Skanda Purana · Chapter 6.159

// sūta uvāca // //
puṣpo'pi tāṃ samādāya māhikākhyāṃ varāṃganām //
sa tadā prayayau hṛṣṭo maṇibhadrasya maṃdiram

śaṃkhatūryaninādena sarvaistaiḥ svajanairvṛtaḥ //
na kasya tatra saṃbhūto vikalpastatsamudbhavaḥ

bhāskarasya prasādena tathaivānyasya karhicit //
so'pi maṃdiramāsādya yathātmapitṛsaṃbhavam

upaviśya tato madhye bandhūnsarvānsamāhvayat //
adya tāvaddine mahyaṃ tulāgraṃ kamalā śritā

calitāpi punaścāsyāḥ supatnyā vākyataḥ sthitā //
kiyaṃtaṃ caiva kālaṃ me kārpaṇyaṃ mahadāsthitam

jñātamadya calā lakṣmīstena tyaktaṃ sudūrataḥ //
tasmādbaṃdhujanaiḥ sārdhaṃ devairvipraiśca kṛtsnaśaḥ //
saṃvibhaktāṃ kariṣyāmi satyenātmānamālabhe

evamuktvā tataḥ sarvānsamāhūya pṛthakpṛthak //
sa nāmabhirdadau vastraṃ bhūṣaṇāni yathārhataḥ

tato vedavido viprānsamāhūya sa nāmabhiḥ //
ekaikasya dadau vittaṃ savastraṃ śraddhayānvitaḥ

tatastu nartakebhyaśca dīnāṃdhebhyo viśeṣataḥ //
dadau bhojyaṃ sami ṣṭānnaṃ savastraṃ ca dvijottamāḥ

tatastu svayamevānnaṃ bubhuje bhāryayā saha //
visṛjya tānsamāyātānsvajanānbrāhmaṇaiḥ saha

evaṃ tena tadā prāptaṃ vittaṃ ca parasaṃbhavam //
bubhuje svecchayā nityaṃ tadā bhāryāsamanvitaḥ

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye puṣpavibhavaprāptivarṇanaṃnāmaikonaṣaṣṭyuttaraśatatamo'dhyāyaḥ