Skanda Purana · Chapter 6.145

// ṛṣaya ūcuḥ // //
yattvayā kathitaṃ sūta na mṛtā sā kumārikā //
hatā raudraprahāraiśca kautukaṃ tanmahattaram

yato bhūyaḥ prasaṃjātā yoginī haratuṣṭidā //
yattvārthaṃ sarvamācakṣva kāraṇaṃ ca tadadbhutam

// sūta uvāca // //
sā praviṣṭā samaṃ tena supuṇyamamareśvaram //
māghakṛṣṇacaturdaśyāṃ na mṛtyuryatra vidyate

'
api caivāyuṣaḥ śeṣe kimutākālato dvijāḥ//
tena no nidhanaṃ prāptā hatāpi sudṛḍhaṃ tadā

// ṛṣaya ūcuḥ //
amareśvara ityukto yo devo hyamaratvadaḥ //
kena saṃsthāpito hyatra kiṃprabhāvaśca kīrtaya

//sūta uvāca // //
aditiśca ditiścaiva prajāpatisute śubhe//
kṛte purātirūpāḍhye kaśyapena mahātmanā

adityāṃ vibudhā jātā diteścaiva tu daityapāḥ///
teṣāṃ sāpatnyabhāvena mahadvairamupasthitam//
atha daityaiḥ surā dhvastāḥ kṛtāścānye parāṅmukhāḥ //
anye tu bhayasaṃtrastā diśo jagmuḥ kṣatāṃgakāḥ

tato duḥkhasamāyuktā devamātātra saṃsthitā //
tapaścakre divānaktaṃ śivadhyānaparāyaṇā

evaṃ tasyāstapaḥsthāyā gate yugacatuṣṭaye //
nirbhidya dharaṇīpṛṣṭhaṃ śivaliṃgaṃ samutthitam

tatastasmai kṛtānandā stutvā stotraiḥ pṛthagvidhaiḥ //
aṣṭāṃgapraṇipātena namaścakre samāhitā

etasminnaṃtare vāṇī saṃjātā gaganāṃgaṇe //
śarīrarahitā divyā meghagambhīraniḥsvanā

varaṃ prārthaya kalyāṇi yaste hṛdi vyavasthitaḥ //
prasanno'haṃ pradāsyāmi tavādya śaśiśekharaḥ

// aditiruvāca // //
mama putrāḥ suraśreṣṭha hanyante yudhi dānavaiḥ//
tatkuruṣva gatāyāsānavadhyānraṇamūrdhani

// śrībhagavānuvāca // //
etalliṃgaṃ madīyaṃ ye spṛṣṭvā yāsyaṃti saṃyuge //
avadhyāste bhaviṣyanti yāvatsaṃvatsaraṃ śubhe

anyo'pi mānavo yo'tra caturdaśyāṃ samāhitaḥ //
māghamāsasya kṛṣṇāyāṃ prakariṣyati jāgaram //

so'pi saṃvatsaraṃ yāvadbhaviṣyati nirāmayaḥ //
api mṛtyudine prāpte yo'sminnāyatane śubhe

āgamiṣyati taṃ mṛtyurdūrātparihariṣyati //
evamuktvātha sā vāṇī virarāma tataḥ param

aditiścāpi santuṣṭā hataśeṣānsutāṃstataḥ //
samānīyātha talliṃgaṃ teṣāmeva nyadarśayat //
kathayāmāsa tatsarvaṃ māhātmyaṃ yadvaroditam

tataste vibudhāḥ sarve talliṃgaṃ praṇipatya ca //
pratijagmustuṣṭiyuktāḥ śastrāṇyādāya tānprati

yatra te dānavā hṛṣṭāḥ sthitāḥ śakrapade śubhe //
svargabhogasamāyuktā nandanāṃtarvyavasthitāḥ

atha te dānavā dṛṣṭvā saṃprāptāṃstridivaukasaḥ //
sahasā saṃgarārthāya nānāśastradharānbahūn

rathavaryānsamāruhya dhṛtaśastrāstravarmaṇaḥ //
yuddhārthaṃ sammukhā jagmurgarjamānā ghanā iva

tataḥ samabhavadyuddhaṃ devānāṃ dānavaiḥ saha //
roṣapreritacittānāṃ mṛtyuṃ kṛtvā nivartanam

tataste vibudhāḥ sarve haralabdhavarāstadā //
jaghnurdaityānasaṃkhyātācchitaiḥ śastrairanekadhā

hataśeṣāśca ye teṣāṃ te tyaktvā tridaśālayam //
palāyanakṛtotsāhāḥ praviṣṭā makarālayam

tataḥ śakraḥ samāpede svarājyaṃ dānavairhṛtam //
yadāsītpūrvakāle tatsamagraṃ hatakaṇṭakam

tataste dānavāḥ śeṣā jñātvā talliṃgasaṃbhavam //
māhātmyaṃ vṛṣanāthasya kṣetrasyāsyodbhavasya ca

śukreṇa kathitaṃ sarvaṃ māghakṛṣṇe niśāgame //
caturdaśyāṃ śucirbhūtvā yastalliṃgaṃ prapūjayet //
kālāghrāto'pi na prāṇaiḥ sa pumāṃstyajyate kvacit

tasmādyūyaṃ samāsādya talliṃgaṃ taddine niśi //
pūjayadhvaṃ mahābhāgā yena syurmṛtyuvarjitāḥ

yāvatsaṃvatsarasyātaṃ satyametanmayoditam //
yathā te devasaṃghāśca tatprabhāvādasaṃśayam

atha taṃ dānavendrāṇāṃ maṃtraṃ jñātvā sureśvaraḥ //
nāradādbrāhmaṇaḥ putrādbhayatrastamanāstataḥ

maṃtraṃ cakre samaṃ devaistatra devasya rakṣaṇe //
yathā syādudyamaḥ samyaktasminnahani sarvadā

koṭayastu trayastriṃśaddevānāṃ sāyudhāstataḥ //
rakṣārthaṃ tasya liṃgasya tasminkṣetre vyavasthitāḥ //
māghakṛṣṇacaturdaśyāṃ susaṃnaddhāḥ prahāriṇaḥ

atha te dānavā dṛṣṭvā tāndevāṃstatra saṃsthitān //
bhayasaṃtrastamanaso dudruvuḥ sarvato diśam

atha prabhāte vimale prodgate ravimaṇḍale //
bhūya eva surāḥ sarve maṃtraṃ cakruḥ parasparam

yadyetatkṣetramutsṛjya gamiṣyāmaḥ surālayam //
liṃgametatsamabhyetya pūjayiṣyaṃti dānavāḥ

tato'vadhyā bhaviṣyaṃti te'pi sarve yathā vayam //
tasmādatraiva tiṣṭhāmastrayastriṃśatpranāyakāḥ

koṭīnāmeva sarveṣāṃ śeṣā gacchantu tatra ca //
sahasrākṣeṇa saṃyuktāḥ svarge svapararakṣakāḥ

tato'ṣṭau vasavastatra dvādaśārkāstathaiva ca //
ekādaśāpare rudrā nāsatyau dvau ca sundarau

/
ete talliṃgarakṣārthaṃ tasminkṣetre vyavasthitāḥ//
śeṣāḥ śakrasamāyuktāḥ prajagmustridaśālayam

// sūta uvāca // //
evaṃ prabhāvaṃ liṃgaṃ tu devadevasya śūlinaḥ //
bhavadbhiḥ paripṛṣṭaṃ yadadityā sthāpitaṃ purā

yasmānna vidyate mṛtyustena dṛṣṭena dehinām //
amarākhyaṃ tato liṃgaṃ vikhyātaṃ bhuvanatraye

yasmindeśe'pi sā kanyā hatā tena dvijanmanā //
jābālinā sukruddhena tasya devasya maṃdire //

āsīttatra dine kṛṣṇā māghamāsa caturdaśī //
tena no nidhanaṃ prāptā suhatā'pi tapasvinī

etadvaḥ sarvamākhyātaṃ tasya liṃgasya sambhavam //
māhātmyaṃ brāhmaṇaśreṣṭhāḥ sarvapātakanāśanam

yaścaitatpaṭhate bhaktyā tasya liṃgasya saṃnidhau //
apamṛtyubhayaṃ tasya kathaṃcinnaiva jāyate

tasyāgre'sti śubhaṃ kuṇḍaṃ pūritaṃ svacchavāriṇā /
adityā nirmitaṃ devyā snānārthaṃ cātmanaḥ kṛte

snānaṃ kṛtvā narastasminyastalliṃgaṃ prapaśyati //
karoti jāgaraṃ rātrau tasminneva dinedine //
so'dyāpi vatsaraṃ yāvannāpamṛtyumavāpnuyāt

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'marakeśvarakṣetramāhātmyavarṇanaṃnāma paṃcacatvāriṃśadadhikaśatatamo 'dhyāyaḥ