Skanda Purana · Chapter 6.161

// sūta uvāca // //
atha tena dvijāḥ sarve brahmasthāne niveśitāḥ //
cātuścaraṇasaṃjñāśca tatastasya niveśitāḥ

so'pi keśānparityajya sarvagātrasamudbhavān //
nijapatnyā samopetaḥ praṇamya ca dvijottamān

kṛtāṃjalipuṭo bhūtvā vākyametaduvāca ha //
bhāskarasyāsya vihitaḥ prāsādoyaṃ mayā dvijāḥ

puṣpāditya iti khyātiṃ prayātu bhuvanatraye //
// brāhmaṇā ūcuḥ // //
na vayaṃ yājñavalkyasya kīrtiṃ neṣyāmahe kṣayam

prāyaścittaṃ pradāsyāmaścittasya hṛdayaṃgamam //
anye ca brāhmaṇāḥ procuḥ kecinmadhyasthavṛttayaḥ

vṛttyarthamasya devasya lakṣaṃ home'tra kalpyatām //
lakṣaṃ tu sarvaviprāṇāṃ prāyaścittaviśuddhaye

// puṣpa uvāca // //
tasmātsarve dvijaśreṣṭhā mannāmnā kīrtayaṃtvimam //
puṣpādityamiti khyātiṃ kīrtayaṃtu tathāniśam

anayā bhāryayā mahyaṃ mānyā yā sthāpitā purā //
durgā'syāścātra nāmnā vai bhūyātkhyātā'tra satpure

// brāhmaṇā ūcuḥ // //
duḥśīlena purā'kāri prāsādo harasaṃbhavaḥ //
durvāsaḥsthāpitasyāpi bhavadbhistuṣṭa mānasaiḥ

tathāpyasya tu dīnasya prāsādaḥ kriyatāṃ dvijāḥ

nāmamātreṇa devasya duḥśīlena yayā purā //
anenārādhitaḥ pūrvaṃ svamāṃsaireṣa bhāskaraḥ

tasmānna kṣatirasyātha datte nāmni yathā purā //
nāmnā māhikayā nāma māhītyeva ca sā bhavet

// sūta uvāca //
puṣpeṇa dāne datte'tha saṃmatenāgrajanmanām //
madhyamena kṛtaṃ nāma puṣpāditya iti śrutam

tatpatnyā cāpi yā tatra durgā devī dvijottamāḥ //
nāmnā māhikayā nāma māhītyeva ca sā'bhavat

// sūta uvāca // //
etadvaḥ sarvamākhyātaṃ yatpṛṣṭosmi dvijottamāḥ //
puṣpā dityo yathā jāto yājñavalkyapratiṣṭhitaḥ

adyāpi kalikāle sa dṛṣṭo bhaktyā sureśvaraḥ //
nāśayeddinajaṃ pāpaṃ narāṇāṃ nātra saṃśayaḥ //

tathā ca saptamīyukte ravervāre dvijottamāḥ //
aṣṭottaraśataṃyāvatphalahastaḥ karoti yaḥ //
pradakṣiṇāṃ ca sadbhaktyā sa labhedvāṃchitaṃ phalam

māhīkāmapi yo durgāṃ nityameva prapaśyati //
na sa paśyati kaṣṭāni tasminnahani karhicit

caitraśuklacaturdaśyāṃ yastāṃ pūjayate naraḥ /
tasya saṃvatsaraṃyāvannāpatsaṃjāyate kvacit // १९. //
iti śrīskāṃdemahāpurāṇaekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye puṣpādityamāhātmyavarṇanaṃnāmaikaṣaṣṭyuttaraśatatamo'dhyāyaḥ