Skanda Purana · Chapter 6.164

// sūta uvāca // //
etasminnaṃtare puṣpaḥ prahṛṣṭenāntarātmanā //
caṃḍaśarmagṛhaṃ gatvā diṣṭyādiṣṭyeti cābravīt

vivarṇavadanaṃ dṛṣṭvā vāṣpapūrṇekṣaṇaṃ tadā //
bāndhavaiḥ sahitaṃ sarvairdārairbhṛtyaistathā sutaiḥ

// puṣpa uvāca // //
tavārthe ca mayā sūryaḥ kāyatyāgena toṣitaḥ //
patitattvaṃ na te kāye tatprasādādbhaviṣyati //

tava putrāśca pautrāśca ye bhaviṣyaṃti vaṃśajāḥ //
nāgarāṇāṃ ca te sarve bhaviṣyaṃti guṇādhikāḥ

tasmāduttiṣṭha gacchāmo nadīṃ puṇyāṃ sarasvatīm //
tasyāstaṭe nivāsāya kṛtvā caivāśramaṃ dvija

tvayā saha vasiṣyāmi ahameva na saṃśayaḥ //
asti me vipulaṃ vittaṃ ye cānye te'nuyāyinaḥ

tānsarvānpoṣayiṣyāmi tyajyatāṃ mānaso jvaraḥ //
tacchrutvā caṇḍaśarmā tu putrairbaṃdhubhiranvitaḥ

sarasvatīṃ samuddiśya niṣkrāṃto nagarāttataḥ //
sthānaṃ pradakṣiṇīkṛtya namaskṛtya suduḥkhitaḥ

bāṣpapūrṇekṣaṇo dīna uttarābhimukho yayau //
puṣpeṇa sahitaścaiva muhurmuhuḥ prabodhitaḥ

tataḥ sarasvatīṃ prāpya puṇyāṃ śītajalāṃ nadīm //
sevitāṃ munisaṃghaistāṃ lolakallolamālinīm

tasyā dakṣiṇakūle sa nivāsamakarottadā //
puṣpasya matimāsthāya bandhubhiḥ sakalairvṛtaḥ

tasyāsīnnagarasthasya pratijñā caṇḍaśarmaṇaḥ //
saptaviṃśati bhirliṃgairdṛṣṭaibhokṣyāmyahaṃ sadā

tāṃ ca saṃsmaratastasya pratijñāṃ pūrvasaṃcitām //
hṛdayaṃ dahyate tasya divānaktaṃ dvijottamāḥ

sa ca snātvā sarasvatyāṃ śucirbhūtvā samāhitaḥ //
ṣaḍakṣarasya mantrasya japaṃ cakre pṛthakpṛthak

nāma coccārya liṃgasya namaskārāntamādadhe //
kardamena dvijaśreṣṭhāḥ paṃcāṃgulaśatena ca

saṃsthāpya pūjayedbhaktyā puṣpadhūpānulepanaiḥ //
prāṇarudrāñjapanpaścācchraddhayā parayā yutaḥ

duḥsthitaṃ susthitaṃ vāpi śivaliṃgaṃ na cālayet //
iti matvā dvijendro'sau naiva tāni visarjayet

uparyupari teṣāṃ ca kardamena dvijottamāḥ //
cakre liṃgāni nityaṃ sa saptaviṃśatisaṃkhyayā

tataḥ kālena mahatā jātaḥ kardamaparvataḥ

atha tuṣṭo mahādevastasya bhaktyatirekataḥ //
nirbhidya dharaṇīpṛṣṭhaṃ tasya liṃgamadarśayat

abravītsādaraṃ taṃ ca meghagambhīrayā girā //
caṇḍaśarmanpratuṣṭosmi tava bhaktyā'nayā dvija

tasmālliṃgamidaṃ nityaṃ pūjayasva prabhaktitaḥ //
saptaviṃśatiliṃgānāṃ yataḥ phalamavāpsyasi

anyopi ca naro bhaktyā yaścainaṃ pūjayiṣyati //
saptaviṃśatiliṃgānāṃ so'pi śreyo'bhilapsyati

evamuktvā sa bhagavāṃstataścādarśanaṃ gataḥ //
caṃḍaśarmāpi taṃ hṛṣṭaḥ pūjayāmāsa tattvataḥ

prāsādaṃ kārayāmāsa tasya liṃgasya śobhanam //
nāma cakre tatastasya vicārya ca muhurmuhuḥ

nagarasthita liṃgānāṃ yasmātsaṃsmaraṇātsthitaḥ //
nāgareśvarasaṃjñastu tasmādeṣa bhaviṣyati

// sūta uvāca // //
evaṃ saṃsthāpya talliṃgaṃ caṃḍaśarmā dvijottamāḥ //
ārādhayāmāsa tadā puṣpadhūpānulepanaiḥ

saptaviṃśatiliṃgānāṃ prāpnoti ca tathā phalam //
pūjitānāṃ dvijaśreṣṭhā nagare yāni tāni ca //

tataḥ kālena mahatā nāgareśvaratuṣṭitaḥ //
śivalokaṃ gataḥ sākṣādyānamadhye niveśitaḥ

puṣpopi sthāpayāmāsa puṣpādityamathāparam//
puṇye sarasvatītīre tataḥ pūjāparo'bhavat

tasyāpi darśanaṃ gatvā prītyā vacanamabravīt //
puṣpa tuṣṭosmi bhadraṃ te varaṃ prārthaya suvrata

adeyamapi dāsyāmi tasmātprārthaya mā ciram

// puṣpa uvāca // //
yadi tuṣṭo'si me deva yadi deyo varo mama //
taddehi yācamānasya mama yaddhṛdi saṃsthitam

camatkārapure deva tava yā mūrtayaḥ sthitāḥ //
dvādaśaiva pramāṇena pūjyāḥ sarvadivaukasām

tāsāṃ pūjāphalaṃ kṛtsnaṃ saṃprāpnotu naro bhuvi //
yaḥ pūjayati mūrtiṃ te yaiṣā saṃsthāpitā mayā

nāgarāditya ityeṣā khyātā bhavatu bhūtale //
yeyaṃ sarasvatītīre prāsāde sthāpitā mayā

// sūta uvāca // //
sa tatheti pratijñāya gataścādarśanaṃ raviḥ //
dīpavadbrāhmaṇaśreṣṭhāstadadbhutamivā bhavat

tataḥ kālena mahatā puṣpopi dvijasattamāḥ //
sūryalokamanuprāpto vimānena suvarcasā

śākambharīti vikhyātā bhāryā''sīccaṃḍaśarmaṇaḥ //
tayā saṃsthāpitā durgā sarasvatyāḥ śubhe taṭe

ārādhitā'tha sadbhaktyā divānaktaṃ dvijottamāḥ //
tatastuṣṭā varaṃ tasyāḥ sā dadau dvijasattamāḥ

/
putri tuṣṭāsmi bhadraṃ te śākaṃbhari pragṛhyatām //
varaṃ yatte sadābhīṣṭaṃ matprasādādasaṃśayam

// śākambharyuvāca // //
catuḥṣaṣṭigaṇā devi mātṛṇāṃ ye vyavasthitāḥ//
camatkārapure khyātā hāsyāttuṣṭiṃ vrajaṃti yāḥ

yā rātrau balidānena jāte vṛddhau tataḥ param//
tatsarvaṃ jāyatāṃ puṇyaṃ yaste mūrtiṃ prapūjayet

atrāgatya nadītīre yaiṣā saṃsthāpitā mayā

// śrīdevyuvāca // //
āśvinasya site pakṣe mahānavamisaṃjñite //
yo mamāgre samāgatya pūjayiṣyati bhaktitaḥ

tasya kṛtsnaṃ phalaṃ sadyo bhaviṣyati na saṃśayaḥ //
nāgarasya viśeṣeṇa satyametanmayoditam

evamuktvā tu sā devī tataścādarśanaṃ gatā //
tasyā nāmnā ca sā devī proktā śākambharī bhuvi

vṛddheranaṃtaraṃ tasyā yaḥ pūjāṃ kurute naraḥ //
tasya vṛddherna vighnaḥ syātkadāciddvijasattamāḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe
śrīhāṭakeśvarakṣetramāhātmye nāgareśvaranāgarādityaśākambharyutpattivarṇanaṃnāma
catuḥṣaṣṭyuttaraśatatamosdhyāyaḥ