Skanda Purana · Chapter 6.137

// ṛṣaya ūcuḥ // //
kenāsau muniśārdūlo māṃḍavyaḥ sumahātapāḥ //
śūlāyāṃ sthāpitaḥ kena kāraṇena ca no vada

// sūta uvāca // //
sa māṃḍavyo muniḥ pūrvaṃ tīrthayātrāṃ samācaran //
asminkṣetre samāyātaḥ śraddhayā parayā yutaḥ

viśvāmitrīyamāsādya sattīrthaṃ pāvanaṃ mahat //
pitṝṇāṃ tarpaṇaṃ cakre bhāskaraṃ prati sa vratī

japanvibhrāḍiti śreṣṭhaṃ sūktaṃ bhāskaravallabham //
etasminnaṃtare cauro loptramādāya kasyacit

kopi tatra samāyātaḥ pṛṣṭhe lagnairjanairdvijāḥ //
tataścauro'pi taṃ dṛṣṭvā maunasthaṃ munisattamam

loptraṃ muktvā tadagre'tha praviveśa guhāṃtare //
etasminnaṃtare prāptāste janā loptrahetave

dṛṣṭvā loptraṃ tadagrasthaṃ tamūcurmunipuṃgavam //
mārgeṇānena cāyāto loptrahasto malimlucaḥ //
brūhi śīghraṃ mahābhāga kena mārgeṇa nirgataḥ

sa ca jānannapi prājño guhāsaṃsthaṃ malimlucam //
na kiṃcidapi covāca maunavrata parāyaṇaḥ

asakṛtprocyamāno'pi paraciṃtāsamanvitaḥ //
yadā provāca no kiṃcitsa rakṣaṃścaurajīvitam

tatastairmaṃtritaṃ sarvaireṣa nūnaṃ malimlucaḥ //
saṃprāptaḥ pṛṣṭhato'smābhirmunirūpo babhūva ha

avicārya tataḥ sarvairābhīraistairdurātmabhiḥ//
śūlīmāropitaḥ sadyo nītvā kiṃcidvanāṃtaram

evaṃ prāptā tadā śūlī muninā tena dāruṇā //
pūrvakarmavipākena doṣahīnena dhīmatā

itiśrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye māṃḍavyaśūlīprāptivṛttāntavarṇanaṃnāma saptatriṃśaduttaraśatatamokyayāyaḥ