Skanda Purana · Chapter 6.120

// sūta uvāca // //
evaṃ śakrādayo devā jitāste tu raṇājire //
mahiṣeṇa tato rājyaṃ trailokye'pi cakāra saḥ

yatkiñcittriṣu lokeṣu sārabhūtaṃ prapaśyati //
gajavājirathāśvādi sarvaṃ gṛhṇāti so'suraḥ

evaṃ pravartamānasya tasya devāḥ savāsavāḥ //
vadhārthaṃ militāścakruḥ kathā duḥkhasama nvitāḥ

etasminnaṃtare prāpto nārado munisattamaḥ //
dṛṣṭvā taṃ māhiṣaṃ sarvaṃ vyavahāraṃ mahotkaṭam

tataśca kathayāmāsa sarvaṃ teṣāṃ savista ram //
tasya saṃceṣṭitaṃ bhūri lokatrayaprapīḍanam

atha teṣāṃ mahākopo bhūya evābhyavardhata //
nāradasya vacaḥ śrutvā tādṛglokakathodbhavam //

teṣāṃ kopodbhavo gharmo vaktradvāreṇa niryayau //
yena diṅmaṃḍalaṃ sarvaṃ tatkṣaṇātkaluṣīkṛtam

etasminnaṃtare tatra kārtikeyaḥ samabhyayāt //
papraccha ca kimetaddhi devānāṃ kopakāraṇam //
yena kāluṣyatāṃ prāptaṃ dikcakraṃ sakalaṃ mune // ca //
// nārada uvāca // //
eteṣāṃ sāṃprataṃ skanda mayā vārtā niveditā //
trailokyaṃ dānavaiḥ sarvairyathā nītaṃ madotkaṭaiḥ

strīratnamaśvaratnaṃ vā na kiṃcitkasyacidgṛhe //
te dṛṣṭvā mokṣayaṃti sma durnivāryā madotkaṭāḥ

tacchrutvā kārtikeyasya viśeṣātsaṃprajāyata //
vaktradvāreṇa devānāṃ yathā kopaḥ samāgataḥ

etasminnaṃtare jātā tatkopāṃte kumārikā //
sarvalakṣaṇasaṃpannā divyatejo'nvitā śubhā

kārtikeyasya kopena kope miśre divaukasām //
yasmājjātātra sā kanyā tasmātkātyāyanī smṛtā

tatastasyā dadau vajramāyudhaṃ tridaśādhipaḥ //
śaktiṃ skandaḥ sutīkṣṇāgrāṃ cāpaṃ devo janārdanaḥ

triśūlaṃ ca mahādevaḥ pāśaṃ ca varuṇaḥ svayam //
ādityaśca sitānbāṇāṃścaṃdramāścarma cottamam

nistriṃśaṃ nirṛtistuṣṭa ulmukaṃ ca hutāśanaḥ //
vāyuśca cchurikāṃ tīkṣṇāṃ dhanadaḥ parighaṃ tathā

daṇḍaṃ pretādhipo raudraṃ vadhāya suravidviṣām //
dvādaśaivaṃ samālokya sā''yudhāni dvijottamāḥ

kātyāyanī tataścakre bhujadvādaśakaṃ tadā //
jagrāha ca drutaṃ tāni surāstrāṇi divaukasām

tataḥ provāca tānsarvānsaṃprahṛṣṭatanūruhā //
yadarthaṃ vibudhaśreṣṭhāḥ sṛṣṭā tadbrūta mā ciram

sarvaṃ kāryaṃ kariṣyāmi yuṣmākaṃ nātra saṃśayaḥ //
// devā ūcuḥ // //
mahiṣo dānavo raudraḥ samutpanno'tra sāṃpratam

avadhyaḥ sarvabhūtānāṃ mānuṣāṇāṃ viśeṣataḥ //
muktvaikāṃ yoṣitaṃ tena tvamasmābhirvinirmitā

tasmāttvaṃ sāṃprataṃ gaccha viṃdhyākhyaṃ parvatottamam //
tapastatra kuruṣvogra tejo yenābhivardhate

tatastu tejaḥsaṃyuktāṃ tvāṃ jñātvā vayameva hi //
agre dhṛtvā kariṣyāmo yuddhaṃ tena durātmanā

tatastvacchastranirdagdhaḥ paṃcatvaṃ sa prayāsyati //
vayaṃ ca tridaśaiśvaryaṃ labhiṣyāmo hatadviṣaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye kātyāyanyutpattivarṇanaṃnāma viṃśatyuttaraśatatamo'dhyāyaḥ//