સ્કંદ પુરાણ · અધ્યાય 6.161

॥ સૂત ઉવાચ ॥ ॥
અથ તેન દ્વિજાઃ સર્વે બ્રહ્મસ્થાને નિવેશિતાઃ ॥
ચાતુશ્ચરણસંજ્ઞાશ્ચ તતસ્તસ્ય નિવેશિતાઃ

સોઽપિ કેશાન્પરિત્યજ્ય સર્વગાત્રસમુદ્ભવાન્ ॥
નિજપત્ન્યા સમોપેતઃ પ્રણમ્ય ચ દ્વિજોત્તમાન્

કૃતાંજલિપુટો ભૂત્વા વાક્યમેતદુવાચ હ ॥
ભાસ્કરસ્યાસ્ય વિહિતઃ પ્રાસાદોયં મયા દ્વિજાઃ

પુષ્પાદિત્ય ઇતિ ખ્યાતિં પ્રયાતુ ભુવનત્રયે ॥
॥ બ્રાહ્મણા ઊચુઃ ॥ ॥
ન વયં યાજ્ઞવલ્ક્યસ્ય કીર્તિં નેષ્યામહે ક્ષયમ્

પ્રાયશ્ચિત્તં પ્રદાસ્યામશ્ચિત્તસ્ય હૃદયંગમમ્ ॥
અન્યે ચ બ્રાહ્મણાઃ પ્રોચુઃ કેચિન્મધ્યસ્થવૃત્તયઃ

વૃત્ત્યર્થમસ્ય દેવસ્ય લક્ષં હોમેઽત્ર કલ્પ્યતામ્ ॥
લક્ષં તુ સર્વવિપ્રાણાં પ્રાયશ્ચિત્તવિશુદ્ધયે

॥ પુષ્પ ઉવાચ ॥ ॥
તસ્માત્સર્વે દ્વિજશ્રેષ્ઠા મન્નામ્ના કીર્તયંત્વિમમ્ ॥
પુષ્પાદિત્યમિતિ ખ્યાતિં કીર્તયંતુ તથાનિશમ્

અનયા ભાર્યયા મહ્યં માન્યા યા સ્થાપિતા પુરા ॥
દુર્ગાઽસ્યાશ્ચાત્ર નામ્ના વૈ ભૂયાત્ખ્યાતાઽત્ર સત્પુરે

॥ બ્રાહ્મણા ઊચુઃ ॥ ॥
દુઃશીલેન પુરાઽકારિ પ્રાસાદો હરસંભવઃ ॥
દુર્વાસઃસ્થાપિતસ્યાપિ ભવદ્ભિસ્તુષ્ટ માનસૈઃ

તથાપ્યસ્ય તુ દીનસ્ય પ્રાસાદઃ ક્રિયતાં દ્વિજાઃ

નામમાત્રેણ દેવસ્ય દુઃશીલેન યયા પુરા ॥
અનેનારાધિતઃ પૂર્વં સ્વમાંસૈરેષ ભાસ્કરઃ

તસ્માન્ન ક્ષતિરસ્યાથ દત્તે નામ્નિ યથા પુરા ॥
નામ્ના માહિકયા નામ માહીત્યેવ ચ સા ભવેત્

॥ સૂત ઉવાચ ॥
પુષ્પેણ દાને દત્તેઽથ સંમતેનાગ્રજન્મનામ્ ॥
મધ્યમેન કૃતં નામ પુષ્પાદિત્ય ઇતિ શ્રુતમ્

તત્પત્ન્યા ચાપિ યા તત્ર દુર્ગા દેવી દ્વિજોત્તમાઃ ॥
નામ્ના માહિકયા નામ માહીત્યેવ ચ સાઽભવત્

॥ સૂત ઉવાચ ॥ ॥
એતદ્વઃ સર્વમાખ્યાતં યત્પૃષ્ટોસ્મિ દ્વિજોત્તમાઃ ॥
પુષ્પા દિત્યો યથા જાતો યાજ્ઞવલ્ક્યપ્રતિષ્ઠિતઃ

અદ્યાપિ કલિકાલે સ દૃષ્ટો ભક્ત્યા સુરેશ્વરઃ ॥
નાશયેદ્દિનજં પાપં નરાણાં નાત્ર સંશયઃ ॥

તથા ચ સપ્તમીયુક્તે રવેર્વારે દ્વિજોત્તમાઃ ॥
અષ્ટોત્તરશતંયાવત્ફલહસ્તઃ કરોતિ યઃ ॥
પ્રદક્ષિણાં ચ સદ્ભક્ત્યા સ લભેદ્વાંછિતં ફલમ્

માહીકામપિ યો દુર્ગાં નિત્યમેવ પ્રપશ્યતિ ॥
ન સ પશ્યતિ કષ્ટાનિ તસ્મિન્નહનિ કર્હિચિત્

ચૈત્રશુક્લચતુર્દશ્યાં યસ્તાં પૂજયતે નરઃ ।
તસ્ય સંવત્સરંયાવન્નાપત્સંજાયતે ક્વચિત્ ॥ ૧૯. ॥
ઇતિ શ્રીસ્કાંદેમહાપુરાણએકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે પુષ્પાદિત્યમાહાત્મ્યવર્ણનંનામૈકષષ્ટ્યુત્તરશતતમોઽધ્યાયઃ