Skanda Purana · Chapter 6.140

// ṛṣaya ūcuḥ // //
yadetadbhavatā proktaṃ putro mānuṣavigrahaḥ //
bhaviṣyati yamasyātra kaḥ saṃbhūtaḥ sa sūtaja

// sūta uvāca // //
tasya putraḥ samutpannaḥ pāṃḍoḥ kṣetre mahītale //
yudhiṣṭhira iti khyātaḥ sarvakṣatriyapuṃgavaḥ

rājasūyo makho yena iṣṭaḥ sampūrṇadakṣiṇaḥ //
sarvānbhūmipatīnvīryātsaṃvidhāya karapradān

aśvamedhāḥ kṛtāḥ paṃca tathā sampūrṇadakṣiṇāḥ //
bhrāmayitvā hayaṃ bhūmau paścātprāpa sa sadgatim

eṣṭavyā bahavaḥ putrā yadyekopi gayāṃ vrajet //
yajeta vā'śvamedhena nīlaṃ vā vṛṣamutsṛjet

yadanena vṛtaṃ mattaḥ putritvaṃ sumahātmanā //
hayamedhānmahāyajñānkartā syādasya vai sutaḥ

manyeta kṛtakṛtyatvaṃ yena putreṇa dharmapaḥ //
anyaiḥ putraśataiḥ kiṃ vā vaṃśānuddhārakārakaiḥ

// sūta uvāca // //
etadvaḥ sarvamākhyātaṃ dharmarājasutodbhavam //
ākhyānaṃ brāhmaṇaśreṣṭhā dharmavṛddhikaraṃ param

/
iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye dharmarājaputrākhyānavarṇanaṃnāma catvāriṃśaduttara śatatamo'dhyāyaḥ