Skanda Purana · Chapter 6.169

// ṛṣaya ūcuḥ // //
kasmātsā tuṣṭidā proktā nāgarāṇāṃ viśeṣataḥ //
dhārānāmeti vikhyātā kasmātsā dharaṇītale

// sūta uvāca // //
camatkārapure pūrvaṃ dhārānāmeti viśrutā //
āsīttapasvinī sādhvī nāgarī brāhmaṇottamā //
tasyāḥ sakhyamarundhatyā āsītpūrvaṃ sumedhayā

arundhatī yadā prāptā camatkārapure śubhe //
snānārthaṃ śaṃkhatīrthaṃ tu vasiṣṭhena samāgatā

tayā dṛṣṭātha sā tatra aṃguṣṭhāgreṇa saṃsthitā //
vāyubhakṣā nirāhārā divyena vapuṣānvitā

tayā pṛṣṭā ca sā sādhvī kā tvaṃ kasya sutā śubhe //
kimarthaṃ tu sthitā cogre tapasi brūhi me śubhe

// dhārovāca // //
devaśarmākhyaviprasya sutāhaṃ nāgarasya ca //
bālatve vartamānāyā vaidhavyaṃ me vyavasthitam

śaṃkhatīrthasya māhātmyaṃ śrutvā śaṃkheśvarasya ca //
tato'haṃ saṃsthitā hyatra tasyaivārādhane sthitā

//
// arundhatyuvāca // //
tavopari mahānsneho darśanātte vyavasthitaḥ //
tasmādāgaccha gacchāvo mamāśramapadaṃ śubham

sarasvatyā staṭe śubhre sarvapātakanāśane //
śāstragoṣṭhīratā nityaṃ tatra tiṣṭha mayā saha

tataḥ saṃprasthitā sā tu tayā sārdhaṃ tapasvinī //
anujñātā svapitrā tu jananyā bāṃdhavaistathā

tasyāḥ sakhyaṃ ciraṃ kālaṃ tayā saha babhūva ha //
kasyacittvatha kālasya sā śaktistatra cāgatā //

viśvāmitreṇa saṃsṛṣṭā vasiṣṭhasya vadhāya ca //
sā staṃbhitā vasiṣṭhena kṛtā devīsvarūpiṇī //
saṃpūjyā devamartyānāṃ sarvarakṣāpradā śubhā

tatastu dhārayā tasyāḥ kailāsaśikharopamaḥ //
prāsādo nirmito viprā nānāratnavicitritaḥ

cakārātha tataḥ stotraṃ tasyāḥ sā ca tapasvinī

namaste parame brāhmi dhārayoge namonamaḥ //
ardhamātre pare śūnye tasyārdhārdhe namostu te //-

namaste jagadādhāre namaste bhūtadhāriṇi //
namaste padmapatrākṣi namaste kāṃcanadyute

namaste siṃhayānāḍhye namaste'stumahābhuje //
namaste devatābhīṣṭe namaste daityasūdini

namaste mahiṣākrāṃtaśarīracchinnamastake //
namaste viṃdhyanirate surāmāṃsabalipriye

tvaṃ lakṣmīstvaṃ śacī gaurī tvaṃ siddhistvaṃ vibhāvarī //
tvaṃ svāhā tvaṃ svadhā tuṣṭistvaṃ puṣṭistvaṃ sureśvarī

śaktirūpāsi devi tvaṃ sṛṣṭisaṃhārakā riṇī //
tvayi dṛṣṭamidaṃ sarvaṃ trailokyaṃ sacarācaram

yathā tilesthitaṃ tailaṃ dadhisaṃsthaṃ yathā ghṛtam //
havirbhujaśca kāṣṭhasthaḥ suguptaṃ labhyate na hi

tathā tvamapi deveśi sarvagāpi na lakṣyase

// sūta uvāca // //
etena stotramukhyena smṛtā sā parameśvarī //
bahūni varṣa pūgāni pūjayaṃtyā dinedine

kasyacittvatha kālasya caitraśuklāṣṭamī sitā //
tasminnahani devī sā nadyāṃ saṃsnāpya pūjitā

bali pūjāṃ tato dattvā stotreṇānena ca stutā //
tataḥ pratyakṣatāṃ gatvā tāmuvāca tapasvinīm

putri tuṣṭāsmi bhadraṃ te stotreṇānena cānaghe //
varaṃ varaya bhadraṃ te tava dāsyāmi vāṃchitam

// dhārovāca // //
yadi tuṣṭāsi me devi yadi deyo varo mama //
tanme nāma tavāpyastu prāsāde'tra hi kevalam

aparaṃ nāgaro yo'tra tvasminnahani saṃsthite //
pradakṣiṇātrayaṃ kṛtvā tava dattvā phalatrayam

stotreṇānena bhavatīṃ stutvā ca kurute natim//
tasya saṃvatsaraṃ yāvadrogo rakṣyastvayā'khilaḥ

yā ca vaṃdhyā bhavennārī sā bhūyātputrasaṃyutā //
durbhagā ca sasaubhāgyā kurūpā rūpasaṃbhavā //
rogiṇī roganirmuktā sarvasaukhyasamanvitā

// devyuvāca // //
ahaṃ dhāreti vikhyātā prāsāde'tra tvayā kṛte//
bhaviṣyāmi na sandehastava kīrtikṛte sadā

atra yo nāgaro bhaktyā samāgatya tapasvini //
pradakṣiṇātrayaṃ kuryāddattvā mama phalatrayam

so'pi saṃvatsaraṃ yāvadbhavitā rogavarjitaḥ //
evamuktā tu sā devītataścādarśanaṃ gatā

dhārāpi saṃsthitā tatra arundhatyā samanvitā //
adyāpi dṛśyate vyomni tasyāścāpi samīpagā

etaddhārodbhavaṃ yo'tra vṛttāṃtaṃ kīrtayiṣyati //
śṛṇuyādvā dvijaśreṣṭhā mucyetpāpāddinodbhavāt

tasmātsarvaprayatnena paṭhanīyaṃ viśeṣataḥ //
śrotavyaṃ ca prabhaktyedaṃ nāgaraiśca viśeṣataḥ

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye dhārānāmotpattivṛttāṃta dhārādevīmāhātmyavarṇanaṃ nāmaikonasaptatyuttaraśatatamo'dhyāyaḥ