Skanda Purana · Chapter 6.146

// ṛṣaya ūcuḥ // //
ādityānāṃ ca sarveṣāṃ vasurudrādikāśvinām //
pratyekaśaḥ samācakṣva nāmāni tvaṃ mahāmate

// sūta uvāca // //
vṛṣadhvajaśca śarvaśca mṛgavyādhastṛtīyakaḥ //
ajaikapādahirbudhnyaḥ pinākī ṣaṣṭha eva hi

dahanaśceśvaraścaiva kapālī navamastathā //
vṛṣākapistu daśamo rudrastryaṃbaka eva ca

dhuro dhruvaśca somaśca makhaścaivānilo'nalaḥ //
pratyūṣaśca prabhāsaśca vasavo'ṣṭau prakīrtitāḥ

varuṇaśca tathā sūryo bhānuḥ khyātaśca tāpanaḥ //
iṃdraścaivāryamā caiva dhātā caiva bhagastathā

gabhastirdharmarājaśca svarṇaretā divākaraḥ //
mitraśca vāsudevaśca dvādaśaite ca bhāskarāḥ

nāsatyaścaiva dasraśca khyātāvetau tathāśvinau //
devavaidyau mahābhāgau tvāṣṭrīgarbhasamudbhavau

trayastriṃśatsamākhyātā ete ye suranāyakāḥ //
kṣetre'traivāsthitā nityaṃ dānavānāṃ vadhāya ca

yastānsaṃpūjayedbhaktyā puruṣaḥ saṃyateṃdriyaḥ//
yathoktadivase prāpte nāpamṛtyuḥ prajāyate

aṣṭamyāṃ ca caturdaśyāṃ rudrāḥ pūjyā vicakṣaṇaiḥ //
tasminkṣetre viśeṣeṇa vāṃchadbhiḥ paramaṃ padam

/
daśamyāṃ vasavaḥ pūjyāstathāṣṭamyāṃ viśeṣataḥ //
svargaṃ samīhamānaiśca vilāsairvividhaistathā

saptamyāmatha ṣaṣṭhyāṃ ca pūjanīyā divākarāḥ //
ye vāṃchanti narāḥ sattvaṃ paripaṃthivivarjitam

devavaidyau tathā pūjyau dvādaśyāṃ vyādhisaṃkṣayam //
ye vāṃchanti sadā martyā nīrujā sambhavaṃti te

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'mareśvarakuṇḍamāhātmyavarṇanaṃ nāma ṣaṭcatvāriṃśadadhikaśatatamo'dhyāyaḥ