Skanda Purana · Chapter 6.142

// sūta uvāca // //
tathānyadapi tatrāsti puṇyaṃ gaṇapatitrayam //
svargadaṃ martyadaṃ puṇyaṃ tathānyannarakāpaham

haṃtṛ vai sarvavighnānāṃ pūjitaṃ suradānavaiḥ//
sarvakāmapradaṃ caiva vidyākīrtivivardhanam

// ṛṣaya ūcuḥ // //
trividhāḥ puruṣāḥ sūta jāyaṃtetra mahītale //
uttamā madhyamāścānye tathā cānye'dhamāḥ sthitāḥ

uttamāḥ prārthayaṃti sma mokṣameva hi kevalam //
gatā yatra nivartaṃte na kathaṃciddharātale

madhyamāḥ svargamārgaṃ ca divyānbhogānmanoramān //
apsarobhiḥ samaṃ krīḍāṃ yajñādyaiḥ karmabhiḥ kṛtām //

adhamā martyaloketra ramaṃte viṣayātmakāḥ //
viṣakīṭakavattatra ratiṃ kṛtvā garīyasīm // ६ /
svargamokṣau parityajya tatkasmānmartya iṣyate //
yenāsau prārthyate martyairmartyado gaṇanāyakaḥ

kena saṃsthāpitāste ca tasminkṣetre gajānanāḥ //
kasminkāle ca draṣṭavyāḥ sarvaṃ vistarato vada

// sūta uvāca // //
pūrvaṃ taptvā tapastīvraṃ martyaloke dvijottamāḥ //
tato gacchaṃti saṃhṛṣṭāḥ svecchayā tridivaṃ prati //
mokṣamārgaṃ tathaivānye dhyānāviṣkṛtamānasāḥ

tataḥ svarge samākīrṇe kadācinmanujottamaiḥ //
deveṣu kṣipyamāṇeṣu samaṃtāttatprabhāvataḥ

gatvā svayaṃ sahasrākṣaḥ sarvairdevagaṇaiḥ saha //
provāca śaṃkaraṃ gauryā sārdhamekāsanasthitam

// indra uvāca // //
tapaḥprabhāvasaṃsiddhairmānavaiḥ parameśvara //
asmākaṃ vyāpyate sarvaṃ mahimānaṃ gṛhādikam

tasmātkṛtvā prasādaṃ naḥ kaṃcicciṃtaya sāṃpratam //
upāyaṃ yena tiṣṭhāmaḥ saukhyenātra śivālaye

atha śrutvā virūpākṣasteṣāṃ tadvacanaṃ dvijāḥ //
pārvatyāḥ pārśvasaṃsthāyā mukhacandraṃ samaikṣayat

nijagātraṃ tato devī susaṃmardya muhurmuhuḥ //
malamāhṛtya taṃ kṛtsnaṃ cakre nāgamukhaṃ tataḥ १५//
caturhastaṃ mahākāyaṃ laṃbodarasamanvitam //
sukautukakaraṃ teṣāṃ sarveṣāṃ ca divaukasām

tataḥ sa vinayādāha devīṃ śikharavāsinīm //
yadarthamaṃba sṛṣṭo'haṃ tatkāryaṃ vada mā ciram // १७ /
trailokye tvatprasādena nāsādhyaṃ vidyate mama //

// śrīdevyuvāca // //
martyaloke narā ye ca svargamokṣaparāḥ sadā //
teṣāṃ vighnaṃ tvayā kāryaṃ śubhakṛtyeṣu caiva hi

saritāṃ patayastriṃśacchaṃkavaḥ saptasaptatiḥ //
mahāsarojaṣaṣṭiśca nikharvāṇāṃ ca viṃśatiḥ

arbudāyutasaṃyuktāḥ koṭyo navatipañca ca //
lakṣāśca paṃcapaṃcāśatsahasrāḥ paṃcaviṃśatiḥ//
śatāni navaṣaṣṭiśca gaṇāścānye'tra saṃsthitāḥ

yeṣāṃ nadī smṛtaḥ pūrvo mahākālastathā paraḥ//
te sarve vaśagāstubhyaṃ prabhavaṃtu gaṇottamāḥ

ādhipatyaṃ mayā dattaṃ tava vatsa kuruṣva tat //
sarveṣāṃ gaṇavṛṃdānāmādhipatye vyavasthitaḥ

evamuktvātha sā devī samānīyauṣadhībhṛtān //
hemakuṃbhānsutīrthāṃbhaḥ paripūrṇānmahodayān

tasyābhiṣecanaṃ cakre svayameva sureśvarī //
gītavādyavinodena nṛtyamaṃgalajaiḥ svanaiḥ

trayastriṃśatsmṛtāḥ koṭayo devānāṃ yāḥ sthitā divi //
tāḥ sarvāstatra cāgatya tasya cakruśca maṃgalam

atha tasya dadau tuṣṭo bhagavānvṛṣabhadhvajaḥ //
kuṭhāraṃ niśitaṃ haste sadā vai śreṣṭhamāyudham

pātraṃ modakasaṃpūrṇamakṣayaṃ caiva pārvatī //
bhojanārthe mahābhāgā mātṛsnehaparāyaṇā

mūṣakaṃ kārtikeyastu vāhanārthaṃ praharṣitaḥ //
bhrātaraṃ manyamānastu bandhusnehena saṃyutaḥ

jñānaṃ divyaṃ dadau brahmā tasmai hṛṣṭena cetasā //
atītānāgataṃ caiva vartamānaṃ ca yadbhavet

prajñāṃ viṣṇuḥ sahasrākṣaḥ saubhāgyaṃ cottamaṃ mahat//
saubhāgyaṃ kāmadevastu kubero vibhavādikam

pratāpaṃ bhagavānsūryaḥ kāṃtimagryāṃ niśākaraḥ

tathānye vibudhāḥ sarve daduriṣṭāni bhūriśaḥ//
ātmīyāni pratuṣṭyarthaṃ devyā devasya ca prabhoḥ

evaṃ labdhavaraḥ so'tha gaṇanātho dvijottamāḥ //
devakṛtyaparo nityaṃ cakre vighnāni bhūtale

dharmārthaṃ yatamānānāṃ mokṣāya sukṛtāya ca //
tato bhūmitale'bhyetya gaṇeśastatra yaḥ smṛtaḥ

vaimānikaiḥ samabhyetya sthāpitastatra sa dvijāḥ //
yena svargārthino lokāḥ pūjāṃ tasya pracakrire //
prathamaṃ sarvakṛtyeṣu vighnanāśāya tatparāḥ

etasminneva kāle ca camatkārapurodbhavaiḥ //
brāhmaṇairbrahmavijñānatatparairmokṣahetubhiḥ //
īśānaḥ sthāpitastatra mokṣado ya udāhṛtaḥ

svargaṃ vāñchadbhirevānyaiḥ svargadvārapradastathā //
heraṃbaḥ sthāpitastatra satyanāmā yathoditaḥ

tathānyairmartyado nāma gaṇaiśastatra yaḥ sthitaḥ//
yena svargāccyutā yāṃti na kadā narakādikam//
tiryaktvaṃ vā kṛmitvaṃ vā sthāvaratvamathāpi vā

etasmātkāraṇāttatra kṣetre puṇye dvijottamāḥ //
herambo martyado jātaḥ svargiṇāṃ martyadaḥ sadā

etadvaḥ sarvamākhyātaṃ puṇyaṃ heraṃbasaṃbhavam //
ākhyānaṃ sarvavighnāni yannihanti śrutaṃ nṛṇām

etanmāghacaturthāṃ? yaḥ śuklāyāṃ pūjayennaraḥ //
na tasya vatsaraṃ yāvadvighnaṃ sañjāyate kvacit

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye gaṇapatitrayamāhātmyavarṇanaṃnāma dvicatvāriṃśaduttaraśata tamo'dhyāyaḥ