

vadhārthaṃ tasya viprarṣervasiṣṭhena ca dhīmatā //
staṃbhitā'tharvaṇairmantraiḥ prasvedaḥ samajāyata

svedātsamabhavattoyaṃ śītalaṃ tadajāyata//
pādābhyāṃ nirgataṃ toyamatra dṛśyamajāyata

vidārya bhūmiṃ saṃjātā jaladhārā suśītalā //
nirmalaṃ pāvanaṃ svacchaṃ gaṃgāṃbha iva niḥsṛtam

gaṃ
gā pratyakṣatāṃ yātā tīrthaiḥ sarvaiḥ samanvitā//
pūritaṃ vāriṇā kuṇḍaṃ nirmalaṃ śītalaṃ śivam

tasyāṃ yā kurute snānaṃ nārī vaṃdhyā dvijottamāḥ //
sadyaḥ putravatī sā syādraudre kaliyuge dvijāḥ

anyo'pi kurute snānaṃ sarvatīrthaphalaṃ labhet

snātvā tatra tu yo devīṃ paśyecca vidhinā naraḥ //
dhanaṃ dhānyaṃ tathā putrānrājyotthaṃ ca sukhaṃ labhet //

yā nārī durbhagā vandhyā sā'pi putravatī bhavet //
caitre māsi sitāṣṭamyāṃ bhaktiyogasamanvitā //
mahāniśāyāṃ tatraiva naivedyabalipiṃḍikām

prasannayā kumāryā tu svayaṃ cā'tha karoti yā //
gṛhṇāti yā ca vai nārī piṃḍikāṃ balisaṃyutām

śatavarṣā tu yā nārī piṃḍikāṃ bhakṣayeddvijāḥ //
sā'pi putravatī ca syādyadi vṛddhatamā bhavet

kiṃ punaryauvanopetā saubhāgyena samanvitā //
putrasaukhyavatī nārī devyā vai darśanena ca //

sarveṣāṃ nāgarāṇāṃ tu bhāvajā devatā smṛtā //
sā sārdhāṣṭadvipaṃcāśadgotrāṇāṃ kuladevatā

etasmātkāraṇādyātrā nāgaraiḥ sukṛtā bhavet //
na vinā nāgarairyātrāṃ tuṣṭiṃ yāti sureśvarī

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭake śvarakṣetramāhātmye dhārātīrthotpattimāhātmyavarṇanaṃnāma saptatyuttaraśatatamo'dhyāyaḥ १७० // //