સ્કંદ પુરાણ · અધ્યાય 6.148

॥ સૂત ઉવાચ ॥ ॥
એવં તં નિઃસ્પૃહં જ્ઞાત્વા ગૃહં પ્રતિ નિજાત્મજમ્ ॥
પિંગલા દુઃખસંયુક્તા વ્યાસમેતદુવાચ હ

અહં તપશ્ચરિષ્યામિ પુત્રાર્થં દ્વિજસત્તમ ॥
અનુજ્ઞાં દેહિ મે યેન તોષયામિ મહેશ્વરમ્ ॥
પુત્રો યેન ભવેન્મહ્યં વંશવૃદ્ધિકરઃ પરઃ

એવં સા નિશ્ચયં કૃત્વા લબ્ધ્વાનુજ્ઞાં મુનેસ્તતઃ ॥
ક્ષેત્રમેતત્સમાસાદ્ય તપસ્તેપે પતિવ્રતા

સંસ્થાપ્ય શંકરં દેવં તદગ્રે નિર્મલોદકમ્ ॥
કૃત્વા વાપીં સુવિસ્તીર્ણાં સ્નાનાત્પાતકનાશનીમ્

તતસ્તસ્યા ગતસ્તુષ્ટિં ભગવાંસ્ત્રિપુરાંતકઃ ॥
વરદોઽસ્મીતિ તાં પ્રાહ પ્રહૃષ્ટેનાંતરાત્મના

॥ શ્રીમહાદેવ ઉવાચ ॥ ॥
પરિતુષ્ટોઽસ્મિ તે ભદ્રે વરં વરય સુવ્રતે ॥
યઃ સ્થિતો હૃદયે નિત્યં નાદેયં વિદ્યતે મમ

॥ વટિકોવાચ ॥ ॥
સુતં દેહિ સુરશ્રેષ્ઠ મમ વંશવિવર્ધનમ્ ॥
ચિત્તાહ્લાદકરં નિત્યં સુશીલં વિનયાન્વિતમ્

॥
॥ શ્રીમહાદેવ ઉવાચ ॥ ॥
ભવિષ્યતિ ન સંદેહસ્તવ પુત્રઃ સુશોભને ॥
યાદૃક્ત્વયા મહાભાગે પ્રાર્થિતસ્તદ્વિશેષતઃ

અન્યાપિ માનુષી યાઽત્ર વાપ્યાં સ્નાત્વા સમાહિતા ॥
પઞ્ચમ્યાં વત્સરં યાવચ્છુક્લપક્ષે હ્યુપસ્થિતે ॥
પૂજયિષ્યતિ મલ્લિંગં યચ્ચાદ્ય સ્થાપિતં ત્વયા

સાથ લપ્સ્યતિ સત્પુત્રં દત્ત્વા ફલમનુત્તમમ્ ॥
યા ચ દૌર્ભાગ્યસંયુક્તા તૃતીયાદિવસેઽત્ર વૈ

સ્નાત્વાઽત્ર સલિલે પશ્ચાન્મલ્લિંગં પૂજયિષ્યતિ ॥
સા સૌભાગ્ય સમોપેતા વર્ષાંતે ચ ભવિષ્યતિ

યઃ પુનઃ પુરુષશ્ચાત્ર સ્નાત્વા માં પૂજયિષ્યતિ ॥
સકામો લપ્સ્યતે કામાન્વિકામો મોક્ષમેવ ચ

એવમુક્ત્વા મહાદેવસ્તતશ્ચાદર્શનં ગતઃ ॥
સાઽપિ લેભે સુતં વ્યાસાત્કપિંજલમિતિ શ્રુતમ્

યાદૃક્તેન પુરા પ્રોક્તો દેવદેવેન શૂલિના ॥
યેનૈવ સ્થાપિતા ચાત્ર દેવી કેલીવરી પુરા ॥
સર્વસિદ્ધિપ્રદા લોકે તત્ર યાઽઽરાધિતા પુરા

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે વટિકેશ્વરમાહાત્મ્યવર્ણનં નામાષ્ટચત્વારિંશદધિકશતતમોઽધ્યાયઃ