Skanda Purana · Chapter 6.152

// ṛṣaya ūcuḥ // //
asaṃkhyātāni tīrthāni tvayoktā nyatra sūtaja //
devamānuṣajātāni devatāyatanāni ca //
tathā vānarajātāni rākṣasasthāpitāni ca

sūtaputra vadāsmākaṃ yairdṛṣṭaiḥ sparśitairapi //
sarveṣāṃ labhyate pūrṇaṃ phalaṃ cepsitamatra ca

// sūta uvāca // //
satyametanmahābhāgāstatra saṃkhyā na vidyate //
tīrthānāṃ caiva liṃgānāmāśra māṇāṃ tathaiva ca

tatra yaḥ kurute snānaṃ śaṃkhatīrthe samāhitaḥ //
ekādaśyāṃ viśeṣeṇa sarveṣāṃ labhate phalam

yaḥ paśyati naro bhaktyā tatraikādaśarudrakam //
siddheśvarasamaṃ tena dṛṣṭāḥ sarve maheśvarāḥ

yaḥ paśyati vaṭādityaṃ ṣaṣṭhyāṃ caitre viśeṣataḥ //
bhāskarākṛtsnaśo dṛṣṭāstena tatrahi saṃsthitāḥ

māhitthāṃ paśyati tathā ye devīṃ śraddhayāvitāḥ //
tena durgāḥ samastāstā vīkṣitā nātra saṃśayaḥ

yaḥ paśyati gaṇeśaṃ ca svargadvārapradaṃ nṛṇām //
sarve vināyakāstena dṛṣṭāḥ syurnātra saṃśayaḥ

śarmiṣṭhāsthāpitāṃ gaurīṃ yo jyeṣṭhāṃ tatra paśyati //
tena gauryaḥ samastāstā vīkṣitā dvijasattamāḥ

cakrapāṇiṃ ca yaḥ paśyetprātarutthāya mānavaḥ //
vāsudevā samastāśca tena tatra nirīkṣitāḥ

//
// ṛṣaya ūcuḥ // //
tvayāsūta tathā'smākaṃ cakrapāṇiśca yaḥ sthitaḥ //
nākhyātaḥ sa kathaṃ tatra vismṛtaḥ kiṃ vadasva naḥ //
kasminkāle viśeṣeṇa sa draṣṭavyo manīṣibhiḥ

// sūta uvāca // //
arjunenaiṣa viprendrāḥ kṣetre'traiva pratiṣṭhitaḥ //
śayane bodhane caiva prātarutthāya mānavaḥ

snānaṃ kṛtvā subhaktyā ca yaḥ paśyeccakrapāṇinam //
brahmahatyādipāpāni tasya naśyaṃti tatkṣaṇāt

bhūbhārottāraṇārthāya dharmasaṃsthāpanāya ca //
brahmaṇāvatāritau viprā naranārāyaṇāvubhau

kṛṣṇārjunau tadā martye dvāparāṃte dvijottamāḥ //
avatīrṇo dharāpṛṣṭhe mithaḥ snehānugau tadā //
naranārāyaṇāvetau svayameva vyavasthitau

yathā rakṣovināśāya rāmo daśarathātmajaḥ //
avatīrṇo dharāpṛṣṭhe tadvatkṛṣṇo'pi cāparaḥ

yadā pārthaḥ samāyātastīrthayātrāṃ prati dvijāḥ //
yudhiṣṭhirasamādeśācchakraprasthātpurottamāt // १७
draupadyā sahitaṃ dṛṣṭvā rahasi bhrātaraṃ dvijam //
provāca praṇato bhūtvā vinayāvanato'rjunaḥ

// arjuna uvāca // //
āyudhārthamahaṃ prāptaḥ sāṃprataṃ pārthivottama //
dvijadhenuvimokṣāya mamājñāṃ dehi pārthiva

// yudhiṣṭhira uvāca // //
gacchārjuna drutaṃ tatra nīyante yatra taskaraiḥ //
dhenavo dvijavaryasya tā mokṣaya dhanaṃjaya

tīrthayātrāṃ tato gaccha yāvaddvādaśavatsarān //
tataḥ pāpavinirmuktaḥ sameṣyasi mamāṃtikam

yaḥ sadāraṃ naraṃ paśyedekāṃtasthaṃ tu buddhimān //
api cātyaṃtapāpaḥ syātkiṃ punarnijabāṃdhavam

tasmānna vīkṣayetkañcidekāṃtasthaṃ sabhāryakam //
bāṃdhavaṃ ca viśeṣeṇa ya icchecchubhamātmanaḥ

sa tatheti pratijñāya rathamāruhya satvaram //
dhanurādāya bāṇāṃśca jagāma tadanantaram

yena mārgeṇa tā gāvo nīyante taskarairbalāt //
tiraskṛtya dvijānsarvāñchitaśastradharairdvijāḥ

atha hatvā kṣaṇāccaurāngāḥ sarvāḥ svayamāhṛtāḥ //
svāḥ svā nivedayāmāsa brāhmaṇānāṃ mahātmanām

tatastīrthānyanekāni sa dṛṣṭvāyatanāni ca //
kṣetre'traiva samāyātaḥ snānārthaṃ pāṃḍunandanaḥ

tena pūrvamapi prāyastatkṣetramavalokitam //
duryodhanasamāyukto yadā tatra samāgataḥ

atha saṃpūjayāmāsa yalliṃgaṃ sthāpitaṃ purā //
arjuneśvara saṃjñaṃ tu puṣpadhūpānulepanaiḥ

anyeṣāṃ kauravendrāṇāṃ pāṃḍavānāṃ viśeṣataḥ

atha saṃciṃtayāmāsa manasā pāṃḍunaṃdanaḥ //
ahaṃ naraḥ svayaṃ sākṣātkṛṣṇo nārāyaṇaḥ svayam

tasmādatra kariṣyāmi cakrapāṇiṃ sureśvaram //
prāsādo mānavaścaiva yādṛṅnāsti dharātale

kalpāṃte'pi na nāśaḥ syādasya kṣetrasya karhicit //
prāsādo'pi tathāpyevamatra kṣetre bhaviṣyati ३३ //
evaṃ sa niścayaṃ kṛtvā svacitte pāṃḍavānujaḥ //
prāsādaṃ nirmame paścādvaiṣṇavaṃ dvijasattamāḥ

tato viprānsamāhūya camatkārapurodbhavān//
pratiṣṭhāṃ kārayāmāsa mataṃ teṣāṃ samāśritaḥ

dattvā dānānyanekāni śāsanāni bahūni ca //
anyacca pradadau paścātsa teṣāṃ tuṣṭidāyakam

tataḥ provāca tānsarvānkṛtāṃjalipuṭaḥ sthitaḥ//
naro'haṃ brāhmaṇājjātaḥ pāṇḍorbhūmiṃ prapedivān

mānuṣeṇaiva rūpeṇa tyaktvā tāṃ badarīṃ śubhām //
prasiddhyarthaṃ mayā cātra prāsādo'yaṃ vini rmitaḥ //
mannāmnā narasaṃjñaśca śraddhāpūtena cetasā

tasmādeṣa bhavadbhiśca cakrapāṇiriti dvijāḥ //
kīrtanīyaḥ sadā yena mama nāma prakāśya tām

viṣṇuloke dhvaniryāti yāvaccaṃdradivākarau

tathā mahotsavaḥ kāryaḥ śayane bodhane hareḥ //
caitramāse viśeṣeṇa saṃprāpte viṣṇuvāsare

eteṣu triṣu lokeṣu tyaktvemāṃ badarīmaham //
pūjāmasya kariṣyāmi svayaṃ viṣṇordvijottamāḥ

yastatra divase martyaḥ pūjāmasya vidhā syati //
sarvapāpavinirmukto viṣṇulokaṃ sa yāsyati

tathā ye vāsudevasya kṣetre kecidvyavasthitāḥ //
teṣāṃ pradarśanaṃ śreyo nityaṃ dṛṣṭvā ca lapsyate

sūta uvāca//
bāḍhamityeva tairukto dāśārhaḥ pāṃḍunaṃdanaḥ//
teṣāṃ tadbhāramāveśya praśāṃtenāṃtarātmanā//
yayau tīrthāni cānyāni kṛtakṛtyastataḥ param

evaṃ tatra sthito devaścakrapāṇivapurddharaḥ//
svayameva hṛṣīkeśo jaṃtūnāṃ pāpanāśanaḥ

adyā'pi ca kalā viṣṇoḥ prāpte caikādaśītraye //
pūrvoktena vidhānena tasmācchraddhāsamanvitaiḥ //
sadaiva pūjanīyaśca vandanīyo viśeṣataḥ

iti śrīskāṃde mahāpurāṇa ekāśīti sāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye cakrapāṇimāhātmyavarṇanaṃnāma dvipañcāśaduttaraśatatamo'dhyāyaḥ