Skanda Purana · Chapter 6.126

// sūta uvāca // //
evaṃ tasya tapasthasya putryā saha dvijottamāḥ //
ājagmurbrāhmaṇāḥ sarve camatkārapurodbhavāḥ

// brāhmaṇā ūcuḥ // //
sandeheṣu ca sarveṣu vivādeṣu viśeṣataḥ //
abhāvātpārthivendrasya saṃjātaśca parābhavaḥ

tataśca dvijavaryaiḥ sa saṃnyastaḥ pṛthivīpatiḥ //
pṛṣṭaśca prārthitaścaiva nijarājyasya rakṣaṇe //
anyasmindivase prāha kṛtāṃjalipuṭaḥ sthitaḥ

// rājovāca // /
anarho'haṃ dvijaśreṣṭhāḥ saṃdehaṃ hartumeva vaḥ //
rakṣāṃ kartuṃ viśeṣeṇa tyaktaśastro'smi cādhunā

.
// brāhmaṇā ūcuḥ // //
sarve vayaṃ mahārāja bhūpasyāpyadhikā yataḥ //
ahaṃkāreṇa darpeṇa nijaṃ sthānaṃ samāśritāḥ

na kasyacinmahārāja kadāpi ca kathaṃcana //
vartanāyāśca sandehaḥ sthānakṛtye'pi saṃsthitaḥ

asaṃkhyātā kṛtā vṛttiḥ purā'smākaṃ mahātmanā //
tataḥ sā vṛddhimānītā tatparaiḥ pārthivottamaiḥ

tvayā caiva viśeṣeṇa yāvadrājā bṛhadbalaḥ //
ānartaviṣaye rājā yo yaḥ syātsa prayacchati

sarvāṃ vṛttiṃ gṛhasthānāṃ yathāyogyaṃ prayatnataḥ //
tavāgre kiṃ vayaṃ brūmastvaṃ vetsi sakalaṃ yataḥ

yathā vṛttiḥ purā dattā yathā saṃrakṣitā tvayā //
tasmāccintaya rājendra sthānaṃ vartanasaṃbhavam //
upāyaṃ yena maryādā vṛttistasmātsukhena tu

tataḥ sa suciraṃ dhyātvā gartātīrthasamudbhavān //
ākāryopamanyuvaṃśasya saṃbhavānvedapāragān

praṇipātaṃ prakṛtvātha tataḥ provāca sādaram //
madīyasthāna saṃsthānāṃ brāhmaṇānāṃ viśeṣataḥ

sarvakṛtyāni kāryāṇi bhṛtyavadvinayānvitaiḥ //
nityaṃ rakṣā vidhātavyā yuṣmadīyaṃ vacokhilam

ete saṃpālayiṣyanti maryādākāramuttamam //
sandeheṣu ca sarveṣu vivādeṣu viśeṣataḥ

rājakāryeṣu cānyeṣu ete dāsyanti nirṇayam //
yuṣmadīyaṃ vacaḥ śrutvā śubhaṃ vā yadi vā'śubham

ete pālyāḥ prasādena puṣṭiṃ neyāśca śaktitaḥ//
īrṣyāṃ sarvāṃ parityajya madīyasthānavṛddhaye

bāḍhamityeva taiḥ proktaḥ sa rājā brāhmaṇottamān //
camatkāpurodbhūtānbhūyaḥ provāca sādaram

yuṣmākaṃ vartanārthāya sarvakṛtyeṣu sarvadā //
ete viprā mayā dattā gartātīrthasamudbhavāḥ

eteṣāṃ vacanātsarvaṃ yuṣmadīyaṃ prajāyatām //
pratiṣṭhā jāyate nūnaṃ cātuścaraṇasūcitā

nānyathā brāhmaṇaśreṣṭhāḥ svalpaṃ vā yadi vā bahu //
proktaṃ lakṣamitairanyairyuṣmadīyapurodbhavaiḥ

// sūta uvāca //
tataste brāhmaṇā hṛṣṭāstānādāya dvijottamān //
teṣāṃ matena cakruśca sarvakṛtyāni sarvadā

tatastatra pure jātā maryādā dharmavarddhinī //
sarvakṛtyeṣu sarveṣāṃ tathā vṛddhiḥ purasya ca

te'pi teṣāṃ prasādena garttātīrthabhavā dvijāḥ //
parāṃ vibhūtimāsthāya modante sukhasaṃyutāḥ

kasyacittvatha kālasya sa rājā tatpurottamam //
samabhyetya dvijānsarvāṃstataḥ provāca sādaram

yuṣmadīyaprasādena kṣetre'tra sumahattapaḥ //
kṛtaṃ svargaṃ prayāsyāmi sāṃprataṃ tu dvijottamāḥ

nāsmākamanvaye kaścitsāṃprataṃ vartate nṛpaḥ //
tasyāhaṃ liṃgametadvai darśayāmi dvijottamāḥ

pūjārthaṃ cāpi vṛttyarthaṃ bhogārthaṃ ca viśeṣataḥ //
tasmādyuṣmābhirevāsya pūjā kāryā prayatnataḥ //
rathayātrā viśeṣeṇa dayāṃ kṛtvā mamopari

// brāhmaṇā ūcuḥ // //
sapta viṃśatiliṃgāni yatheṣṭāni mahītale //
camatkārasutānāṃ ca pūjyaṃte sarvadaiva tu

aṣṭāviṃśatimaṃ tadvadetalliṃgaṃ tavodbhavam //
sarvadā pūjayiṣyāmo niścinto bhava pārthiva

asya yātrāṃ kariṣyāmaḥ kārtike māsi sarvadā //
balipūjopahārāṃśca gītavādyāni śaktitaḥ

evamuktaḥ sa tairhṛṣṭo gatvātmīyaṃ tadāśramam //
snāpayitvātha talliṃgaṃ pūjāṃ cakre prabhaktitaḥ

// sūta uvāca // //
evaṃ samarpitaṃ liṃgaṃ tena taddharasaṃbhavam //
sarveṣāṃ brāhmaṇeṃdrāṇāṃ vaṃśocchede sthite dvijāḥ

sakalaṃ kārtikaṃ martyo yastacchraddhāsamanvitaḥ //
snāpayetpūjayeccāpi sa nūnaṃ muktimāpnuyāt

somasya divase prāpte varṣaṃ yāvatkṛtakṣaṇaḥ //
tasya pūjāṃ karotyevaṃ snāpayitvā vidhānataḥ //
so'pi muktiṃ vrajenmartya etattātānmayā śrutam

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye satyasaṃdheśvaramāhātmyavarṇanaṃnāma ṣaḍviṃśatyadhikaśatatamo'dhyāyaḥ