Skanda Purana · Chapter 6.154

// sūta uvāca // //
yā nārī tatra satkuṇḍe snātvā tāṃ pārvatīṃ punaḥ //
dṛṣṭvā snāti tatastīrthe tasminrūpamaye śubhe

punaśca pārvatīṃ paśyecchraddhayā parayā yutā //
sadyaḥ sā mucyate kṛtsnairājanmamaraṇāṃtikaiḥ

tatraivāsti jayānāma pārvatyāḥ kiṃkarī dvijāḥ //
tayā tatra kṛtaṃ kuṇḍaṃ gaurīkuṇḍasamīpataḥ

yā tatra kurute snānaṃ tṛtīyādivase'balā //
sutasaubhāgyasaṃpannā sā bhavetpativallabhā

tathānyadapi tatrāsti vijayākuṇḍamuttamam //
tatra snātā'pi vaṃdhyā strī jāyate putrasaṃyutā

na ca paśyati putrāṇāṃ kadācidvyasanaṃ dvijāḥ //
na viyogaṃ na duḥkhaṃ ca svapnāṃte ca kadācana

kākavaṃdhyā'pi yā nārī tatra snānaṃ samācaret//
sā putrānvividhām̐llabdhvā svargaloke mahīyate

//
// ṛṣaya ūcuḥ // //
eteṣāṃ sūta tīrthānāṃ tīrthamasti susiddhidam//
kvacitkiṃñcidbhavetsiddhiryatra snānāccharīrajā

// sūta uvāca // //
saptaviṃśatiliṃgāni yāni saṃti dvijottamāḥ //
teṣāṃ madhye'bhavatsiddhirekasminnikhilā dvijāḥ

ekasya sattvayuktasya vīravratayutasya ca //
āśvinasya caturdaśyāṃ kṛṣṇāyāṃ dvijasattamāḥ

ardharātre vidhānena teṣāṃ pūjāṃ karoti yaḥ //
prāguktaṃ japanaṃ bhaktyā sa kramātsādhakottamaḥ

aṃganyāsaṃ vidhāyoccaiḥ kṣurikāsūktamuccarat //
teṣāmagre punaḥ samyakpūjayitvā ca śaṃkaram

pṛthagekaikaśo bhaktyā pūjayeddikpatīṃśca vai

athā''gatya gaṇeśo vai vikarālo bhayānakaḥ //
laṃbodaro vai nagnaśca kṛṣṇadantasamudbhavaḥ

khaḍgahasto'bravīdyuddhaṃ prakuruṣva mayā samam //
muktvaitatkapaṭaṃ bhūmau yadi vīro'si sāttvikaḥ

tatastatkarṣaṇāccāpi yastenāśu pratāḍyate //
sa tenaiva śarīreṇa nīyate tena tatpadam

yatra sthāne jarāmṛtyurna śokaśca kadācana //
tathā citreśvarīpīṭhe siddhirekasya kīrtitā

māghakṛṣṇacaturdaśyāṃ yaḥ pīṭhaṃ tatra pūjayet //
āgamoktavidhānena samyakchraddhāsamanvitaḥ

paścātkapālamādāya mahāmāṃsaprapūritam //
ahamasya karomyadya mahāmāṃsasya vikrayam

siddhimūlye na gṛhṇātu kaściccedasti sāttvikaḥ //
tataśca yācate yaśca pragṛhṇāti ca saddvijāḥ

sa tamādāya niryāti yatra devo maheśvaraḥ //
hāṭakeśvarajaṃ liṃgaṃ citraśarmapratiṣṭhitam

tasya sthānasya madhyastho yastaṃ pūjayate naraḥ //
śivarātrau niśīthe ca puṣpalakṣaṇabhaktitaḥ //
susiddhimāpnuyāttūrṇaṃ sa śarīreṇa tatkṣaṇāt

siddhisthānāni sarvāṇi tasminkṣetre sthitāni vai//
vīravrataprayuktānāṃ mānavānāṃ dvijottamāḥ

//
// ṛṣaya ūcuḥ // //
tāmaso yastvayā proktaḥ siddhimārgo mahāmate //
anarho brāhmaṇendrāṇāṃ śrotriyāṇāṃ viśeṣataḥ

śuddhāntaḥ karaṇaiḥ sūta bhūtahiṃsāvivarjitaiḥ //
yathā saṃprāpyate mokṣo brāhmaṇaiḥ sucirādapi

tattvaṃ brūhi mahābhāga mokṣopāyaṃ dvijanmanām

//
// sūta uvāca // //
rudrairdaśabhiḥ saṃyuktamānaṃdeśvarakaṃ tathā //
snātvā tadagrataḥ kuṇḍe śāstradṛṣṭena karmaṇā

saṃsiddhimāpnuyānmartyo durlabhāṃ tridaśairapi //
māghamāse naraḥ snātvā viśvāmitrahrade naraḥ

pratyūṣe tilapātraṃ ca brāhmaṇāya nivedayet //
sarvapāpavinirmukto brahma loke mahīyate

yadyapi syāddurācāraḥ sarvāśī sarvavikrayī //
suparṇākhyasya devasya purataḥ śraddhayā'nvitaḥ

prāyopaveśanaṃ kṛtvā hyupavāsaparo naraḥ //
yastyajenmānavaḥ prāṇānna sa bhūyo'bhijāyate

evaṃ siddhitrayaṃ proktaṃ brāhmaṇānāṃ hitāvaham //
sāttvikaṃ brāhmaṇaśreṣṭhāḥ śaṃsitaṃ tridaśairapi

anyāni tatra tīrthāni devatāyatanāni ca //
tāni svargapradānyāhurmunayaḥ śaṃsitavratāḥ

etadvaḥ sarvamākhyātaṃ kṣetramāhātmyamuttamam //
hāṭakeśvaradevasya sarvapātakanāśanam

yo'tra sarveṣu tīrtheṣu snātvā paśyati bhaktitaḥ //
sarvāṇyāyatanānyeva sa pāpo'pi vimucyate

etatkhaṃḍaṃ purāṇasya prathamaṃ parikīrtitam //
kārtikeyapraṇītasya sarvapāpaharaṃ śubham

yaścaitatkīrtayedbhaktyā śṛṇuyādvā samāhitaḥ //
iha bhuktvā suvipulānbhogānyāti triviṣṭapam

sarvatīrtheṣu yatpuṇyaṃ sarvadānaiśca yatphalam //
tatphalaṃ samavāpnoti śṛṇvañchraddhāsamanvitaḥ

śrutvā purāṇametaddhi janmakoṭisamudbhavāt //
pātakādvipramucyeta kulānāmuddharecchatam

tato vyāsaḥ pūjanīyo vastradānādibhūṣaṇaiḥ //
gobhūhiraṇyanirvāpairdānaiśca vividhairapi

tena saṃpūjito vyāsaḥ kṛṣṇadvaipāyanaḥ manuḥ //
sākṣātsatyavatīputro yena vyāsaḥ supūjitaḥ

ekamapyakṣaraṃ yastu guruḥ śiṣye nivedayet//
pṛthivyāṃ nāsti taddravyaṃ yaddattvā hyanṛṇī bhavet

etatpavitramāyuṣyaṃ dhanyaṃ sva styayanaṃ mahat//
yacchrutvā sarvaduḥkhebhyo mucyate nātra saṃśayaḥ//४३/
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvara kṣetramāhātmye citreśvarīpīṭhakṣetramāhātmyavarṇanaṃnāma catuḥpaṃcāśaduttaraśatatamo'dhyāyaḥ