Skanda Purana · Chapter 6.13

// //sūta uvāca // //
evaṃ nivedya putrāṇāṃ sa rājyaṃ pṛthivīpatiḥ //
puraṃ ca taddvijātibhyaḥ pradāya svayameva hi

tata ārādhayāmāsa devadevaṃ maheśvaram //
kṛtvā tadā''śramaṃ tatra śraddhayā parayā yutaḥ

sa babhūva phalāhāro yāvadvarṣaśataṃ nṛpaḥ //
śīrṇaparṇāśanaḥ paścāttāvatkālaṃ samāhitaḥ

tataḥ paraṃ jalāhāro jāto varṣaśataṃ hi saḥ //
vāyubhakṣastato'bhūtsa yāvadvarṣaśataṃ param

tatastuṣṭo mahādevastasya varṣaśate gate //
caturthe vāyubhakṣasya darśane samupasthitaḥ

provāca parituṣṭo'smi mattaḥ prārthaya vāṃchitam //
ahaṃ te saṃpradāsyāmi durlabhaṃ tridaśairapi

// rājovāca // //
etatpuṇyatamaṃ kṣetraṃ nānātīrthasamāśrayam //
hāṭakeśvaramāhātmyātsarvapāpakṣayāpaham

tasmāttava nivāsena bhūyānmedhyatamaṃ punaḥ //
etanme vāṃchitaṃ deva dehi tuṣṭiṃ gato yadi

mayaitadagryaṃ nirmāya brāhmaṇebhyo niveditam //
puraṃ śarvā'marādhīśa śraddhāpūtena cetasā

tasmiṃstvayā sadā vāsaḥ kartavyo mama vākyataḥ //
niścalatvena yena syādgaṇaiḥ sarvaiḥ samanvitam

// bhagavānuvāca // //
acalo'haṃ bhaviṣyāmi sthāne'tra tava bhūmipa //
acaleśvara ityeva nāmnā khyāto jagattraye

yo māmatra sthitaṃ martyo vīkṣayiṣyati bhaktitaḥ //
bhaviṣyaṃtyacalāstasya sarvadaiva vibhūtayaḥ

māghaśuklacaturdaśyāṃ mama liṃgasya yo naraḥ //
śraddhayā parayā yuktaḥ kartā yo ghṛtakaṃbalam

bālye vayasi yatpāpaṃ vārdhake yauvane'pi vā //
tadyāsyati kṣayaṃ tasya tamaḥ sūryodaye yathā

tasmātsthāpaya me liṃgaṃ tvamatraiva mahīpate //
ahaṃ yena karomyeva tatra vāsaṃ sadācalaḥ

// sūta uvāca // //
evamuktvā sa deveśastataścādarśanaṃ gataḥ //
so'pi rājā cakārāśu prāsādaṃ sumanoharam

tatra saṃsthāpayāmāsa liṃgaṃ devasya śūlinaḥ //
śraddhayā parayā yuktaḥ sarvalakṣaṇalakṣitam ///७//
yasmindṛṣṭe'thavā spṛṣṭe dhyāte vā pūjite'pi vā //
naro vimucyate pāpādājanmamaraṇāṃtikāt ///८//
tataḥ saṃciṃtayāmāsa bhūpālaḥ kiṃ maheśvaraḥ //
sāṃnidhyaṃ niścalo bhūtvā liṃge'traiva kariṣyati

etasminnaṃtare jātā vāṇī gaganagocarā //
harṣayantī mahīpālaṃ camatkāraṃ sunisvanā

mā tvaṃ bhūmipaśārdūla kāryacintāṃ kariṣyasi //
asminvāsaṃ sadātraiva liṃge kartāsmi nityaśaḥ

tathānyadapi te vacmi pratyayārthaṃ vaco nṛpa //
tacchrutvā nirvṛtiṃ gaccha vīkṣasvaiva ca yatnataḥ

/
sadā me niścalā chāyā liṃgasyāsya bhaviṣyati //
ekaiva pṛṣṭhadeśasthā na diksaṃsthā bhaviṣyati

// sūta uvāca // //
tataḥ sa vīkṣayāmāsa tāṃ chāyāṃ liṃgasaṃbhavām //
tadrūpāṃ niścalāṃ nityaṃ taddiksaṃsthe divākare

tato harṣaṃ paraṃ gatvā praṇipatya ca taṃ bhuvi //
kṛtakṛtyamivātmānaṃ sa mene pārthivottamaḥ

adyāpi dṛśyate chāyā tādṛgrūpā sadā hi sā //
tasya liṃgasya viprendrā jātā vismayakāriṇī

ṣaṇmāsābhyaṃtare mṛtyuryasya syādbhuvi bho dvijāḥ //
na sa paśyati tāṃ chāyāmeṣo'nyaḥ pratyayaḥ paraḥ

// sūta uvāca // //
evaṃ sa bhagavāṃstatra sarvadaiva vyavasthitaḥ //
acaleśvararūpeṇa camatkārapurāṃtike

niścalatvena deveśohyaṣṭaṣaṣṭiṣu madhyamaḥ //
kṣetrāṇāṃ vasate tatra tasya vākyānmaheśvaraḥ

tena tatpāvanaṃ kṣetraṃ sarveṣāmiha kīrtitam //
kāmadaṃ muktidaṃ caiva jāyate sarvadehinām

tathānyadapi yadvṛttaṃ vṛttāṃtaṃ tatprabhāvajam //
tadahaṃ saṃpravakṣyāmi śrūyatāṃ dvijasattamāḥ

acaleśvaramāhātmyāttasminkṣetre narā drutam//
vāṃchitaṃ manasaḥ sarve labhaṃte sakalaṃ phalam

svargameke pare mokṣaṃ dhanadhānyasutāṃstathā //
yo yaṃ kāmamabhidhyāya pūjayedacaleśvaram//
taṃtaṃ sa labhate martyaḥ svalpāyāsena ca drutam

atha dṛṣṭvā sahasrākṣaḥ sarve pāpanarā bhuvi //
svargaṃ yāṃti tathā mokṣaṃ prāpnuvanti ca sammukham

tataḥ krodhaṃ ca kāmaṃ ca lobhaṃ dveṣaṃ bhayaṃ ratim //
mohaṃ ca vyasanaṃ durgaṃ matsaraṃ rāgameva ca

sarvānmūrtānsamāhūya tataḥ provāca sādaram//
svayameva sahasrākṣo rahasye dvijasattamāḥ // ३६ /
naro vā yadi vā nārī camatkārapuraṃ prati //
yo gacchati dharāpṛṣṭhe yuṣmābhirvārya eva saḥ

tatraiva vasamāno'pi yo gacchedacaleśvaram //
madvākyātsa viśeṣeṇa sarvairvāryaḥ prayatnataḥ

te tatheti pratijñāya gatvā śakrasya śāsanāt //
cakrustataḥ samucchinnaṃ tanmāhātmyaṃ gataṃ bhuvi

etadvaḥ sarvamākhyātamākhyānaṃ pāpanāśanam //
acaleśvaradevasya tasminkṣetre nivāsinaḥ

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'caleśvaramāhātmyavarṇanaṃnāma trayodaśodhyāyaḥ //