Skanda Purana · Chapter 6.143

// sūta uvāca // //
tathānyo'pi ca tatrāsti devaścitreśvaro dvijāḥ //
citrapīṭhasya madhyasthaścitrasaukhyaprado nṛṇām

yaṃ dṛṣṭvā pūjayitvā ca snāpayitvāthavā naraḥ //
mucyate paradārotthaiḥ pātakaiścopapātakaiḥ

dharṣayitvā guroḥ patnīṃ kanyāṃ vā nijavaṃśajām //
nīcāṃ vā vratayuktāṃ vā kāmāsaktena cetasā

caitraśuklacaturdaśyāṃ yastaṃ pūjayate naraḥ //
sa tatpāpaṃ nihatyāśu svargalokaṃ tato vrajet

tathā citrāṃgadastatra jābālisahito nṛpaḥ //
kumāryā sahitaḥ sārddhaṃ nagnayā tatsamutthayā //
santiṣṭhate tadagre tu śapto jābālinā purā

trayāṇāmapi yasteṣāṃ tasminnahani nirvapet //
sa iṣṭāṃ labhate nārīṃ siddhiṃ ca manasi sthitām

// ṛṣaya ūcuḥ // //
kasmājjābālinā śaptaḥ pūrvaṃ citrāṃgado yuvā //
sā ca tattanayā kasmātkumārī vastravarjitā

adyāpi tiṣṭhate tatra viruddhaṃ rūpamāśritā //
janahāsya karaṃ nityaṃ tasmātsūta vadasva naḥ

// sūta uvāca // //
ārsotpūrvaṃ munirnāmnā jābāliriti viśrutaḥ //
kaumārabrahmacaryeṇa yena cīrṇaṃ tapaḥ sadā

hāṭakeśvarajaṃ kṣetraṃ samāsādya sa saddvijāḥ //
bālye'pi vayasi prāpte samārebhe mahattapaḥ

kṛcchracāṃdrāyaṇādīni pārākāṇi śanaiḥśanaiḥ //
kurvatā tena te devāḥ saṃnītā bhayagocaram

tataḥ śakrādayo devāḥ saṃtrastā merumūrdhani //
militvā cakrire maṃtraṃ tasya vighnakṛte mithaḥ

yadyasya tapaso vṛddhirevaṃ yāsyati nityaśaḥ //
cyāvayiṣyati tannūnaṃ svargarājyācchatakratum

tasmādgacchatu raṃbhākhyā tatpārśve 'psarasāṃ varā //
brahmacaryavighātāya tasyarṣerbhāvitātmanaḥ

brahmacaryaṃ tapomūlaṃ yataḥ saṃkīrtitaṃ dvijaiḥ //
tasyābhāvātparikleśaḥ kevalaṃ na phalaṃ vrate

evaṃ te niścayaṃ kṛtvā samāhūya tataḥ param //
raṃbhāmūcurmaheṃdreṇa sarve devāstadādarāt

gaccha śīghraṃ mahābhāge jābāliryatra tiṣṭhati //
hāṭakeśvaraje kṣetre tapovighnāya tasya vai

te te bhāvāḥ prayoktavyāḥ kathāstāstā manoharāḥ //
vardhayaṃtī tathā citte tasya kāmaṃ nirargalam

//
// raṃbhovāca // //
sa munirna vijānāti kāmadharmaṃ sureśvara //
arasajñaṃ kathaṃ deva kariṣyāmi smarānvitam

// indra uvāca // //
eṣa yāsyati madvākyādvasaṃtastasya sannidhau //
asya saṃdarśanādeva bhaviṣyati sa sasmaraḥ

tasmādgaccha drutaṃ tatra sahānena varānane //
saṃsiddhirjāyate yena devakṛtyaṃ bhaveddrutam

atha sā taṃ praṇamyoccaiḥ prasthitā dharaṇītalam//
vasaṃtena samāyuktā jābāliryatra tiṣṭhati

athākasmādaśokasya saṃjātaḥ puṣpasaṃcayaḥ //
tilakasya ca cūtasya maṃjaryaḥ samupasthitāḥ

śiśire ca sarojāni vikāsaṃ prāpureva hi //
vavau ca surabhirvāyurdākṣiṇātyaḥ sukāmadaḥ

etasminnaṃtare prāptā raṃbhā tatra varāpsarāḥ //
salilāśayatīrastho jābāliryatra tiṣṭhati ///

akṣamālādhṛtakaro japanmaṃtramanekadhā //
abhīṣṭaṃ śraddhayā yukto vidhāya pitṛtarpaṇam

atha saṃpaśyatastasya muktvā vastraparigraham //१
snānārthaṃ tajjalaṃ sā'tha praviveśa varāpsarāḥ

vivastrāṃ tāṃ samālokya so'pi yauvanaśālinīm//
yāmyānilena ca spṛṣṭaḥ kāmasya vaśago 'bhavat

tatastasyābhavatkaṃpastatkṣaṇādeva sanmune //
akṣamālā karāgrācca papāta dharaṇītale

pulakaḥ sarvagātreṣu saṃjajñe'tīva dāruṇaḥ //
aśrupātāḥ pataṃti sma koṣṇāḥ plāvitabhūtalāḥ

atha taṃ kṣubhitaṃ jñātvā cittajñā sā varāpsarāḥ //
nirgatya salilāttasmāccakre vastraparigraham//

tatastasyāṃtike gatvā praṇipatya kṛtādarā //
provāca madhuraṃ vākyaṃ varddhaṃtī tasya tanmatam

āśrame sakalaṃ brahmankaccitte kuśalaṃ mune //
svādhyāye tapasi prājña śiṣyeṣu mṛgapakṣiṣu // ३_३ //
// muniruvāca//

kuśalaṃ me varārohe sarvatraivādhunā sthitam//
viśeṣeṇātra saṃprāptā sarvalakṣaṇalakṣitā

kā tvaṃ vada mahābhāge mama manmathavardhanī//
kiṃ devī vāsurī vā kiṃ pannagī kiṃ tu mānuṣī

nivedaya śarīre me kiṃ na paśyasi vepathum//
nirargalaśca romāṃco bāṣpapūraśca netrajaḥ

raṃbhovāca//
kiṃ te gātrasvabhāvo'yam kiṃ vānyo vyādhisaṃbhavaḥ //
kaccideva na te svāsthyaṃ prapaśyāmi śarīrajam

// muniruvāca // //
na me gātrasvabhāvo na vyādhibhiśca sulocane //
śṛṇuṣva kāraṇaṃ kṛtsnaṃ yenedṛksaṃsthitaṃ vapuḥ

yāvatī vartate velā tava darśanasaṃbhavā //
tāvatkālamidaṃ rūpaṃ mama gātrasamudbhavam // ३०. //
tadahaṃ manmathāviṣṭo darśanāttava śobhane //
brahmacaryaparopītthaṃ mahāvratadharo'pi ca

// raṃbhovāca / //
yadyevaṃ brāhmaṇaśreṣṭha māṃ bhajasva yathāsukham //
nātra kaścidbhaveddoṣaḥ paṇyanārī yato'smyaham

sādhāraṇā vayaṃ vipra yataḥ sṛṣṭāḥ svayaṃbhuvā //
sarveṣāmeva lokānāṃ viśeṣeṇa dvijanmanām

ahaṃ cāpi samālokya tvāṃ mune manmathopamam /
hatā kāmaśaraistīkṣṇairna ca gaṃtuṃ samutsahe //

mayā dṛṣṭāḥ surāḥ pūrvaṃ yakṣā vidyādharāstathā //
siddhāśca kiṃnarā nāgā guhyakāḥ kimu mānuṣāḥ

nedṛgrūpaṃ vapusteṣāmekasyāpi vilokitam //
madhye brāhmaṇaśārdūla tasmādbhaktāṃ bhajasva mām

yo nārīṃ kāmasaṃtaptāṃ svayaṃ prāptāṃ parityajet //
sa mūrkhaḥ pacyate ghore narake śāśvatīḥ samāḥ

evamuktvā tayā so'tha pariṣvakto mahāmuniḥ //
anicchannapi vākyena hṛdayena ca saspṛhaḥ

tato latāni kuṃje taṃ samānīya munīśvaram /
kāmaśāstroditairbhāvai rarāma kṛtrimairmunim

evaṃ tayā samaṃ tatra sthito yāvaddinakṣayam //
kāmadharmasamāsaktaḥ saṃtyaktāśeṣakarmakaḥ

tato niṣkāmatāṃ prāpto lajjayā parivāritaḥ //
visasarja ca tāṃ raṃbhāṃ śaucaṃ cakre tataḥ param

sāpi tena vinirmuktā kṛtakṛtyā vilāsinī /
prahṛṣṭā prayayau tatra yatra devāḥ savāsavāḥ

iti śrīskāṃde mahāpurāṇa ekāśītisāhasryāṃ sahitāyāṃ ṣaṣṭhe nāgarakhaṇḍe hāṭakeśvarakṣetramāhātmye jābālikṣobhaṇonāma tricatvāriṃśaduttaraśatatamo'dhyāyaḥ