Skanda Purana · Chapter 6.151

// // sūta uvāca // //
andhako'pi parāṃ vidyāṃ jñātvā śukrārjitāṃ tadā //
kelīśvaryāḥ prasādaṃ ca bhaktijaṃ balavṛddhidam

avadhyatāmātmanaśca pitāmahavarodbhavam //
maheśvaraṃ samuddiśya kopaṃ cakre tataḥ param

dūtaṃ ca preṣayāmāsa kailāsaṃ parvataṃ prati //
gaccha dūta haraṃ brūhi mama vākyena sāṃpratam

śakramenaṃ parityajya sukhaṃ tiṣṭhātra parvate //
no ceddrutaṃ samāgatya sakailāsaṃ sabhāryakam

sagaṇaṃ ca raṇe hatvā sukhī sthāsyāmi naṃdane //
tvāmahaṃ nāśayiṣyāmi satyenātmānamālabhe

evamuktaḥ sa daityena dūto gatvā drutaṃ tataḥ //
provāca śaṃkaraṃ vākyaiḥ paruṣaiḥ sa viśeṣataḥ

tataḥ kopaparītātmā bhagavānvṛṣabhadhvajaḥ //
gaṇānsaṃpreṣayāmāsa vadhārthaṃ tasya durmateḥ

vīrabhadraṃ mahākālaṃ naṃdiṃ hastimukhaṃ tathā //
aghoraṃ ghoranādaṃ ca ghoraghaṃṭaṃ mahābalam

eteṣāmanugāścānye koṭirekā pṛthakpṛthak//
sarvānsaṃpreṣayāmāsa vadhārthaṃ tasya durmateḥ

atha saṃpreṣitāstena gaṇāste vikṛtānanāḥ //
harṣeṇa mahatāviṣṭā garjamānā yathā ghanāḥ

dhṛtāyudhā gatāḥ sarve yuddhārthaṃ yatra sā purī //
śakrasyāsāditā tena dānavena balīyasā

atha prāptāngaṇāndṛṣṭvā dānavāste dhṛtāyudhāḥ //
niścakramurvai sahasā yuddhārthamatigarvitāḥ

tataḥ samabhavadyuddhaṃ gaṇānāṃ dānavaiḥ saha //
parasparaṃ mahāraudraṃ mṛtyuṃ kṛtvā nivartanam

tato haragaṇāḥ sarve dānavaistai raṇājire //
jitā jagmurdiśo bhītā haravīkṣaṇatatparāḥ

haro'pi tāngaṇānbhagnāndṛṣṭvā kopādviniryayau //
haraṃ dṛṣṭvā tato daityā duddruvuste diśo daśa // १५ /
andhako'pi haraṃ dṛṣṭvā yuddhārthaṃ saṃmukho yayau /
tato yuddhaṃ samabhavadaṃdhakasya hareṇa tu //
vṛtravāsavayoḥ pūrvaṃ yathā yuddhamabhūnmahat

cakranālīkanārācaistomaraiḥ khaḍgamudgaraiḥ//
evaṃ na śakyate haṃtuṃ dānavo vividhāyudhaiḥ

astrayuddhaṃ parityajya bāhu yuddhamupāgatau //
karaṃ kareṇa saṃgṛhya muṣṭipraharaṇau tadā//१८/
dānavenātha deveśo baṃdhenākramya pīḍitaḥ /
niṣpaṃdabhāvamāpannastato mūrcchāmupāgataḥ

mūrchāgataṃ tu tajjñātvā hyandhako niryayau gṛhāt //
tāvatsthāṇuḥ kṣaṇāllabdhvā cetanāmāttakārmukaḥ

āyasīṃ lakuṭīṃ gṛhya prabhurbhārasahasi kām //
dānavendraṃ tataḥ prāpya tāḍayāmāsa mūrdhani

so'pi khaḍgena deveśaṃ tāḍayāmāsa vegataḥ //
atha devo'pi sasmāra kauberāstraṃ mahāhave //

astreṇa tena hṛdaye tāḍayāmāsa dānavam //
tataḥ sa tāḍitastena rudhirodgāramudvaman

patito'dhomukho bhūtvā tataḥ śūlena bheditaḥ//
śūlāgrasaṃsthitaḥ pāpaścakravadbhramate tataḥ

andhako'pi tadātmānaṃ tathāvasthamavekṣya ca //
tato vāgbhiḥ supuṣṭābhirastauddevaṃ maheśvaram

// // andhaka uvāca // //
namaste jagatāṃ dhātre śarvāya triguṇātmane //
vṛṣabhāsanasaṃsthāya śaśāṃkakṛtabhūṣaṇa

namaḥ khaṭvāṃgahastāya namaḥ śūladharāya ca //
namo ḍamarukodaṇḍakapālānaladhāriṇe

smaradehavināśāya mūrtyaṣṭakamayātmane //
namaḥ svarūpadehāya hyarūpabahurū piṇe

uttamāṃgavināśāya viriṃceḥ sṛṣṭikāriṇe //
smaśānavāsine nityaṃ namo bhairavarūpiṇe

sarvagaḥ sarvakartā ca tvaṃ hartā nānya eva hi //
tvaṃ bhūmistvaṃ rajaścaiva tvaṃ jyotistvaṃ tamastathā

tvaṃ vapuḥ sarvabhūtānāṃ jīvabhūto maheśvara //
astaudevaṃ dānavendro devaśūlāgra saṃsthitaḥ

// sūta uvāca // //
evaṃ tasya stutiṃ śrutvā parituṣṭo maheśvaraḥ //
tataḥ provāca taṃ harṣācchūlāgrasthaṃ danūttamam

//
// śrībhagavānuvāca // //
nedaṃ vīravrataṃ daitya yacchatrukarapīḍanāt //
procyante sāmavākyāni viśeṣāddaityajanmanā

// andhaka uvāca // //
nirviṇṇo'smi suraśreṣṭha triśūlā'graṃ samāśritaḥ //
tasmātsūdaya māṃ yena drutaṃ syānme vyathākṣayaḥ

// śrībhagavānuvāca // //
na te'sti maraṇaṃ daitya kathaṃcicciṃtitaṃ mayā //
tenetthaṃ vidhṛtaṃ vyomni bhittvā śūlena vakṣasi

tasmāttvaṃ gaṇatāṃ gaccha sāṃprataṃ pāpavarjitaḥ //
tyaktvā dānavajaṃ bhāvaṃ śraddhayā parayā yutaḥ

// andhaka uvāca // //
gato me dānavo bhāvaḥ sāṃprataṃ tava kiṃkaraḥ //
bhaviṣyāmi na sandehaḥ satyenātmānamālabhe

// śaṃkara uvāca // //
parituṣṭo'smi te vatsa brūhi yatte'bhivāṃchitam //
prārthayasva prayacchāmi yadyapi syātsudurlabham

// andhaka uvāca // //
anenaiva tu rūpeṇa śṛlāgrasthitamattanum //
yo martyorccāṃ prakṛtvā te sthāpayiṣyati bhūtale //

tasya mokṣastvayā deyo madvākyātsurasattama //
tathetyuktvā maheśastaṃ śūlāgrātpramumoca ha //
asthiśeṣaṃ kṛśāṃgaṃ ca cāmuṇḍāsadṛśaṃ dvijāḥ

tataḥ sa gaṇatāṃ prāpto gītaṃ cakre manoharam //
purato devadevasya pārvatyāśca viśeṣataḥ

bhṛṃgavadraṭanaṃ yasmāttasya śrotrasukhā vaham //
bhṛṃgīriṭi iti proktastataḥ sa tripurāriṇā

evaṃ sa gaṇatāṃ prāpto devadevasya śūlinaḥ //
viśvāsyaḥ sarvakṛtyeṣu tatparaṃ samapadyata //

tataḥprabhṛti loke'tra devadevo maheśvaraḥ //
tādṛśenaiva rūpeṇa sthāpyate bhūtale janaiḥ

prāpyate'tra parā siddhistatprasādādalau kikī //
kasyacittvatha kālasya rājyādbhraṣṭo mahīpatiḥ

surathākhyaḥ prasiddho'tra sūryavaṃśasamudbhavaḥ //
tato vasiṣṭhamāsādya sa cātmīyaṃ puro hitam //
provāca praṇato bhūtvā bāṣpavyākulalocanaḥ

tvayā nāthena me brahmansaṃsthitenā'pi śatrubhiḥ //
balācca yaddhṛtaṃ rājyaṃ manda bhāgyasya sāṃpratam

tasmātkuru prasādaṃ me yena me rājyasaṃsthitiḥ //
bhūyo'pi tvatprasādena nānyā me vidyate gatiḥ

// vasiṣṭha uvāca // //
yadyevaṃ te mahārāja madvākyātsatvaraṃ vraja //
hāṭakeśvarajaṃ kṣetraṃ sarvasiddhipradāyakam

tatra bhairavarūpeṇa sthāpayitvā maheśvaram //
bhujodyatograśūlāgraviddhāndhakakalevaram

nārasiṃhena maṃtreṇa tataḥ pūjaya taṃ nṛpa //
raktapuṣpaistathā dhūpai raktaiścaivānulepanaiḥ

tataḥ sadvīrya māsādya tejovīryasamanvitaḥ //
haniṣyasyakhilāñchatrūṃstatprasādādasaṃśayam

paraṃ śaucasametena saṃpūjyo bhagavāṃstvayā //
anyathā prāpsyase vighnānsatyametanmayoditam

atha tasya vacaḥ śrutvā sa rājā satvaraṃ yayau //
tatra kṣetre tato devaṃ sthāpayāmāsa bhairavam

tataḥ saṃpūjayāmāsa nārasiṃhena bhaktitaḥ //
mantreṇa prayato bhūtvā brahmacaryaparāyaṇaḥ

tato daśasahasrāṃte tasya maṃtrasya saṃkhyayā //
bhairavastuṣṭimāpannaḥ provā ca tadanantaram

// śrībhairava uvāca // //
parituṣṭo'smi te rājanmaṃtreṇānena pūjitaḥ //
tasmātprārthaya yacceṣṭaṃ yena sarvaṃ dadāmyaham

//
// suratha uvāca // //
śatrubhirme hṛtaṃ rājyaṃ tvatprasādātsureśvara //
tanme bhavatu bhūyo'pi śatrubhiḥ parivarjjitam

anyo'pi yaḥ pumānitthaṃ tvāmihāgatya pūjayet //
anenaiva tu maṃtreṇa tasya siddhistvayā vibho

deyā deva sahasrāṃte yathā mama sureśvara //
tatheti taṃ pratijñāya gataścādarśanaṃ haraḥ

suratho'pi nijaṃ rājyaṃ prāpa hatvā raṇe ripūn

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭake śvarakṣetramāhātmye bhairavakṣetramāhātmyavarṇanaṃnāmaikapañcāśaduttaraśatatamo'dhyāyaḥ