Skanda Purana · Chapter 6.148

// sūta uvāca // //
evaṃ taṃ niḥspṛhaṃ jñātvā gṛhaṃ prati nijātmajam //
piṃgalā duḥkhasaṃyuktā vyāsametaduvāca ha

ahaṃ tapaścariṣyāmi putrārthaṃ dvijasattama //
anujñāṃ dehi me yena toṣayāmi maheśvaram //
putro yena bhavenmahyaṃ vaṃśavṛddhikaraḥ paraḥ

evaṃ sā niścayaṃ kṛtvā labdhvānujñāṃ munestataḥ //
kṣetrametatsamāsādya tapastepe pativratā

saṃsthāpya śaṃkaraṃ devaṃ tadagre nirmalodakam //
kṛtvā vāpīṃ suvistīrṇāṃ snānātpātakanāśanīm

tatastasyā gatastuṣṭiṃ bhagavāṃstripurāṃtakaḥ //
varado'smīti tāṃ prāha prahṛṣṭenāṃtarātmanā

// śrīmahādeva uvāca // //
parituṣṭo'smi te bhadre varaṃ varaya suvrate //
yaḥ sthito hṛdaye nityaṃ nādeyaṃ vidyate mama

// vaṭikovāca // //
sutaṃ dehi suraśreṣṭha mama vaṃśavivardhanam //
cittāhlādakaraṃ nityaṃ suśīlaṃ vinayānvitam

//
// śrīmahādeva uvāca // //
bhaviṣyati na saṃdehastava putraḥ suśobhane //
yādṛktvayā mahābhāge prārthitastadviśeṣataḥ

anyāpi mānuṣī yā'tra vāpyāṃ snātvā samāhitā //
pañcamyāṃ vatsaraṃ yāvacchuklapakṣe hyupasthite //
pūjayiṣyati malliṃgaṃ yaccādya sthāpitaṃ tvayā

sātha lapsyati satputraṃ dattvā phalamanuttamam //
yā ca daurbhāgyasaṃyuktā tṛtīyādivase'tra vai

snātvā'tra salile paścānmalliṃgaṃ pūjayiṣyati //
sā saubhāgya samopetā varṣāṃte ca bhaviṣyati

yaḥ punaḥ puruṣaścātra snātvā māṃ pūjayiṣyati //
sakāmo lapsyate kāmānvikāmo mokṣameva ca

evamuktvā mahādevastataścādarśanaṃ gataḥ //
sā'pi lebhe sutaṃ vyāsātkapiṃjalamiti śrutam

yādṛktena purā prokto devadevena śūlinā //
yenaiva sthāpitā cātra devī kelīvarī purā //
sarvasiddhipradā loke tatra yā''rādhitā purā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vaṭikeśvaramāhātmyavarṇanaṃ nāmāṣṭacatvāriṃśadadhikaśatatamo'dhyāyaḥ