Skanda Purana · Chapter 6.12

// sūta uvāca // //
evaṃ sa vasudhāpālo brāhmaṇebhyaḥ svaśaktitaḥ //
dadau tu nagaraṃ kṛtvā puraṃdarapuropamam

muktāpravālavaiḍūryaratnahemavicitritaiḥ //
bhrājamānaṃ gṛhaśreṣṭhairdyaurnakṣatragaṇairiva

prāsādaiḥ sphāṭikaiścaiva kailāsaśikharopamaiḥ //
patākāśobhitairdivyaiḥ samaṃtātparivāritam

kāṃcanaiḥ suvicitraiśca pronnatairamalaiḥ śubhaiḥ //
toraṇānāṃ sahasraiśca śobhitaṃ sumanoharam ///

maṇisopānaśobhābhirdīrghikābhiḥ samaṃtataḥ //
ārāmakūpayaṃtrādyaiḥ sarvopakaraṇairyutam //
nivedya brāhmaṇeṃdrāṇāṃ kṛtakṛtyo babhūva saḥ

/
śaṃkhatīrthe sthito nityaṃ samāhūya tataḥ sutān//
putrānpautrāṃstathā bhṛtyānvākyametaduvāca ha

etatpuraṃ mayā kṛtvā brāhmaṇebhyo niveditam //
bhavadbhirmama vākyena rakṣaṇīyaṃ prayatnataḥ / ७ //
yathā syurbrāhmaṇāḥ sarve sukhino hṛṣṭamānasāḥ //
yuṣmābhiḥ pālanaṃ kāryaṃ tathā sarvaiḥ samāhitaiḥ//
yaścaitānbhaktisaṃyuktaḥ pālayiṣyati bhūmipaḥ /
anyo'pi paramaṃ tejaḥ sa saṃprāpsyati bhūtale

ajeyaḥ sarvaśatrūṇāṃ pratāpī sphī tisaṃyutaḥ //
bhaviṣyati na sandeho brāhmaṇānāṃ sa pālanāt

putrapautrasubhṛtyāḍhyo dīrghāyū rogavarjitaḥ //
brāhmaṇānāṃ prasādena mama vākyādbhaviṣyati

yaḥ punardveṣasaṃyuktaḥ saṃtāpaṃ caiva neṣyati //
etānbrāhmaṇaśārdūlānnarakaṃ sa prayāsyati

tathā duḥkhāni saṃprāpya dṛṣṭvā naikānparābhavān //
viyogāniṣṭabandhūnāṃ vyādhigrasto vigarhitaḥ

vaṃśocchedaṃ samāsādya gamiṣyati yamālayam //
tasmātsarvaprayatnena rakṣaṇīyamidaṃ puram //
mama vākyādviśeṣeṇa hitamicchadbhirātmanaḥ

evaṃ sa bhūpatiḥ sarvāṃstā nuktvā tapasi sthitaḥ //
te'pi sarve tathā cakruryathā tena ca śikṣitāḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye camatkārabhūpena purasthityarthaṃ nijaputrādīnāmupadeśakaraṇavarṇanaṃnāma dvādaśo'dhyāya