Skanda Purana · Chapter 6.166

// sūta uvāca // //
ṛcīko'pi samādāya puruṣairāptakāribhiḥ //
tānaśvānprajagāmātha yatra gādhirvyavasthitaḥ

tasmai nivedayāmāsa kanyārthaṃ tānhayottamān //
gādhistu tānpragṛhyātha yogyānvājimakhasya ca

ekaikaṃ paramaṃ teṣāṃ sa jagāmātha pārthivaḥ //
tatastāṃ pradadau tasmai kanyāṃ trailokyasundarīm

viprāgnisākṣisaṃbhūtāṃ gṛhyoktavidhinā nvitaḥ //
tato vivāhe nirvṛtta ṛcīko munisattamaḥ

tasyāḥ saṃveśane caiva niṣkāmaḥ samapadyata //
athābravīnnijāṃ bhāryāṃ niṣkāmaḥ saṃsthito muniḥ

ahaṃ yāsyāmi suśroṇi kānanaṃ tapasaḥ kṛte //
tvaṃ prārthaya varaṃ kaṃcidyenābhīṣṭaṃ dadāmi te

sā śrutvā tasya tadvākyaṃ niṣkāmasya prajalpitam //
vāṣpapūrṇekṣaṇā dīnā jagāma jananīṃ prati

provāca vacanaṃ tasya sā niṣkāmapate stadā //
varadānaṃ tathā tena yathoktaṃ dvijasattamāḥ

atha śrutvaiva sā mātā yathā tajjalpitaṃ tayā //
sutayā brāhmaṇaśreṣṭhāstato vacanamabravīt

yadyayaṃ putri te bhartā varaṃ yacchati vāṃchitam //
tatprārthaya sutaṃ tasmādbrāhmaṇyena samanvitam

madarthaṃ caikaputraṃ ca niḥśeṣakṣāttratejasā //
saṃyuktaṃ yācaya śubhe viputrā'haṃ yataḥ sthitā

sā śrutvā jananīvākyamṛcīkaṃ prāpya suvratā //
abravījjananī vākyaṃ sarvaṃ vistarato dvijāḥ

sa tasyāśca vacaḥ śrutvā cakārātha carudvayam //
putreṣṭiṃ vidhivatkṛtvā namaskṛtya svayaṃbhuvam

ekasminyojayāmāsa brāhmyaṃ tejo'khilaṃ ca saḥ //
kṣātraṃ tejastathānyasminsakalaṃ dvijasattamāḥ

bhāryāyai pradadau pūrvaṃ brāhmyaṃ ca carumutta mam//
abravītprāśayitvainamaśvatthāliṃganaṃ kuru

tataḥ prāpsyasi satputraṃ brāhmyatejaḥsamanvitam //
dvitīyaścaruko yaśca taṃ tvaṃ mātre nive daya

abravīcca tatastāṃ tu ṛcīko munisattamaḥ //
tvamenaṃ carukaṃ prāśya nyagrodhāliṃganaṃ kuru

tataḥ prāpsyasi satputraṃ saṃyuktaṃ kṣātratejasā //
niḥśeṣeṇa mahābhāge na me syādvacanaṃ vṛthā

evamuktvā ṛcīkastu sa visṛjya ca tejasī //
suhṛṣṭo brāhmaṇaśreṣṭhaḥ svayaṃ ca mahito'bhavat

te caiva tu gṛhe gatvā prahṛṣṭenāṃtarātmanā //
ūcatuśca mithaste ca satyametadbhaviṣyati

tato mātā sutāṃ prāha ātmārthe sakalo janaḥ //
viśeṣaṃ kurute kṛtye sāmānye ca vyavasthite

tattavārthaṃ kṛto'nena yaścaruścārulocane //
yastasminvihito'nena mantragrāmo bhaviṣyati //
viśeṣeṇa mahābhāge satyametanmayoditam

tasmācca carukaṃ mahyaṃ tvaṃ gṛhāṇa śucismite //
ātmīyaṃ mama yacchasva vṛkṣābhyāṃ ca viparyayaḥ //
kriyatāṃ ca mahābhāge yena me syātsutottamaḥ

rājyakarmaṇi dakṣaśca śūraḥ parabalārdanaḥ //
tvadīyo dvijamātro'pi tava tuṣṭiṃ kariṣyati

atha sā vijane proktā tayā mātrā yaśasvinī //
akarodvyatyayaṃ vṛkṣe carau ca dvijasattamāḥ

tataḥ puṃsa vane snāte te śubhe cārulocane //
dadhāte garbhamevātha bhartuḥ saṃyogataḥ kṣaṇāt

tatastu garbhamāsādya sā ca trailokyasundarī //
kṣāttreṇa tejasā yuktā tatkṣaṇātsamapadyata //
mano rājye tataścakre hastyaśvārohaṇodbhave

yuddhavārttāstathā cakre devāsuragaṇodbhavāḥ //
śṛṇoti ca tathā nityaṃ vilāseṣu mano dadhe //
anuṣṭhānaṃ tataścakre manorājyasamudbhavam

piturgṛhātsamānīya jātyānaśvāṃstathā gajān //
raktāni caiva vastrāṇi kāśmīrādyaṃ vilepanam // २९ /१
taddṛṣṭvā ceṣṭitaṃ tasyā rājyārhaṃ bahubhogadhṛk //
brāhmaṇārhaiḥ parityaktaṃ samācāraiśca kṛtsnaśaḥ / ६.१६६.३० //
abravīcca tataḥ kruddho dhikpāpe kimidaṃ kṛtam //
vyatyayo vihito nūnaṃ carukasya nagasya ca

tvayā pāpe prapaśyāmi yenedṛktava ceṣṭitam /१
kṣatriyārhaṃ dvijācāraiḥ sakalaiḥ parivarjitam

cīravalkalasaṃtyaktaṃ snānajāpyavivarjitam //
saṃyuktaṃ vividhairgandhairmṛganābhipuraḥsaraiḥ / ३३ //
tava mātā śamasthā sā japahomaparāyaṇā //
tīrthayātrāparā caiva vedaśravaṇalālasā

tasmātte kṣatriyaḥ putro bhaviṣyati na saṃśayaḥ

mātuśca brāhmaṇaśreṣṭho brahmacaryakathāparaḥ //
bhaviṣyati sutaścihnairgarbhalakṣaṇasaṃbhavaiḥ

yasmādudīritaḥ pūrvaṃ śloko'yaṃ śāstracintakaiḥ //
yādṛśā dohadāḥ santi sagarbhāṇāṃ ca yoṣitām

tādṛgeva svabhāvena tāsāṃ putro'tra jāyate //
saivamuktā bhayatrastā vepamānā kṛtāṃjaliḥ //

bāṣpapūrṇekṣaṇā dīnā vākyametaduvāca ha //
satyametatprabho vākyaṃ yattvayā samudāhṛtam

atītānāgataṃ vetti vinā liṃgairbhavāniha //
tasmātkuru prasādaṃ me yathā syādbrāhmaṇaḥ sutaḥ //
kṣatriyasya tu putrasya bhavānnārhaḥ kathaṃcana

// ṛcīka uvāca // //
yatkiṃcidbrahmatejaḥ syāttannyastaṃ te carau mayā //
kṣāttraṃ tejaśca te māturvyatyayaṃ ca kathaṃcana //
karomi vādhamo loke śāstra sya ca vyatikramam

// patnyuvāca // //
yadyevaṃ bhṛguśārdūla mama pautro'tra yo bhavet //
kṣāttraṃ tejo'khilaṃ tasya gātre bhūyā ttvayā''hṛtam

putrastu brāhmaṇaśreṣṭho bhūyādabhyadhikastava

// ṛcīka uvāca // //
evaṃ bhavatu madvākyātputraste brāhmaṇaḥ śubhe //
pautraḥ sudurddharaḥ saṃkhye saṃyuktaḥ kṣāttratejasā

tataḥ satyaṃ varaṃ labdhvā prasannavadanā satī //
māturnivedayāmāsa tatsarvaṃ kāṃta jalpitam

tataḥ sā daśame māsi saṃprāpte gurudaivate //
nakṣatre janayāmāsa putraṃ bālārkasannibham

brāhmyā lakṣmyā samopetaṃ nidhānaṃ tapasāṃ śuci //
jamadagniriti khyāto yo'sau trailokyaviśrutaḥ //
tasya putrobhavatkhyāto rāmonāma mahāyaśāḥ

ekaviṃśatidā yena dharā niḥkṣatriyā kṛtā //
kṣāttratejaḥprabhāvena pitāmahaprasādataḥ

iti śrīskāṃde mahāpurāṇa ekāśītisāhasyā saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye paraśurāmotpattivarṇanaṃnāma ṣaṭṣaṣṭyuttaraśatatamo'dhyāyaḥ