Skanda Purana · Chapter 6.136

māṃḍavya uvāca // //
grahīṣyāmi suraśreṣṭhā varaṃ yuṣmatsamudravam //
paraṃ me nirṇayaṃ caikaṃ dharmarājaḥ pracakṣatu// / १ //
sarveṣāṃ prāṇināṃ loke kṛtaṃ karma śubhāśubham //
upatiṣṭhati nānyatra satyametatsurottamāḥ

mayāpyatra pare cāpi kiṃ kṛtaṃ pātakaṃ ca yat //
īdṛśīṃ vedanāṃ prāpto na ca mṛtyuṃ kathacana

// dharmarāja uvāca // //
anyadehe tvayā vipra bālabhāvena vartatā //
śūlāgreṇa sutīkṣṇena kāye viddho bakaḥ kṣitau

nānyatkṛtamapi svalpaṃ pātakaṃ kiṃcideva hi //
etasmātkāraṇādeṣā vyathā saṃsevitā dvija

//
// sūta uvāca // //
tasya tadvacanaṃ śrutvā bhṛśaṃ krodhasamanvitaḥ //
tatastaṃ prāha māṃḍavyo dharmarājaṃ puraḥ sthitam

asya svalpāparādhasya yasmādbhūyānvinigrahaḥ //
kṛtastvayā sudurbuddhe tasmācchāpaṃ gṛhāṇa me

tvaṃ prāpya mānuṣaṃ dehaṃ śūdrayonau vyavasthitaḥ //
jātikṣayakṛtaṃ duḥkhaṃ prabhūtaṃ sevayiṣyasi

tathā kṛtā mayaiṣādya vyavasthā sarvadehinām //
aṣṭamādvatsarādūrdhyaṃ karmaṇā garhitena ca //
pragrahīṣyati vai jaṃtuḥ puruṣo yoṣideva vā

evamuktvā sa māṃḍavyo dharmarājaṃ tataḥ param //
prasthito roṣanirmukto vāṃchitāśāṃ prati dvijāḥ

atha taṃ prasthitaṃ dṛṣṭvā procuḥ sarve divaukasaḥ //
dharmarājakṛte vyagrāḥ śrutvā śāpaṃ tathāvidham

// devā ūcuḥ // //
bhagavanpāpasaktasya dharmarājasya kevalam//
na tvamarhasi śāpena śūdraṃ kartuṃ kathaṃcana

prasādaṃ kuru tasmāttvamasya dharmapaterdvija //
asmākaṃ vacanātsadyaḥ prārthayasva tathā varam //

// māṃḍavya uvāca // //
nānyathā jāyate vāṇī yā mayoktā surottamāḥ //
avaśyaṃ dharmarājo'yaṃ śūdrayonau prayāsyati

paraṃ naivāsya saṃtānaṃ tasyāṃ yonau bhaviṣyati //
saṃprāpsyati ca bhūyo'pi dharmarājatvamuttamam

ārādhayatu cāvyagraḥ kṣetre'traiva trilocanam //
prasādāttasya devasya śīghraṃ mṛtyumavāpsyati

tathā deyo varo mahyaṃ bhavadbhiryadi svargapāḥ //
tadeṣā śūlikā'smākaṃ sparśādbhūyātsudharmadā //

// devā ūcuḥ // //
enāṃ yaḥ prātarutthāya sparśayiṣyati śūlikām //
pātakātsa vimukto vā iha loke bhaviṣyati

evamuktvā muniṃ taṃ te devāḥ śakrapurogamāḥ //
tatastāṃ sādaraṃ prāhuḥ saha bhartrā pativratām

tvamapi prārthayābhīṣṭamasmatto varavarṇini //
yatte citte sthitaṃ nityaṃ nādeyaṃ vidyate'tra naḥ

// pativratovāca // //
yeyaṃ mayākṛtā gartā sthāne'tra tridaśeśvarāḥ //
mannāmnā khyātimāyātu dīrghiketi jagattraye

// devā ūcuḥ // //
adyaprabhṛti loke'tra gartteyaṃ tava śobhane //
dīrghiketi suvikhyātā bhaviṣyati jagattraye

ye'syāṃ snānaṃ kariṣyaṃti prātarutthāya mānavāḥ //
sarvapāpavinirmuktāste bhaviṣyaṃti tatkṣaṇāt

kanyārāśigate sūrye saṃprāpte paṃcamīdine //
ye'tra snānaṃ kariṣyaṃti śraddhayā sahitā narāḥ

aputrāste bhaviṣyaṃti saputrā vaṃśavardhanāḥ //
evamuktvā'tha tāṃ devā jagmuḥ svargaṃ dvijottamāḥ//

pativratāpi tenaiva saha kāṃtena sundarī //
sevayāmāsa kalyāṇī smarasaukhyamanuttamam

parvateṣu suramyeṣu nadīnāṃ pulineṣu ca //
udyāneṣu vicitreṣu vaneṣūpavaneṣu ca

tato vayasi saṃprāpte paścime kālaparyayāt /
tadevātmīyasattīrthaṃ sevayāmāsa sādaram

tato dehaṃ parityaktvā svakāṃtaṃ vīkṣya taṃ mṛtam //
tatra toye jagāmātha brahmalokaṃ pativratā / २९ //
etadvaḥ sarvamākhyātaṃ dīrghikākhyānamuttamam //
yasya saṃśravaṇādeva naraḥ pāpātpramucyate

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṃḍe hāṭakeśvara kṣetramāhātmye dīrghikotpattimāhātmyavarṇanaṃnāma ṣaṭtriṃśaduttaraśatatamo'dhyāyaḥ // १३६