Skanda Purana · Chapter 6.138

// // ṛṣaya ūcuḥ // //
kiṃ kṛtaṃ dharmarājena tapodhyānādikaṃ ca yat//
māṃḍavyaśāpanāśāya tadasmākaṃ prakīrtaya

// sūta uvāca // //
māṃḍavya śāpamāsādya dharmarājaḥ suduḥkhitaḥ //
tapastepe dvijaśreṣṭhāstasminkṣetre vyavasthitaḥ

prāsādaṃ devadevasya saṃvidhāya kapardinaḥ //
avyagraṃ pūjayāmāsa puṣpadhūpānulepanaiḥ

tataḥ kālena mahatā tuṣṭastasya maheśvaraḥ //
provāca varado'smīti prārthayasva yadīpsitam

// dharmarāja uvāca // //
ahaṃ deva purā śapto māṃḍavyena mahātmanā //
svadharme vartamāno'pi sarvadoṣavivarjitaḥ

kupitena ca tenoktaṃ śūdrayonau bhaviṣyasi

tatrāpi ca mahadduḥkhaṃ jñātināśasamudravam //
macchāpajanitaṃ sadyo jātijaṃ samavāpsyasi

tasmāttrāhi suraśreṣṭha tasyā yoneḥ sakāśataḥ //
kathaṃ caitadvidho bhūtvā tasyāṃ janma karomyaham

tatrāpi ca mahaduḥkhaṃ jñātināśasamudbhavam //
etadarthe suraśreṣṭha mayā cārādhito bhavān

//
// śrībhagavānuvāca // //
na tasya sanmunervākyaṃ śakyate kartumanyathā //
tasmācchūdro'pi bhūtvā tvaṃ na saṃtānamavāpsyasi

jñātikṣayaṃ pradṛṣṭvāpi naiva duḥkhamavāpsyasi //
yato niṣidhyamānāpi na kariṣyaṃti te vacaḥ

etasmātkāraṇāccitte na te duḥkhaṃ bhaviṣyati //
jñātijaṃ dharmarājaitatsatyameva mayoditam

sthitvā varṣaśataṃ prājña tvaṃ śūdro dharmavatsalaḥ //
upadeśānbahūndattvā jñātibhyo hitakāmyayā //
api śraddhā vihīneṣu pāpātmasu sadaiva hi

tato varṣaśate pūrṇe brahmadvāreṇa kevalam //
ātmānaṃ samyagutsṛjya mokṣameva prayāsyasi

evamuktvā sa bhagavāngataścādarśanaṃ tataḥ //
dharmarājo'pi taṃ śāpaṃ bheje māṃḍavyasaṃbhavam

tadā vidurarūpeṇa hyavatīrya dharātale //
māṃḍavyasya vacaḥ satyaṃ sa cakāra mahāmatiḥ

jāto bhagavatā sākṣādvyāsenāmitatejasā //
pārāśaryeṇa vipreṇa dāsīgarbhasamudbhavaḥ

etadvaḥ sarvamākhyātaṃ dharmarājasamudbhavam //
ākhyānaṃ yadahaṃ pṛṣṭaḥ sarvapātakanāśanam

iti śrīskāṃde mahāpurāṇa ekāśītisāharasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye dharmarājeśvarotpattivarṇanaṃnāmāṣṭātriṃśaduttaraśatatamoadhyāyaḥ