Skanda Purana · Chapter 6.128

// sūta uvāca // //
satyasandhopi hṛṣṭātmā satāṃ dṛṣṭvā sukhānvitām//
abhīṣṭapatinā yuktāṃ kṛtakṛtyo babhūva ha

tatastasyaiva liṃgasya dakṣiṇāṃ mūrtimāśritaḥ //
dṛḍhaṃ padmāsanaṃ kṛtvā samyagdhyānaparāyaṇaḥ

ātmānamātmanaivātha brahmadvāreṇa saṃsthitaḥ //
tato niḥsārayāmāsa pulakena samanvitaḥ

atha te brāhmaṇāstasya camatkārapurodbhavāḥ //
devatā darśanārthāya prāptā dṛṣṭvā kalevaram

apriyaṃ tejasā hīnaṃ mṛtamaspṛśyatāṃ gatam //
liṃgasya nātidūrasthaṃ dāhyārthaṃ yatnamāsthitāḥ

yāvadgurvīṃ citāṃ kṛtvā tamanveṣṭuṃ samudyatāḥ //
tāvannaṣṭaṃ śavaṃ tacca jñāyate naiva kutracit

tataśca vismayāviṣṭāstaṃ praśaṃsāsamanvitaiḥ //
vacanairbahuśo bhūyo vikathya ca muhurmuhuḥ

tatastasyotthaliṃgasya sarvaṃ pūjādikaṃ ca yat //
sarve nirūpayāmāsuḥ saptaviṃśatimadhyataḥ

liṃgānāṃ tadbhavennityaṃ satyasaṃdhasya bhūpateḥ //
kāmadaṃ bhaktajaṃtūnāṃ sarvapātakanāśanam

// ṛṣaya ūcuḥ // //
camatkāranareṃdrasya vaṃśe kṣīṇe mahāmate //
ānarttādhipatiḥ ko'nyastatra rājā babhūva ha

sūta uvāca // //
bṛhadbale hate bhūpe saṃgrāme dvijasattamāḥ /
putrabaṃdhusamāyuktāḥ sarva lokāḥ samāyayuḥ

yatrasthaḥ sa mahīpālaḥ satyasaṃdhastaponvitaḥ //
śokodvignāstataḥ prāhustaṃ bhūpaṃ rahasi sthitam

kṣīṇo'yaṃ tāvako vaṃśo na kaścidvidyate yataḥ //
dāyādo'pi kathaṃ pṛthvī saṃpratīyaṃ bhaviṣyati

arājake nṛpaśreṣṭha mātsyo nyāyaḥ pravartate //
rāṣṭre caiva pure caiva grāme caiva viśeṣataḥ

paradāraratā ye ca ye ca taskaravṛttayaḥ /
sarve rājabhayādrājanmaryādāṃ pālayaṃti vai

tasmāttvaṃ tapa utsṛjya rājyaṃ pūrvakramāgatam //
kuru rājyaṃ tathā dārānputrārthaṃ prāpya mā ciram

// rājovāca // //
saṃnyasto'haṃ dvijaśreṣṭhā na rājyaṃ kartumutsahe //
na sutānāṃ na dārāṇāṃ saṃgrahaṃ ca kathaṃcana

tatputrārthaṃ pravakṣyāmi yuṣmākaṃ svāminaḥ kṛte //
upāyaṃ yena rājā syādānartto lokapālakaḥ // १८ /
jāmadagnyena rāmeṇa yadā kṣatraṃ nipātitam //
garbhasthamapi kārtsnyena kopopahatacetasā

tataḥ kṣatriyabhāryāḥ prāgṛtusnānātsamāyayuḥ //
brāhmaṇānputrajanmārthaṃ na kāmārthaṃ kathaṃcana

tataḥ putrāḥ samutpannāstejovīryasamanvitāḥ //
kṣetrajā bhūmipālānāṃ saṃjātāśca mahīkṣitaḥ

tasmādbṛhadbalasyaitā bhāryāstiṣṭhaṃti yā janāḥ //
brāhmaṇāṃstā upāgamya ṛtusnātā yathocitān

labhiṣyaṃti ca putrāṃstāstebhyaḥ kṣatriyapuṃgavān //
ye bhūmiṃ pālayiṣyaṃti pālayiṣyaṃti ca prajāḥ

tathā'trāsti śubhaṃ kuṇḍaṃ vāsiṣṭhaṃ putrajanmadam //
yatra snātā ṛtau nārī sadyo garbhavatī bhavet //
amogharetāḥ kāṃtā ca snānādatra prajāyate

ye pūrvaṃ kṣatriyā jātā brāhmaṇaiḥ kṣatriṇīṣu ca //
te sarve tatprabhāvena saṃjātā nātra saṃśayaḥ

yayāyayā dvijo yaśca kṣatriṇyā'bhūdvṛtaḥ purā //
tayā saha samāgatya snātaṃ mantrapuraskṛtam

sakṛnmaidhunasaṃsargāttatastīrthaprabhāvataḥ //
sarvāsāṃ yatsutā jātā duhitā na kathaṃcana

ye kecitputradā maṃtrāścātuścaraṇāsaṃbhavāḥ /
te sarve'tra vasiṣṭhena prayuktāḥ kṣattramicchatā // २८ /
daṃpatyoḥ snānamātreṇa jāte'tra syātsuputrakaḥ//
tasmātsuputradaṃnāma kuṇḍametannigadyate

tasmādbhāryāḥ samastāstā bṛhadbalasamudbhavāḥ //
atra snānaṃ prakurvaṃtu yathoktavidhinā janāḥ

naiva kiṃcidasatyaṃ syānna ca niṃdākaraṃ tathā //
śrūyate ca yataḥ ślokaḥ pūrvācāryairudāhṛtaḥ

adbhyo'gnirbrahmataḥ kṣattramaśmano lohamucchritam//
teṣāṃ sarvatragaṃ tejaḥ svāsu yoniṣu śāmyati

tacchrutvā janāḥ sarve sacivānāṃ vacokhilam //
tadācakhyurdrutaṃ gatvā satyasaṃdhasya bhūpateḥ

tatastāḥ sarvaśo dārā brāhmaṇānatisundarān //
ṛtusnātāḥ samājagmurnṛpapatnyaḥ suharṣitāḥ

yatra tatputradaṃ tīrthaṃ vasiṣṭhena vinirmitam //
tatra snātvā sakṛtsaṃgaṃ samāsādya dvijodbhavam

sarvāstāḥ putravatyaśca saṃjātā dvijasattamāḥ //
āsīttasya nareṃdrasya śataṃ paṃcabhiranvitam

tāsāṃ samabhavadviprāḥ śataṃ paṃcādhikaṃ tathā

pratyekaṃ varaputrāṇāṃ vaṃśavṛddhikaraṃ param //
ānaṃdajananaṃ samyaksarveṣāṃ rāṣṭravāsinām

tatra śreṣṭho'bhavatputro ya ānartapatirbhuvi //
aṭonāma suvikhyātaḥ sarvaśatrunibarhaṇaḥ

aṭeśvaraiti khyāto yena devo'tra nirmitaḥ //
subhaktyā yena dṛṣṭena vaṃśocchittirna jāyate

// ṛṣaya ūcuḥ // //
kasmāttasya kṛtaṃ nāma etaccā'ṭa iti smṛtam //
anvayena parityaktaṃ tasmātkīrtaya sūtaja

sacivairbrāhmaṇairvāpi tasyaitannāma nirmitam //
mātrā vā tatsamācakṣva paraṃ kautūhalaṃ hi naḥ

// sūta uvāca // //
na mātrā tatkṛtaṃ nāma na vipraiḥ sacivairnṛpa //
tatkṛtaṃ devadūtena vyomasthena dvijottamāḥ

yathā tathā pravakṣyāmi śrotavyaṃ susamāhitaiḥ //
yayā sa bhūpatirjāto daśārṇādhipateḥ sutā

sā rūpayauvanopetā rūpāḍhyaṃ prāpya saddvijam //
prasthitā snātukāmātha putratīrthe mṛgekṣaṇā

sahitā tena vipreṇa kaṃdarpapratimena ca //
atha tābhyāṃ mahānrāmo mithaḥ saṃdarśanātsthitaḥ

tādṛṅmātraṃ sukṛcchreṇa prāptaṃ tīrthaṃ sutapradam //
tataḥ snātvā jale tasminniṣkrāṃtau tau sukāmukau

vrajamānau ca mārge'pi kāmadharmamupāgatau //
atyautsukyātsusaṃhṛṣṭau lajjāṃ tyaktvā sudūrataḥ

niṃdamānasya lokasya vicchedavacanaistadā //
vīryotsarge'tha saṃjāte yāvaduttiṣṭhate dvijaḥ

tāvadākāśagā vāṇī sahasā devanirmitā //
aṭatārājamārgeṇa vipreṇānena vai yataḥ

utpāditastu putro'yamautsukyādbrāhmaṇena tu //
aṭākhyo bhūpatistasmālloke khyāto bhaviṣyati

dīrghāyurbahuputraśca śatruṃpakṣakṣayāvahaḥ //
etasmātkāraṇādviprā aṭākhyaḥ sa babhūva ha

svavaṃśoddharacaṃdro'tra vāṃchitārthaprado'rthinām //
tenaitatkṣetramāsādya sthāpitaṃ liṃgamuttamam //
svanāmnā brāhmaṇaśreṣṭhāḥ sarvadeṣṭapradaṃ nṛṇām

yastanmāghacaturdaśyāṃ pūjayecchraddhayānvitaḥ //
na tasya jāyate kiṃcidduḥkhaṃ saṃtānasaṃbhavam

api varṣaśatānārī snātvā kuṇḍe sutaprade //
aṭeśvaraṃ tataḥ paśyecchivabhaktiparāyaṇā

sadyaḥ putramavāpnoti vaṃśavṛddhikaraṃ param // tatprasādānna saṃdehaḥ kārtikeya vaco yathā

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye'ṭeśvarotpattimāhātmyavarṇanaṃnāmāṣṭāviṃśatyuttaraśatatamo'dhyāyaḥ