Skanda Purana · Chapter 6.17

// ṛṣaya ūcuḥ // //
camatkārapurotpattiḥ śrutā tvatto mahāmate //
tatkṣetrasya pramāṇaṃ yattadasmākaṃ prakīrtaya /////
yāni tatra ca puṇyāni tīrthānyāyatanāni ca //
sahitāni prabhāveṇa tāni sarvāṇi kīrtaya

// sūta uvāca // //
pañcakrośapramāṇena kṣetraṃ brāhmaṇasattamāḥ //
āyāmavyāsataścaiva camatkārapurottamam

prācyāṃ tasya gayāśīrṣaṃ paścimena hareḥ padam //
dakṣiṇottarayoścaiva gokarṇeśvarasaṃjñitau

hāṭakeśvara saṃjñaṃ tu pūrvamāsīddvijottamāḥ //
tatkṣetraṃ prathitaṃ loke sarvapātakanāśanam

yataḥ prabhṛti viprebhyo dattaṃ tena mahātmanā //
camatkāreṇa tatsthānaṃ nāmnā khyātiṃ tato gatam

// brāhmaṇā ūcuḥ // //
yadetadbhavatā proktaṃ tasya pūrve gayāśiraḥ //
māhātmyaṃ tasya no brūhi sūtaputra savistaram

// sūta uvāca // //
āsīdvidūrathonāma haihayādhipatiḥ purā //
yo vai dānapatirdakṣaḥ śatrupakṣakṣayāvahaḥ

sa kadācinmṛgānhaṃtuṃ nṛpaḥ senāvṛto yayau //
nānāvṛkṣalatākīrṇaṃ vanaṃ śvāpadasaṃkulam

sa jaghāna mṛgāṃstatra śarairāśīviṣopamaiḥ //
mahiṣāṃścavarāhāṃśca tarakṣūñcchambarānrurūn

siṃhānvyāghrāngajānmattāñcchataśo'tha sahasraśaḥ //
atha tena mṛgo viddhaḥ śareṇā''nataparvaṇā

na papāta dharāpṛṣṭhe saśaro dudruve drutam//
tataḥ sa kautukāviṣṭastasya pṛṣṭhe hayottamam //
prerayāmāsa vegena manomārutavegadhṛk

tataḥ sainyaṃ samutsajya mṛgaṃ lipsurmahīpatiḥ //
anyadvanāṃtaraṃ prāpto raudraṃ cittabhayāvaham

kaṇṭakībadarīprāyaṃ śālmalīvanasaṃkulam //
tathānyaiḥ kaṇṭakākīrṇai rūkṣai rvṛkṣaiḥ samanvitam

tatra rūkṣā'khilā bhūmirnirjalā tamasā vṛtā //
cīrikolūkagṛdhāḍhyā śīrṣacchāyāvivarjitā

grīṣme madhyagate sūrye mṛgākṛṣṭaḥ sa pārthivaḥ //
dūrādhvānaṃ jagāmā'tha prāsapāṇirvarāśvagaḥ

tena tasyānugā bhṛtyāḥ sarve suśrāṃtavāhanāḥ //
kṣutpipāsākulāḥ śrāṃtāḥ sthāne sthāne samāśritāḥ

siṃhavyāghraistathā cānyaiḥ patitā naṣṭacetanāḥ //
bhakṣyaṃte cetayanto'pi tathā'nye calanākṣamāḥ

tataḥ so'pi mahīpālaḥ kṣutpipāsāsamākulaḥ //
dṛṣṭvā tadvyasanaṃ prāptamātmanaḥ sevakaiḥ samam

kāṃtārasyāṃtamanvicchanprerayāmāsa taṃ hayam//
jātyaṃ sarvaguṇopetaṃ kaśāghātaiḥ pratāḍayan

tataḥ sa nṛpatistena vāyuvegena vājinā //
nīto dūraṃ durgamārgaṃ sarvajaṃtuvivarjitam

evaṃ tasya narendrasya kāṃdiśīke'navasthite //
so'śvo'pataddharāpṛṣṭhe so'pyadhastātturaṃgamāt

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vidūrathamṛgayāvarṇanaṃnāma saptadaśo'dhyāyaḥ