Skanda Purana · Chapter 6.157

// sūta uvāca // //
evaṃ saṃbodhitastaistu lokaiḥ puṣpastadā dvijāḥ //
tānabravīttataḥ kuddho na kariṣyāmi bhojanam

yāvanna cāsya pāpasya kariṣyāmi pratikriyām //
tadvadadhvaṃ mahābhāgā devo vā devatā'thavā

tathānye siddhamantrā vā sadyaḥ pratyayakārakāḥ //
ārādhitā yathā sadyo mānuṣāṇāṃ varapradāḥ

// janā ūcuḥ // //
eko devaḥ sthitaścātra sadyaḥpratyayakārakaḥ //
tathaikā devatā cātra śrūyate jagatī tale

// puṣpa uvāca // //
ko'sau devaḥ kiyaddūre kasminsthāne vyavasthitaḥ //
tathā ca devatā brūta dayāṃ kṛtvā mamopari

//
// janā ūcuḥ // //
camatkārapure sūryo yājñavalkyapratiṣṭhitaḥ //
asti vipra śruto'smābhiḥ sadyaḥ pratyayakārakaḥ

sūryavāreṇa saptamyāṃ phalahastaḥ pradakṣiṇām //
yaḥ karoti narastasya hyaṣṭottaraśataṃ dvija

tasya siddhipradaḥ samyaṅmanasā vāṃchitaṃ dadet //
tathānyā śāradā nāma devī kāśmīrasaṃsthitā

upavāsakṛtereva sāpi siddhipradāyinī //
tacchrutvā vacanaṃ teṣāṃ janānāṃ sa dvijottamāḥ

samuddiśya camatkāraṃ tasmātsthānāttataḥ param //
camatkārapuraṃ prāpya saptamyāṃ sūryavāsare

tatrāgatya tataḥ snātvā śucirbhūtvā samāhitaḥ //
gataḥ saṃti ṣṭhate yatra yājñavalkyakṛto raviḥ

tataḥ pradakṣiṇāḥ kṛtvā aṣṭottaraśataṃ mitāḥ //
nālikerāṇi cādāya śraddhayā parayāḥ yutaḥ

tataḥ kṣutkṣāmakaṃṭhaḥ sa pariśrāṃtastadagrataḥ //
upaviṣṭo japaṃ kurvansūryeṣṭaiḥ stavanaistadā

maṃḍalabrāhmaṇādyaiśca tāraṃ svaramupāśritaḥ //
saptayuṃjara vādyaiśca agnireveti bhaktitaḥ

ādityavratasaṃjñādyaiḥ sāmabhirdṛḍhabhaktibhāk //
kṣurikāmaṃtrapūrvaiśca tathaivātharvaṇodbhavaiḥ

yāvadanyorkavārastu naiva tuṣṭo divākaraḥ //
paurṇamāsīdine prāpte vairāgyaṃ paramaṃ gataḥ

tataḥ puṣpo vidhāyātha snānaṃ dhautāṃbaraḥ śuciḥ //
bhūnāmnā sādhya bhūmiṃ ca sthaṃḍilārthaṃ dvijottamāḥ

sthaṃḍilaṃ hastamātraṃ ca sthaṃḍile pratyakalpayat //
agnimīḻetimaṃtreṇa tato'gniṃ sa nidhāya ca

tṛṇaiḥ paristṛṇāmītikṛtvopastaraṇaṃ tataḥ //
ābrahmanniti mantreṇa dattvā brahmāsanaṃ tataḥ

sutrāmāṇamiti procya samidhaḥsthāpanaṃ ca yat //
prokṣaṇīpātramāsādya prokṣaṇaṃ kṛtavāṃstataḥ

pātrāṇāmatha sarveṣāṃ sruvādīnāṃ yathākramam //
tataḥ prakalpayāmāsa haviḥsthāne nijāṃ tanum //

nyāyaṃ tu devatāsthāne sa ācāryavidhānataḥ //
grahaṇaṃ prokṣaṇaṃ caiva sūryāya tveti cottaram

ayaṃ ta idhma ātmeti japtvātha samidhaṃ tataḥ //
agnisometi mantrābhyāṃ hutvā cājyāhutī tataḥ

kṛtvā vyāhṛtihomaṃ tu bhūrbhuvaḥ sveti bho dvijāḥ //
ye te śateti mantrādyairhutvātraiva ca dāruṇam

āhvayāmāsa vahniṃ ca pratyakṣo bhava deva me //
evaṃ mantreṇa kṛtvā taṃ saṃmukhaṃ jvalanaṃ tataḥ

kālīkarālikādyāśca saptajihvāśca yāḥ smṛtāḥ //
tāsāmāhvānakaṃ kṛtvā tato dīpte havirbhuji

juhāva ca sa māṃsāni svāni cotkṛttya śastrataḥ //
lomabhyaḥ svāheti vidiśo digbhyo dattvā tataḥ param

agnaye sviṣṭakṛtaiti yāvadātmānamākṣipet //
tāvaddhṛtaḥ sa sūryeṇa svahastena samaṃtataḥ

dhṛtaśca sādaraṃ tena mā vipra kuru sāhasam //
nedṛgghomaḥ kṛtaḥ kvāpi kadācitkenaciddvija //

tuṣṭo'haṃ ca mahābhāga brūhi kiṃ karavāṇi te //
adeyamapi dāsyāmi yatte manasivartate

// puṣpa uvāca // //
yadi tuṣṭosi deveśa yadi deyo varo mama //
taddeyaṃ guṭikāyugmaṃ yadarthaṃ prārthayāmyaham

vaidiśe nagare cāsti maṇibhadro mahādhanī //
kubjāṃgaḥ kṣatriyo deva jarāvalisamanvitaḥ

abrahmaṇyo mahānīcaḥ kīnāśo janadūṣitaḥ //
dvayorekāṃ yadā vaktre sadā caiva karomyaham

tadā me tādṛśaṃ rūpamavikalpaṃ bhavatviti //
yadā punargṛhītvā tāṃ dvitīyāṃ prakṣipāmyaham

tataśca sahajaṃ rūpaṃ mama bhūyātsureśvara //
vaidiśe nagare cāsti maṇibhadraḥ sureśvara

aparaṃ tasya yatkiṃciddhanadhānyādikaṃ gṛhe //
tatsarvaṃ viditaṃ me syāttathā deva prajāyatām

kiṃ vānena bahūktena tasya mitrāṇi bāṃdhavāḥ //
vyavahārāstathā sarve prakaṭāḥ syuḥ sadaiva hi

na kaścijjāyate tatra vikalpaḥ kasyacitkvacit //
mama tasyādhama syāpi sarvakṛtyeṣu sarvadā

// bhāskara uvāca // //
gṛhāṇa tvaṃ mahābhāga guṭikādvitayaṃ śubham //
śuklaṃ kṛṣṇaṃ ca vaktrasthaṃ vibheda jananaṃ mahat

śuklayā tasya rūpaṃ ca tava nūnaṃ bhaviṣyati //
kṛṣṇayāpi punaḥ svaṃ ca saṃprāpsyasi mahādvija

// puṣpa uvāca // //
aparaṃ vada me deva saṃdehaṃ hṛdaye sthitam //
yattvāṃ pṛcchāmi deveśa tava kīrtivivardhanam

mayā śrutaṃ suraśreṣṭha saptamyāṃ sūryavāsare //
yaste pradakṣiṇānāṃ ca kuryādaṣṭottaraṃ śatam //
tasya tvaṃ tatkṣaṇādeva phalahastasya siddhidaḥ

mūrkhasyāpi ca pāpasya sarvadoṣānvitasya ca //
caturvedasya me kasmāttīrthayātrāparasya ca

saptarātre gate tuṣṭo homa evaṃvidhe kṛte

// śrīsūrya uvāca// //
tāmasena tu bhāvena tvavā sarvamidaṃ kṛtam//
tena sarvaṃ vṛthā jātaṃ tvayā sarvaṃ ca yatkṛtam

yatkiṃcitkriyate vipra tāmasaṃ bhāvamāśritaiḥ //
tatsarvaṃ jāyate vyarthaṃ kiṃ na vetti bhavā nidam

evamuktvā tataḥ sūryastasya gātrāṇyupāspṛśat //
khaṃḍitāni svahastena nirvraṇāni kṛtāni ca

abravīcca punaḥ puṣpaṃ prasanna vadanaḥ sthitaḥ //
anenaiva vidhānena yaḥ karoti kuśaṃḍikām

somyabhāvaṃ samāśritya samidbhiścārkasaṃbhavaiḥ //
tilākṣatairviśeṣeṇa homaṃ yastu samācaret

chandaṛṣisamopetamekaṃ yāvatsahasrakam //
tasya dāsyāmyahaṃ hṛtsthamadhikebhyo'dhikaṃ phalam

/
evamuktvā sahasrāṃśustatraivāṃ taradhīyata //
dīpavallakṣito naiva kena mārgeṇa nirgataḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye sūryasakāśātpuṣpabrāhmaṇasya varalabdhivarṇanaṃnāma saptapañcāśaduttaraśatatamo'dhyāyaḥ